କର୍ତାରପୁର ଦର୍ଶନ ପାଇଁ ଯାଇ ସିଦ୍ଧୁ କହିଲେ ଇମ୍ରାନ ଖାନ ମୋ ବଡ ଭାଇ

ନୂଆଦିଲ୍ଲୀ ୨୦।୧୧: (ସଂକେତ ଟିଭି) ଗୁରୁ ନାନକ ଦେବ ଜୟନ୍ତୀ ଅବସରରେ ପାକିସ୍ତାନର କରତାରପୁର ଗସ୍ତ କରିଥିବା ପଞ୍ଜାବ ପ୍ରଦେଶ କଂଗ୍ରେସ ମୁଖ୍ୟ ନବଜୋତ ସିଂ ସିଦ୍ଧୁ ଏଥର ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନିଜ ବଡ ଭାଇ ବୋଲି ସମ୍ବୋଧାନ କରି ପୁଣି ବିବାଦ ପରିସରକୁ ଆସିଥିବା ଦେଖିବାକୁ ମିଳିଛି ।

ସିଦ୍ଧୁ କର୍ତାରପୁର କରିଡର ଖୋଲିବାର ତିନି ଦିନ ପରେ କର୍ତାରପୁର ସାହିବ ଗୁରୁଦ୍ୱାରରେ ଶନିବାର ଦିନ ପହଞ୍ଚିଛନ୍ତି ଏବଂ ସେଠାରେ ତାଙ୍କୁ ସ୍ୱାଗତ କରାଯାଇଥିଲା । ଏହି ସମୟରେ ସିଦ୍ଧୁ କର୍ତାରପୁର ପ୍ରୋଜେକ୍ଟ ମ୍ୟାନେଜମେଣ୍ଟ ୟୁନିଟର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ମହମ୍ମଦ ଲତିଫଙ୍କ ସହ କଥା ହୋଇ କହିଥିଲେ ଯେ ‘ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ ମୋର ବଡ଼ ଭାଇଙ୍କ ପରି’।

ଏହା ଜଣା ଯେ ପାକିସ୍ତାନର ଇମ୍ରାନ ଖାନ ସରକାର କ୍ରିକେଟର-ରାଜନେତା ନବଜୋତ ସିଂ ସିଦ୍ଧୁଙ୍କୁ ଦୁଇ ଦେଶ ମଧ୍ୟରେ ଶିଖ୍ ତୀର୍ଥଯାତ୍ରା ସ୍ଥଳ ଖୋଲିବାରେ ତାଙ୍କ ଭୂମିକା ପାଇଁ ପ୍ରଶଂସା କରିଥିଲେ । ୨୦୧୮ ରେ ସିଦ୍ଧୁ ପାକିସ୍ତାନର ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ସମାରୋହରେ ଯୋଗ ଦେଇଥିବା ବେଳେ ଇମ୍ରାନ ଖାନ ଏବଂ ସିଦ୍ଧୁଙ୍କ ମଧ୍ୟରେ ସମ୍ପର୍କ ଲାଇମଲାଇଟକୁ ଆସିଥିଲା ।

ତେବେ ସିଦ୍ଧୁଙ୍କ ଏପରି ମନ୍ତବ୍ୟ ପରେ ବିବାଦ ବଢିବା ସହ ତାଙ୍କୁ ସମାଲୋଚନା ମଧ୍ୟ ଆରମ୍ଭ ହୋଇଯାଇଛି । ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲବ୍ୟ ଘଟଣାରେ ପ୍ରତିକ୍ରିୟା ରଖି, ସିଧାସଳଖ କଂଗ୍ରେସ ଓ ରାହୁଲ ଗାନ୍ଧୀଙ୍କୁ ମଧ୍ୟ ଟାର୍ଗେଟ କରିଥିବା ଦେଖିବାକୁ ମିଳିଛି । ଅମିତ କହିଛନ୍ତି ରାହୁଲଙ୍କ ପ୍ରିୟ ହେଉଛନ୍ତି ସିଦ୍ଧୁ, କିନ୍ତୁ ସେ ଯାଇ ପାକିସ୍ତାନୀ ପ୍ରଧାନମନ୍ତ୍ରୀଙ୍କୁ ନିଜ ବଡ ଭାଇ ବୋଲି ସମ୍ବୋଧନ କରୁଛନ୍ତି ।

ଆହୁରି ମଧ୍ୟ ଅମିତ କହିଛନ୍ତି, ସିଦ୍ଧୁଙ୍କ ଏପରି ବ୍ୟବହାର କିଛି ନୂଆ କଥା ନୁହେଁ । ଗତଥର ସେ ପାକିସ୍ତାନ ଗସ୍ତ କରିଥିବା ସୟମୟରେ ପାକିସ୍ତାନ ସେନାମୁଖ୍ୟ ଜେନରାଲ ବାଜୱାଙ୍କୁ ଆଲିଙ୍ଗନ କରିବା ସହ ପ୍ରଶଂସା କରିଥିଲେ। ତେବେ କଂଗ୍ରେସ ହାଇକମାଣ୍ଡ ପଞ୍ଜାବ ପ୍ରଦେଶର ନେତୃତ୍ବ କ୍ୟାପଟେନ ଅମରିନ୍ଦର ସିଂଙ୍କ ହାତରୁ କାଢିନେଇ ଜଣେ ପାକିସ୍ତାନ ପ୍ରେମୀଙ୍କ ହାତରେ ଟେକି ଦେଇଥିବା କହି ତାତ୍ସଲ୍ୟ କରିଛନ୍ତି ଅମିତ ।

କର୍ତାରପୁର ଦର୍ଶନ କରିବା ପାଇଁ ନବଜୋତ ସିଦ୍ଧୁଙ୍କ କାର୍ଯ୍ୟକ୍ରମ ୧୮ ନଭେମ୍ବରରେ ଧାର୍ଯ୍ୟ କରାଯାଇଥିଲା । କିନ୍ତୁ ତାଙ୍କ ନାମ ଗୃହ ମନ୍ତ୍ରଣାଳୟ ଦ୍ୱାରା ଶିଖ୍ ତୀର୍ଥଯାତ୍ରୀଙ୍କ ତୃତୀୟ ବ୍ୟାଚ୍ ତାଲିକାରେ ସାମିଲ କରାଯାଇଥିଲା । ଗୁରୁବାର ଦିନ କର୍ତାରପୁର ସାହେବ ଗସ୍ତରେ ଆସିଥିବା ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନିଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳୀରେ ସିଦ୍ଧୁଙ୍କ ନାମ ସାମିଲ କରାଯାଇ ନ ଥିଲା ।

ବୁଧବାର ବିଳମ୍ବିତ ରାତିରେ ସିଦ୍ଧୁଙ୍କୁ କୁହାଯାଇଥିଲା ଯେ ଗୁରୁପୁରର ଗୋଟିଏ ଦିନ ପରେ ନଭେମ୍ବର ୨୦ ରେ କର୍ତାରପୁର ସାହେବ ଗୁରୁଦ୍ୱାର ଦର୍ଶନ କରୁଥିବା ଭିଆଇପିଙ୍କ ତୃତୀୟ ତାଲିକାରେ ତାଙ୍କ ନାମ ସାମିଲ ହୋଇଛି । ତାଙ୍କର ମିଡିଆ ପରାମର୍ଶଦାତା ଜଗତର ସିଦ୍ଧୁ କହିଛନ୍ତି, ‘ଅନୁମତି ପାଇବା ପାଇଁ ଫର୍ମ ପୂରଣ ହୋଇଥିଲା । କିନ୍ତୁ ପିପିସିସି ମୁଖ୍ୟ ଚନ୍ନିଙ୍କ ସରକାରୀ ପ୍ରତିନିଧି ଦଳରେ ସାମିଲ କରାଯାଇ ନ ଥିଲା ।

ଯଦିଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଏକ ବୟାନରେ କହିଛି ଯେ ସିଦ୍ଧୁ, ପିପିସିସି କାର୍ଯ୍ୟରତ ସଭାପତି ତଥା ବରିଷ୍ଠ ବିଧାୟକଙ୍କ ସମେତ ୫୦ ଟି ଭିଆଇପିଙ୍କ ତାଲିକା ନଭେମ୍ବର ୧୬ ସନ୍ଧ୍ୟାରେ ଗୃହ ମନ୍ତ୍ରଣାଳୟକୁ ପଠାଯାଇଛି । ତେବେ ସୁରକ୍ଷା ଚିନ୍ତାଧାରାକୁ ଦର୍ଶାଇ କେନ୍ଦ୍ର ସମସ୍ତ ଭିଆଇପିଙ୍କୁ ସେହି ଦିନ କର୍ତାରପୁର ସାହେବ ଦର୍ଶନ କରିବାକୁ ଅନୁମତି ଦେବାକୁ ମନା କରିଦେଇଥିଲେ ଏବଂ ଭିଆଇପି ମାନଙ୍କୁ ତିନିଟି ଦଳରେ ବିଭକ୍ତ କରିଥିଲା ।