୩୦ ହଜାର ଟଙ୍କା ଲାଗି ସାଙ୍ଗକୁ ଟାଙ୍ଗିଆରେ ହାଣି ହତ୍ୟା

ବାରିପଦା ୧୭।୦୪ : (ସଂକେତ ଟିଭି) ୩୦ ହଜାର ଟଙ୍କା ଲାଗି ଯୁବକଙ୍କୁ ଗଳାକାଟି ହତ୍ୟା କଲା ସାଙ୍ଗ । ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଏହି ଘଟଣା ଘଟିଛି ମୟୁରଭଞ୍ଜ ଜିଲ୍ଲା ଯଶୀପୁର ଥାନା ଅଞ୍ଚଳରେ ।

ସୂଚନା ଅନୁସାରେ, ଗତ ୧୪ ତାରିଖ ରାତିରେ ମୟୁରଭଞ୍ଜ ଜିଲ୍ଲା ଝାଡ଼ବେଡା ନିକଟ ସଙ୍ଗାତମରା ନାଳ ଭିତରୁ ଯଶୀପୁର ଥାନା ଗେନ୍ତେଇସାହି ର ଧନେଶ୍ୱର ଗୁଇୟାର ଗଳିତ ମୃତ ଦେହ ମିଳିଥିଲା । ପୋଲିସ ଏନେଇ ଏକ ହତ୍ୟା ମାମଲା ରୁଜୁ କରି ଅଧିକ ତଦନ୍ତ ଆରମ୍ଭ କରିଥିଲା । ଜଣେ ଅଭିଯୁକ୍ତକୁ ଗିରଫ କରି ପୋଲିସ ଏହି ହତ୍ୟାକାଣ୍ଡ ର ପର୍ଦ୍ଦାଫାଶ କରିଛି ।

ଖବର ଅନୁଯାୟୀ, ଗତ ୪ ତାରିଖ ଦିନ ଗେନ୍ତେଇସାହିର ଧନେଶ୍ୱର ଗୁଇୟା ଆଜବେଷ୍ଟସ୍‌ କିଣିବାକୁ ଘରୁ ୩୦ ହଜାର ଟଙ୍କା ନେଇ , ସେହି ଗାଁର ପିତାମ୍ବର ବେହେରା ନାମକ ଜଣେ ଯୁବକଙ୍କ ସହ ଏକ ବାଇକ ଯୋଗେ ଭଞ୍ଜକିଆ ବଜାରକୁ ଯାଉଥିଲା । ଗେନ୍ତେଇସାହି ଓ ଭଞ୍ଜକିଆ ରାସ୍ତାରେ ଥିବା ସଙ୍ଗାତମରା ନାଳ ପାଖରେ ପୂର୍ବ ଯୋଜନା ଅନୁସାରେ ଏକ କଟୁରୀ ସାହାଯ୍ୟରେ ଧନେଶ୍ୱରକୁ ତଣ୍ଟି କାଟି ହତ୍ୟା କରାଯାଇଥିଲା । ପରେ ସେହି ନାଳରେ ମୃତଦେହକୁ ଫିଙ୍ଗିଦେଇଥିଲା ।

ଶେଷରେ ଗତ ୧୪ ତାରିଖ ଦିନ ରାତିରେ ଧନେଶ୍ୱରର ମୃତଦେହ ମିଳିବା ପରେ ପୋଲିସ ପିତାମ୍ବରକୁ ଅଟକ ରଖି ପଚରାଉଚରା କରୁଥିଲା । ପୋଲିସ ତଦନ୍ତ ନିଜ ଦୋଷ ସ୍ୱୀକାର କରିଥିଲା ପିତାମ୍ବର । ଟଙ୍କା ଲୋଭରେ ସେ ହତ୍ୟା କରିଛି ବୋଲି ପୋଲିସକୁ କହିଥିଲା । ହତ୍ୟାକାଣ୍ଡରେ ବ୍ୟବହୃତ କଟୁର, ମୋବାଇଲ, ମନିପର୍ସ ଓ ଗୋଟିଏ ବାଇକ୍‌କୁ ଜବତ କରିଛି । ଆଜି ପୋଲିସ ଅଭିଯୁକ୍ତକୁ କୋର୍ଟ ଚାଲାଣ କରିଛି ।