ସୋସିଆଲ ମିଡିଆ ପୋଷ୍ଟକୁ ନେଇ ବର୍ଷା-ଅନୁଭବଙ୍କୁ ତାଗିଦ୍‌ କଲେ ହାଇକୋର୍ଟ

କଟକ (ସଂକେତ୍ ଟିଭି) : ହାଇକୋର୍ଟ ପାରିବାରିକ ବିବାଦ ମାମଲାରେ ଅଭିନେତା ତଥା ଏମ୍‌ପି ଅନୁଭବ ମହାନ୍ତି ଏବଂ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କୁ ତାଗିଦ କରିଛନ୍ତି। ଉଭୟଙ୍କୁ ସୋସିଆଲ ମିଡିଆରେ ମନ୍ତବ୍ୟ ନ ରଖିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। କେହି କାହା ବିରୋଧରେ ମନ୍ତବ୍ୟ ନ ଦେବା ସହ ଆଉ କିଛି ଭିଡିଓ ପୋଷ୍ଟ ନ କରିବାକୁ ଅନୁଭବଙ୍କୁ ହାଇକୋର୍ଟ କହିଛନ୍ତି। ଏଥିସହ ଜୁଲାଇ ୪ ତାରିଖରେ ମାମଲାର ପରବର୍ତ୍ତୀ ଶୁଣାଣି ପାଇଁ କୋର୍ଟ ଦିନ ଧାର୍ଯ୍ୟ କରିଛନ୍ତି ।

ସୂଚନା ଅନୁସାରେ, ନିକଟରେ ଅନୁଭବ ଲଗାତର ତିନୋଟି ଭିଡିଓ କରି ବର୍ଷାଙ୍କ ଉପରେ ଖୁବ ବର୍ଷିଥିଲେ। ଏହାକୁ ନେଇ ସୋସିଆଲ ମିଡିଆରେ ଉଭୟଙ୍କ ପ୍ରଶଂସକ ମୁହାଁମୁହିଁ ହୋଇଥିଲେ। ବର୍ଷାଙ୍କ ବାବଦରେ ଅନୁଭବ ଅନେକ କଟୁ ଟିପ୍ପଣୀ ଦେବା ସହ ତାଙ୍କର ନାରୀତ୍ୱକୁ ନେଇ ମଧ୍ୟ ପ୍ରଶ୍ନ ଉଠାଇଥିଲେ। ଫଳରେ ବର୍ଷା ପ୍ରଥମେ ପୁରୀ ଘାଟ ଥାନାକୁ ଯାଇ ଅନୁଭବଙ୍କ ବିରୋଧରେ ଏତଲା ଦେଇଥିଲେ। ଅନୁଭବଙ୍କ ଏଭଳି ଭିଡ଼ିଓ ପାଇଁ ତାଙ୍କ ମାନହାନି ହୋଇଛି ବୋଲି ବର୍ଷା ଅଭିଯୋଗ କରିଥିଲେ। ଏପରିକି ଅନୁଭବଙ୍କ ଭିଡିଓ ପୋଷ୍ଟକୁ ନେଇ ବର୍ଷା ହାଇକୋର୍ଟ ଯାଇଛନ୍ତି। ସୋସିଆଲ ମିଡ଼ିଆରେ ତାଙ୍କ ନାମରେ ହେଉଥିବା ଅପପ୍ରଚାର ବନ୍ଦ ପାଇଁ ସେ ପିଟିଶନ ଦେଇଛନ୍ତି ।