ଖାକିରେ କଳଙ୍କ , ଲାଞ୍ଚ ନେବା ବେଳେ ଧରାପଡ଼ିଲେ ହିନ୍ଦୋଳ ଏସଡିପିଓ

ଢେଙ୍କାନାଳ (ସଂକେତ୍ ଟିଭି) : ୩୦ ହଜାର ଟଙ୍କା ନେଲା ବେଳେ ହିନ୍ଦୋଳ ଏସଡିପିଓ ମଳୟ ନାୟକ ଭିଜିଲାନ୍ସ ହାତରେ ଧରାପଡ଼ିଛନ୍ତି। ଢେଙ୍କାନାଳ ଜିଲ୍ଲାର କାରନ୍ଦା ଛକରେ କାରନ୍ଦା ଗ୍ରାମର ଦୁଖବନ୍ଧୁ ସାହୁଙ୍କ ଠାରୁ ପଥର ଖାଦାନରୁ ପଥର ଚାଲାଣ କରିବା ପାଇଁ ମଳୟ ନାୟକ ୩୦ହଜାର ଟଙ୍କା ଲାଞ୍ଚ ନେଉଥିଲେ। ଏହି ସମୟରେ କଟକ ଭିଜିଲାନସ୍ ବିଭାଗ ଅଧିକାରୀମାନେ ତାଙ୍କୁ ଧରି କଟକ ନେଇ ଅଧିକ ପଚରାଉଚରା କରୁଥିବା ଜଣାପଡିଛି।

ସୂଚନା ଅନୁଯାୟୀ, ଗାଡ଼ିର ସମସ୍ତ କାଗଜପତ୍ର ଓ ଅନୁମତି ଥିବା ସତ୍ତ୍ୱେ ଅଭିଯୋଗକାରୀ ଦୁଖବନ୍ଧୁ ସାହୁଙ୍କୁ ହିନ୍ଦୋଳ ଏସଡିପିଓ ମଳୟ ନାୟକ ବାରମ୍ବାର ଧମକ ଦେବା ସହ ୩୦ ହଜାର ଟଙ୍କା ଲାଞ୍ଚ ମାଗୁଥିଲେ। ଏହାପରେ ସେ ବାଧ୍ୟ ହୋଇ କଟକ ଭିଜିଲାନ୍ସ ବିଭାଗର ଦ୍ବାରସ୍ଥ ହୋଇଥିଲେ। ତାପରେ ଯୋଜନା ମୁତାବକ ଟଙ୍କା ନେବା ନିମନ୍ତେ ମଳୟ ନାୟକ କାରନ୍ଦା ଛକକୁ ଆସିଥିଲେ। ସେହି ସମୟରେ ସେଠାରେ ଭିଜିଲାନ୍ସ ବିଭାଗ ଅଧିକାରୀମାନେ ଆଗରୁ ଜଗିଥିଲେ। ଏସଡିପିଓ ମଳୟ ନାୟକ ଲାଞ୍ଚ ଟଙ୍କା ନେବା ବେଳେ ଭିଜିଲାନ୍ସ ଟିମ୍ ମାଡ଼ି ବସିଥିଲା ।