ଋଣର ସୁଧ ଦରରେ ବୃଦ୍ଧି କଲେ ୩ ବ୍ୟାଙ୍କ

ନୂଆଦିଲ୍ଲୀ (ସଂକେତ୍ ଟିଭି) : କାନାଡା ବ୍ୟାଙ୍କ, ଏଚଡିଏଫସି ବ୍ୟାଙ୍କ, ଓ କରୁର ବୈସ୍ୟା ବ୍ୟାଙ୍କ ମଙ୍ଗଳବାର ନିଜର ଋଣର ସୁଧ ଦରରେ ବୃଦ୍ଧି ଘୋଷଣା କରିଛନ୍ତି। ଏହି ବର୍ଦ୍ଧିତ ଦର ଜୁନ୍ ୭ ତାରିଖରୁ ଲାଗୁ ହେବ ବୋଲି କାନାଡା ବ୍ୟାଙ୍କ ପକ୍ଷରୁ ସୂଚନା ଦିଆଯାଇଛି।

ବର୍ଷିକିଆ ଋଣ ଉପରେ କାନାଡା ବ୍ୟାଙ୍କ ସୁଧ ଦରକୁ ୦.୦୫ପ୍ରତିଶତ ବଢାଇଛି। ଏବେ ସୁଧର ଦର ୭.୪୦ ପ୍ରତିଶତରେ ପହଞ୍ଚିଛି। ୬ ମାସିକିଆ ଋଣ ଉପରେ ଏହା ୭.୩୦ରୁ ବଢି ୭.୩୫ରେ ପହଞ୍ଚିଛି। ସେହିପରି କରୁର ବୈସ୍ୟା ବ୍ୟାଙ୍କ ସୁଧ ଦରକୁ ୦.୪୦ ପ୍ରତିଶତ ବଢାଇଥିବାରୁ ଏବେ ଏହା ୮.୭୫ପ୍ରତିଶତରେ ପହଞ୍ଚିଛି।

ଏଚଡିଏଫସି ବ୍ୟାଙ୍କ ମଧ୍ୟ ନିଜର ମାର୍ଜିନ୍ କଷ୍ଟ ଅଫ୍ ଲେଣ୍ଡିଙ୍ଗ ରେଟ୍ସ(ଏମସିଏଲଆର)କୁ ବୃଦ୍ଧି କରିଛି। ବ୍ୟାଙ୍କ ନିଜର ସୁଧ ଦରକୁ ୭.୧୫ ପ୍ରତିଶତକୁ ବୃଦ୍ଧି କରି ୭.୫୦ ପ୍ରତିଶତକୁ ବଢାଇ ଦେଇଛି। ବର୍ଷିକିଆ କରଜ ଉପରେ ସୁଧ ଦର ୭.୨୦ରୁ ବଢି ୭.୫୫ ପ୍ରତିଶତକୁ ବୃଦ୍ଧି ପାଇଥିବାବେଳେ ୬ ମାସିକିଆ ଋଣରେ ସୁଧ ଦର ୭.୬୦ ପ୍ରତିଶତରୁ ୭.୭୦କୁ ବଢିଛି।

ଆରବିଆଇର ମୁଦ୍ରା ନୀତି କମିଟିର ତିନି ଦିନିଆ ବୈଠକ ଶେଷ ହେବା ପୂର୍ବରୁ ହିଁ ବ୍ୟାଙ୍କଗୁଡିକ ନିଜ ନିଜ ସୁଧ ହାରରେ ବୃଦ୍ଧି କରିଛନ୍ତି। ଆରବିଆଇର ଏହି ବୈଠକରେ ରେପୋ ରେଟ୍‌କୁ ୩୫ ରୁ ୪୦ ବେସିସ୍‌ ପଏଣ୍ଟକୁ ବୃଦ୍ଧି କରିବାକୁ ନିଷ୍ପତ୍ତି ନେଇପାରେ ବୋଲି ସମ୍ଭାବନା ରହିଛି।