ବଢିବ ଆଇପିଏଲ୍ ମ୍ୟାଚ୍ ସଂଖ୍ୟା

ନୂଆଦିଲ୍ଲୀ (ସଂକେତ୍ ଟିଭି) : ଆଗାମୀ ସଂସ୍କରଣରେ ଇଣ୍ଡିଆନ ପ୍ରିମିୟର ଲିଗ୍‌(ଆଇପିଏଲ)ର ପାଞ୍ଚ ସଂଖ୍ୟା ବଢିବ । ଆସନ୍ତା ପାଞ୍ଚ ବର୍ଷ ପର୍ଯ୍ୟନ୍ତ ଗଣମାଧ୍ୟମ ଅଧିକାର ପାଇଁ ୪୮,୩୯୦ କୋଟି ଟଙ୍କାର ରାଜସ୍ବ ହାସଲ ପରେ ବିସିସିଆଇ ସଂପାଦକ ଜୟ ଶାହ ଦାବି କରିଛନ୍ତି ଯେ, ଦୁନିଆର ସବୁଠୁ ମହଙ୍ଗା କ୍ରିକେଟ୍ ଲିଗର ସମୟ ବୃଦ୍ଧି କରାଯିବ । ଏଥିସହ ମ୍ୟାଚ୍ ସଂଖ୍ୟା ବଢାଯିବ ।

ଏହା ସ୍ପଷ୍ଟ କରି ଶାହ କହିଛନ୍ତି ଆଇପିଏଲର ସମୟ ସୀମା ବଢାଇବା ନେଇ ବିସିସିଆଇ ଲଗାତାର ଆଇସିସି ଏବଂ ଅନ୍ୟ ଦେଶ ସହିତ ଯୋଗାଯୋଗରେ ଅଛି । ସେ କହିଛନ୍ତି କ୍ରିକେଟ୍ କ୍ୟାଲେଣ୍ଡରରେ ଆଇପିଏଲ ଏକ ବଡ ଟୁର୍ଣ୍ଣାମେଣ୍ଟରେ ପରିଣତ ହୋଇଛି । ଶାହ କହିଛନ୍ତି, ଆମେ ନିଜର ସାଥୀ ସଦସ୍ୟ ବୋର୍ଡ ଏବଂ ଆଇସିସି ସହିତ ଆଇପିଏଲ ପାଇଁ ଏକ ବଡ ୱିଣ୍ଡୋ ବିଷୟରେ ଆଲୋଚନା କରୁଛୁ । ବାର୍ଷିକ କ୍ରିକେଟ୍ କ୍ୟାଲେଣ୍ଡରରେ ଆଇପିଏଲ ଏକ ପ୍ରମୁଖ ଟୁର୍ଣ୍ଣାମେଣ୍ଟ ପାଲଟିଛି ।ଏହା ଏବେ କେବଳ ଏନଏଫଏଲଠୁ ପଛରେ ରହିଛି । ଆଇପିଏଲ ଏମିତି ଏକ ମଞ୍ଚ ଯେଉଁଠି ବିଶ୍ୱର ବଡ ବଡ ଖେଳାଳି ଅଂଶଗ୍ରହଣ କରୁଛନ୍ତି । କ୍ରିକେଟକୁ ଆଇପିଏଲ ଏକ ଭିନ୍ନ ସ୍ତରକୁ ନେଇଥିବା କହିଛନ୍ତି ଶାହ ।

କେବଳ କ୍ରିକେଟର ନୁହନ୍ତି ବରଂ କିଛି ଦିଗଜ ମଧ୍ୟ ଏବେ ଆଇପିଏଲରେ କୋଚ୍ ଭାବେ କାମ କରୁଛନ୍ତି । ଏହା ଏକ ଚମତ୍କାର ମଞ୍ଚ ଏବଂ ସଭିଙ୍କୁ ଆକର୍ଷିତ କରିଥାଏ । କାରଣ ଏଠାରୁ ମିଳୁଥିବା ଅନୁଭବ ଅମୂଲ୍ୟ ଅଟେ । ଯେମିତି ଯେମିତି ଆମେ ଆଗକୁ ବଢିବୁ ମ୍ୟାଚ୍ ସଂଖ୍ୟା ବଢି ଚାଲିବ ବୋଲି ବିସିସିଆଇ ସଂପାଦକ ଜୟ ଶାହ କହିଛନ୍ତି ।ଆଇପିଏଲ ୨୦୨୨ ସିଜିନରେ ୧୦ ଦଳ ଅଂଶଗ୍ରହଣ କରିଥିଲେ । ଏଥିରେ ୭୪ଟି ମ୍ୟାଚ୍‌ ଖେଳା ଯାଇଛି । ଏବେ ଆଶା କରାଯାଉଛି ଯେ, ଆଇପିଏଲରେ ଏବେ ପ୍ରତ୍ୟେକ ସିଜିନରେ ୮୪ କିମ୍ବା ୯୪ ମ୍ୟାଚ୍ ଖେଳାଯିବ ।