ଏକନାଥ ସିନ୍ଦେ ହେଲେ ମହାରାଷ୍ଟ୍ରର ନୂଆ ମୁଖ୍ୟମନ୍ତ୍ରୀ, ଫଡନାଭିସ୍‌ ଉପମୁଖ୍ୟମନ୍ତ୍ରୀ

ମୁମ୍ବାଇ (ସଂକେତ ଟିଭି) : ମହାରାଷ୍ଟ୍ରର ୨୦ତମ ମୁଖ୍ୟମନ୍ତ୍ରୀ ଭାବରେ ଏକନାଥ ସିନ୍ଦେ ଶପଥ ନେଇଛନ୍ତି । ସେହିଭଳି ଦେବେନ୍ଦ୍ର ଫଡ଼ନାଭିସ ନବମ ଉପମୁଖ୍ୟମନ୍ତ୍ରୀ ଭାବରେ ଶପଥ ନେଇଛନ୍ତି ।

ଏହା ସହିତ ୧୦ ଦିନ ଧରି ରାଜ୍ୟରେ ରାଜନୈତିକ ଛକାପଞ୍ଝା ଶେଷ ହୋଇଛି । ଆଜି ଶପଥ ଗ୍ରହଣ ସମୟରେ ପ୍ରଥମରୁ ନୂଆ ମୁଖ୍ୟମନ୍ତ୍ରୀ ସିନ୍ଦେ ଶିବସେନା ଦଳର ପ୍ରତିଷ୍ଠାତା ବାଲା ସାହେବ ଠାକରେଙ୍କ ନାମରୁ ହିଁ ଶପଥ ଆରମ୍ଭ କରିଥିଲେ ।

ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍‌ ପ୍ରେସମିଟ୍‌ କରି ବିଦ୍ରୋହୀ ବିଧାୟକ ଏକନାଥ ସିନ୍ଦେ ମୁଖ୍ୟମନ୍ତ୍ରୀ ହେବେ ବୋଲି ଘୋଷଣା କରିଥିଲେ । ଏହାସହ ସେ ମନ୍ତ୍ରୀମଣ୍ଡଳରେ ରହିବେ ନାହିଁ ବୋଲି ମଧ୍ୟ ଘୋଷଣା କରିଥିଲେ । ଏହି ଖବର ସାରା ଦେଶକୁ ଚକମା ଦେଇଥିଲା । ଏହାପରେ ଗୃହମନ୍ତ୍ରୀ ଅମିତ ଶାହ ଆସି ଦେବେନ୍ଦ୍ର ମନ୍ତ୍ରୀମଣ୍ଡଳରେ ଉପମୁଖ୍ୟମନ୍ତ୍ରୀ ଭାବରେ ରହିବେ ବୋଲି ଟ୍ବିଟ୍‌ କରିଥିଲେ ।

ଗତ ୧୦ ଦିନ ଓ ଆଜି ଶପଥ ଗ୍ରହଣ ସମାରୋହର ପୂର୍ବ କ୍ଷଣ ପର୍ଯ୍ୟନ୍ତ ମହାରାଷ୍ଟ୍ର ରାଜନୀତିରେ କଣ ଘଟିବ ତାହାକୁ ଗଣନା କରିବାରେ ଫେଲ ମାରିଥିଲେ ରାଜନୀତି ବିଶାରଦ । ତେବେ ସେ ଯାହା ବି ହେଉ ଶେଷରେ ମହାରାଷ୍ଟ୍ରରେ ମହା ବିକାଶ ଅଘାଡ଼ି ବା ତ୍ରୀଦଳୀୟ ସରକାରର ପତନ ଘଟିବାର ୨୪ ଘଣ୍ଟା ମଧ୍ୟରେ ନୂଆ ସରକାର ଆସିଛି ।