ଫେକ୍ ଇନଷ୍ଟା ଏକାଉଣ୍ଟରେ ନଗ୍ନ ଫଟୋ ପୋଷ୍ଟ କରି ବ୍ଲାକମେଲ୍ କରିବା ଅଭିଯୋଗରେ ଯୁବକ ଗିରଫ

ଯାଜପୁର (ସଂକେତ ଟିଭି): ଯୁବତୀଙ୍କ ନାଁରେ ଇନ୍‌ଷ୍ଟାଗ୍ରାମ୍‌ ଆକାଉଣ୍ଟ ଖୋଲି ସେଥିରେ କରୁଥିଲେ ଅଶ୍ଲୀଳ ଚାଟିଂ କରିବା ସହିତ ନଗ୍ନ ଫଟୋ ଦେଖାଇ ବ୍ଲାକମେଲ୍‌ କରିବା ଅଭିଯୋଗରେ ଯାଜପୁର ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତ ମୋବାଇଲ୍‌ରୁ ପୋଲିସ ବହୁ ଅଶ୍ଲୀଳ ଫଟୋ ଉଦ୍ଧାର କରିଛି । ଅଭିଯୁକ୍ତ ଜଣକ ହେଲେ ଭଦ୍ରକ ଜିଲ୍ଲା ବଞ୍ଛଡା ଥାନା ଜନ୍ତୁଆଳି ଗାଁର ସୁଶାନ୍ତ ବେହେରା ।

ସୂଚନା ଅନୁସାରେ, ସୁଶାନ୍ତ ହାଇଦ୍ରାବାଦରେ ଏକ ହୋଟେଲରେ ରୋଷେୟା ଭାବେ କାମ କରୁଥିଲେ। ରୋଷେଇ କାମରୁ ଫୁରସତ୍‌ ପାଇଲେ ସେ ନିଜକୁ ସୋଶାଲ୍‌ ମିଡିଆରେ ନିୟୋଜିତ କରାଉଥିଲେ। ଇନଷ୍ଟାଗ୍ରାମ୍‌ରେ ଯୁବତୀଙ୍କ ନାଁରେ ଆକାଉଣ୍ଟ ଖୋଲୁଥିଲେ। ସୁନ୍ଦର ସୁନ୍ଦର ଯୁବତୀଙ୍କ ଫଟୋ ଡିପିରେ ରଖୁଥିଲେ। ସେହି ଫଟୋ ଦେଖି ଅନ୍ୟ ଯୁବତୀମାନେ ତାଙ୍କ ସହିତ ଚାଟିଂ କରୁଥିଲେ। ଏହାର ସୁଯୋଗ ନେଇ ସୁଶାନ୍ତ ସେମାନଙ୍କ ସହିତ ଚାଟିଂ କରୁଥିଲା।

ଚାଟିଂ ବାହାନାରେ ସୁଶାନ୍ତ, ଯୁବତୀଙ୍କ ଫୋନ୍‌ ନମ୍ୱର ଓ ଅଶ୍ଲୀଳ ଫଟୋ ନେଇଯାଉଥିଲା। ପରବର୍ତ୍ତୀ ସମୟରେ ସେ ଅଶ୍ଲୀଳ ଫଟୋ ଦେଖାଇ ବ୍ଲାକ୍‌ମେଲ୍ କରୁଥିଲା। ସୁଶାନ୍ତ ଏମିତି କରି ଏକାଧିକ ଯୁବତୀଙ୍କୁ ଫସାଉଥିଲା। ଲୋକ ଲଜ୍ଜା ଭୟରେ ଯୁବତୀମାନେ ସାମ୍ନାକୁ ଆସିପାରୁନଥିଲେ। ତେବେ ଯାଜପୁର ଜିଲ୍ଲାର ଜଣେ ଯୁବତୀ ସୁଶାନ୍ତଙ୍କ ନାମରେ ବରୀ ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ଅଭିଯୋଗକୁ ଭିତ୍ତିକରି ଘଟଣାର ତଦନ୍ତ ଆରମ୍ଭ କରିଥିଲା। ପୋଲିସ୍‌ ପ୍ରଥମେ ସୁଶାନ୍ତଙ୍କ ମୋବାଇଲ୍‌ ଟ୍ରାକ୍‌ କରିଥିଲା।

ସୁଶାନ୍ତ ନିଜ ଗାଁରୁ କର୍ମକ୍ଷେତ୍ରକୁ ଫେରୁଥିବା ପୋଲିସ୍‌ କୌଣସି ସୂତ୍ରରୁ ଜାଣିବାକୁ ପାଇଥିଲା। ପରେ ତାକୁ ପିଛା କରି ଭୁବନେଶ୍ୱରରୁ ଗିରଫ କରିଥିଲା। ଆଜି ତାକୁ କୋର୍ଟ ଚାଲାଣ କରିଛି। ସୁଶାନ୍ତ ପାଖରୁ ଜବତ ହୋଇଥିବା ମୋବାଇଲରେ ଅନେକ ଯୁବତୀଙ୍କ ଫୋନ୍‌ ନମ୍ବର ଓ ଅଶ୍ଳୀଳ ବାର୍ତ୍ତାର ରେକର୍ଡିଂ ରହିଥିବା ପୋଲିସଠାରୁ ଜଣାପଡ଼ିଛି।