ଜମ୍ମୁକଶ୍ମୀର ଜେଲ୍ ମହାନିର୍ଦ୍ଦେଶକଙ୍କୁ ହତ୍ୟା, ମୁଖ୍ୟ ଅଭିଯୁକ୍ତ ୟାସିର ଗିରଫ

ଶ୍ରୀନଗର: (ସଂକେତ୍ ଟିଭି) ଜମ୍ମୁକଶ୍ମୀର ଜେଲ ବିଭାଗର ମହାନିର୍ଦ୍ଦେଶକ ହେମନ୍ତ କୁମାର ଲୋହିଆଙ୍କୁ ଗଳାକାଟି ହତ୍ୟା କରାଯାଇଛି । ଡିଜି ହେମନ୍ତଙ୍କ ମୃତ ଶରୀର ତାଙ୍କ ଘର ଭିତରୁ ଉଦ୍ଧାର ହୋଇଥିଲା । ଡିଜି ହେମନ୍ତଙ୍କୁ ହତ୍ୟା କରିବାକୁ ତାଙ୍କ ବେକକୁ ସସ ବୋତଲରେ କଟା ହୋଇଥିଲା । ଏହାପରେ ଶବକୁ ପୋଡି ଦେବାକୁ ପ୍ରୟାସ ହୋଇଥିଲା । ତେବେ ଡିଜିପିଙ୍କ ଘରେ ମୁତୟନ ଥିବା ସହାୟକ ବା ଚାକର ଫେରାର ରହିଥିଲା ।

ଏହି ଘଟଣାରେ ଡିଜି ଜେଲରର ବାସଭବନରେ ଘରୋଇ ସହାୟକ ଭାବରେ କାମ କରୁଥିବା ମୁଖ୍ୟ ଅଭିଯୁକ୍ତ ୟାସିର ଅହମ୍ମଦଙ୍କୁ ଗିରଫ କରାଯାଇଛି। ଅଭିଯୁକ୍ତଙ୍କୁ ପୁଲିସ ପଚରାଉଚରା କରୁଛି। ପୁଲିସ ଅଭିଯୁକ୍ତଙ୍କୁ କଚାନକ ଅଞ୍ଚଳରୁ ଗିରଫ କରିଛି। ଅଭିଯୁକ୍ତକୁ ଧରିବା ପାଇଁ ପୁଲିସ ଗତ ରାତିରୁ ଚଢ଼ାଉ କରିଥିଲା। ସୂଚନାନୁସାରେ, ଅଭିଯୁକ୍ତ ୟାସିର ଅହମ୍ମଦ କଚାନକ ଅଞ୍ଚଳରେ ଲୁଚି ରହିଥିଲା ଏବଂ ଫେରାର ହେବା ପୂର୍ବରୁ ମୋବାଇଲ୍ ଫୋନ୍ ଫିଙ୍ଗି ପଳାଇଥିଲେ। ଜମ୍ମୁକଶ୍ମୀର ପୁଲିସର ସୂଚନାନୁସାରେ ଅଭିଯୁକ୍ତ ୟାସିର ଅହମ୍ମଦ ଡିଜି ଜେଲରର ବାସଭବନରେ ଘରୋଇ ସହାୟକ ଭାବରେ କାମ କରୁଥିଲା। ସେ ଗତ ୬ ମାସ ଧରି ଅଧିକାରୀଙ୍କ ଘରେ କାର୍ଯ୍ୟ କରୁଥିଲା।

ପୁଲିସର ସୂଚନାନୁସାରେ, ପ୍ରାଥମିକ ଅନୁସନ୍ଧାନରେ ଏଭଳି କିଛି ତଥ୍ୟ ମିଳିଛି ଯେଉଁଥିରେ ଅଭିଯୁକ୍ତଙ୍କ ମାନସିକ ସ୍ଥିତି ଠିକ ନଥିବାର ଜଣାପଡିଛି | ହତ୍ୟାକାଣ୍ଡ ବାବଦରେ ଜଣାପଡିବା ପରେ ପୁଲିସ ଅନେକ ସିସିଟିଭି ଫୁଟେଜ ସଂଗ୍ରହ କରିଥିଲା ​​ଯେଉଁଥିରେ ଅଭିଯୁକ୍ତ ଘଟଣା ପରେ ଘରୁ ପଳାଉଥିବାର ନଜର ଆସିଥିଲା।

ଅନ୍ୟପଟେ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ ସହ ଲିଙ୍କ ଥିବା ଆତଙ୍କବାଦୀ ସଂଗଠନ ପିଏଏଫଏଫ ତରଫରୁ ଏକ ପ୍ରେସ ବିଜ୍ଞପ୍ତି ଜାରି କରି ଅଧିକାରୀଙ୍କୁ ହତ୍ୟା କରିଥିବାର କହିଥିଲା । ଆତଙ୍କବାଦୀ ସଂଗଠନ ଆହୁରି ମଧ୍ୟ କହିଛି ଯେ ସୁରକ୍ଷା ଜାଲ ମଧ୍ୟରେ ଜମ୍ମୁକଶ୍ମୀର ଗସ୍ତରେ ଆସିଥିବା ଗୃହମନ୍ତ୍ରୀଙ୍କ ପାଇଁ ଏହା ଏକ ଛୋଟ ଉପହାର। ତେବେ ପ୍ରାଥମିକ ଅନୁସନ୍ଧାନ ଆଧାରରେ ପୁଲିସ କହିଛି ଯେ ଏହା ଆତଙ୍କବାଦୀ ଘଟଣା କି ନୁହେଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।