ସାମାନ୍ୟ ବଚସାକୁ କେନ୍ଦ୍ର କରି ସାଙ୍ଗକୁ ଗୁଳି ମାରି ଯୁବକ ଗିରଫ

ବାଲେଶ୍ୱର : (ସଂକେତ୍ ଟିଭି): ସାମାନ୍ୟ ବଚସାରୁ ନିଶାସକ୍ତ ଅବସ୍ଥାରେ ନିଜ ସାଙ୍ଗ ଉପରକୁ ଗୁଳିମାଡ କରିଥିଲେ ଅନ୍ୟ ଜଣେ ସାଙ୍ଗ । ଗତକାଲି ବିଳମ୍ବିତ ରାତିରେ ବାଲେଶ୍ୱର ସହରର ଆର୍ତ୍ତକବିରାଜ ରୋଡ୍‌ରେ ଏହି ଘଟଣା ଘଟିଛି। ଗୁଳିମାଡରେ ଗୁରୁତର ହୋଇ ଆହତ ହୋଇଥିବା ଯୁବକ କମଲ ଦାସଙ୍କୁ କଟକ ସ୍ଥାନାନ୍ତର କରାଯାଇଛି । କମଲ ଦାସଙ୍କ ଆଖିରେ ଗୁଳି ବାଜିଥିବା ସୂଚନା ରହିଛି ।

ଘଟଣାପରେ ଫେରାର ଥିବା କମଳଙ୍କ ସାଙ୍ଗ ତଥା ଅଭିଯୁକ୍ତ ବାଲେଶ୍ବର ସହରର ଆକତପୁର ଚୌଧୁରୀସାହିର ସୁଜଲ୍ ଚୌଧୁରୀ (24)ଙ୍କୁ ପୋଲିସ ଗିରଫ କରିଛି । ତାଙ୍କ ନିକଟରୁ ଗୋଟିଏ ପିସ୍ତଲ ଜବତ କରାଯାଇଛି ।

ସୂଚନା ଅନୁସାରେ ଉଭୟ ସାଙ୍ଗ ବାଲେଶ୍ୱରର ଆର୍ତ୍ତକବିରାଜ ରୋଡ୍‌ରେ ବସି କଥା ହେଉଥିଲେ। ମାତ୍ର ହଠାତ୍‌ କୌଣସି କାରଣକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା ଏବଂ ପରେ କମଳଙ୍କ ଉପରକୁ ଗୁଳିମାଡ଼ କରିଥିଲେ ସୁଜଲ୍। ଗୁଳିଟି କମଳଙ୍କ ଆଖିରେ ବାଜିଥିଲା। କମଳ ତଳେ ପଡ଼ିଯାଇଥିବା ବେଳେ ସୁଜଲ୍ ଘଟଣାସ୍ଥଳରୁ ଚମ୍ପଟ ମାରିଥିଲେ। ଫେରାର ହୋଇଯାଇଥିବା ସୁଜଲ ବାଲେଶ୍ୱର ସ୍ଥିତ ବଳାଙ୍ଗୀ ଡିଗ୍ରୀ କଲେଜର ଛାତ୍ର ବୋଲି ଜଣାପଡିଛି । ସ୍ଥାନୀୟ ଲୋକେ ଗୁଳି ଫୁଟିବା ଶବ୍ଦ ଶୁଣି ସେଠାରେ ପହଞ୍ଚିଥିଲେ ଓ କମଳଙ୍କୁ ଗୁରୁତର ଅବସ୍ଥାରେ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ତେବେ କମଳଙ୍କୁ ସୁଜଲ୍ କ’ଣ ପାଇଁ ଗୁଳିମାଡ଼ କଲେ, ତା’ର ପ୍ରକୃତ କାରଣ ଜଣାପଡ଼ି ନାହିଁ।