ରାହୁଲଙ୍କ ଫ୍ଲପ୍ ସୋ ଜାରି, ଓପନିଂ କରିବେ କି ପନ୍ତ, ଜବାବ ରଖିଲେ ବ୍ୟାଟିଂ କୋଚ୍

ନୂଆଦିଲ୍ଲୀ : (ସଂକେତ୍ ଟିଭି) ଟି-୨୦ ବିଶ୍ୱକପ ୨୦୨୨ ରେ ଉପ-ଅଧିନାୟକ କେ.ଏଲ୍ ରାହୁଲ ଏପର୍ଯ୍ୟନ୍ତ ଟିମ୍ ଇଣ୍ଡିଆ ପାଇଁ ରନ୍ ସ୍କୋର କରିବାରେ ଅସଫଳ ହୋଇଛନ୍ତି । ପାକିସ୍ତାନ ପରେ ରାହୁଲ ନେଦରଲ୍ୟାଣ୍ଡ ବିପକ୍ଷରେ ମଧ୍ୟ ଫ୍ଲପ ହୋଇଛନ୍ତି । କ୍ରିକେଟ୍ କରିଡରରେ ଏକ ଚର୍ଚ୍ଚା ହୋଇଥିଲା କି ରାହୁଲଙ୍କ ବଦଳରେ ଦକ୍ଷିଣ ଆଫ୍ରିକା ବିପକ୍ଷର ପ୍ଲେଇଂ ଇଲେଭେନରେ ଟିମ୍ ମ୍ୟାନେଜମେଣ୍ଟ ପନ୍ତଙ୍କୁ ସୁଯୋଗ ଦେଇପାରେ? ଋଷଭ ପନ୍ତ ଟି-୨୦ ବିଶ୍ୱକପରେ ଭାରତୀୟ ଦଳର ଏକ ଅଂଶ, କିନ୍ତୁ ଏପର୍ଯ୍ୟନ୍ତ ସେ ପ୍ଲେଇଂ ଇଲେଭେନରେ ସୁଯୋଗ ପାଇ ନାହାଁନ୍ତି ।

ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ ପୂର୍ବରୁ ସାମ୍ବାଦିକ ସମ୍ମିଳନୀରେ ଭାରତୀୟ ବ୍ୟାଟିଂ ପ୍ରଶିକ୍ଷକ କୋଚ୍ ବିକ୍ରମ ରାଠୋରଙ୍କୁ ଏହି ପ୍ରଶ୍ନ ପଚରାଯିବାରୁ ସେ କହିଛନ୍ତି ଯେ ଦଳ ଏହିପରି କିଛି ଚିନ୍ତା କରୁନାହିଁ । ଭାରତୀୟ ବ୍ୟାଟିଂ କୋଚ୍ କହିଛନ୍ତି ‘ନା, ନା ଆମେ ସେପରି ଚିନ୍ତା କରୁନାହୁଁ । ବର୍ତ୍ତମାନ କେବଳ ଦୁଇଟି ଗେମ୍ ହୋଇଛି । ରାହୁଲ ଚମତ୍କାର ବ୍ୟାଟିଂ କରୁଛନ୍ତି ଓ ଅଭ୍ୟାସ ମ୍ୟାଚରେ ମଧ୍ୟ ସେ ଭଲ ବ୍ୟାଟିଂ କରିଛନ୍ତି । ତେଣୁ ଆମେ ବର୍ତ୍ତମାନ ସେପରି କୌଣସି ଜିନିଷ ବିଷୟରେ ଚିନ୍ତା କରୁନାହୁଁ ।

ଅକ୍ଟୋବର ୬ ରେ ଟି-୨୦ ବିଶ୍ୱକପ ପାଇଁ ଟିମ୍ ଇଣ୍ଡିଆ ଅଷ୍ଟ୍ରେଲିଆରେ ପହଞ୍ଚିଥିଲା । ଏଠାକୁ ଆସି ଭାରତ ପ୍ରଥମେ ପଶ୍ଚିମ ଅଷ୍ଟ୍ରେଲିଆ ବିପକ୍ଷରେ ଦୁଇଟି ଅଭ୍ୟାସ ମ୍ୟାଚ୍ ଖେଳିଥିଲା । ଏହି ଦୁଇଟି ମ୍ୟାଚ୍ ପର୍ଥରେ ଖେଳାଯାଇଥିଲା, ତେଣୁ ଭାରତ ଏହି ସ୍ଥାନର ସ୍ଥିତି ବିଷୟରେ ଅବଗତ ଅଛି । ଏଭଳି ପରିସ୍ଥିତିରେ ଭାରତ ଦକ୍ଷିଣ ଆଫ୍ରିକା ବିପକ୍ଷରେ ଅଧିକ ସମସ୍ୟାର ସମ୍ମୁଖୀନ ହେବ ନାହିଁ । ବିକ୍ରମ ରାଠୋର ଏହା ବିଷୟରେ କହିଛନ୍ତି ଯେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ ଗୁରୁତ୍ୱପୂର୍ଣ୍ଣ ହେବ ବୋଲି ଦଳ ଜାଣିଥିଲା, ଯେଉଁଥିପାଇଁ ଦଳ ପର୍ଥରେ ଅଭ୍ୟାସ କରିବାକୁ ନିଷ୍ପତ୍ତି ନେଇଥିଲା ।

ସେ ଆହୁରି ମଧ୍ୟ କହିଛନ୍ତି, ‘ଆମେ ପର୍ଥରେ ଏକ ସପ୍ତାହ ରହିବାର ଲାଭ ପାଇବୁ, ସେଥିପାଇଁ ପ୍ରଥମେ ପର୍ଥକୁ ଅଭ୍ୟାସ କରିବାକୁ ନିଷ୍ପତ୍ତି ନିଆଯାଇଥିଲା । ଆମେ ଜାଣିଥିଲୁ ଏହା ଆମ ପାଇଁ ଏକ ଗୁରୁତ୍ୱପୂର୍ଣ୍ଣ ମ୍ୟାଚ୍ ହେବ । ଏହି କାରଣରୁ ଆମେ ପର୍ଥକୁ ଆସିଥିଲୁ ଓ ଏଠାକୁ ଆସିବା ପରେ ଆମେ ଅଭ୍ୟାସ କରିଥିଲୁ । ଏହା ଆମକୁ ସାହାଯ୍ୟ କରିବ । ଆମ ପାଖରେ ଯେଉଁ ପ୍ରକାର ଦଳ ଅଛି, ତାହା ଦେଖି ଲାଗୁନାହିଁ ଯେ ଦ୍ରୁତ ବୋଲରଙ୍କ ସହିତ ଆମର କୌଣସି ଅସୁବିଧା ହେବ ।