ମୋର୍ବି ବ୍ରିଜ୍ ଦୁର୍ଘଟଣାର ନୂଆ ଖୁଲାସା, ୨ କୋଟିର କାମକୁ ମାତ୍ର ୧୨ଲକ୍ଷ ଟଙ୍କାରେ ସାରି ଦିଆଯାଇଥିଲା

ଅହମ୍ମଦାବାଦ : (ସଂକେତ୍ ଟିଭି) ଗୁଜୁରାଟର ମୋର୍ବିରେ ହୋଇଥିବା ବ୍ରିଜ ଦୁର୍ଘଟଣାର ତଦନ୍ତରେ ଦିନକୁ ଦିନ ନୂଆ ଖୁଲାସା କରାଯାଉଛି । ବର୍ତ୍ତମାନ ଏହା ସାମ୍ନାକୁ ଆସିଛି ଯେ ଓରେୱା ବ୍ରିଜର ମରାମତି ପାଇଁ ୨ କୋଟି ଟଙ୍କା ମିଳିଥିଲା । କମ୍ପାନୀ ଏହାର ମାତ୍ର ୬% ଅର୍ଥାତ୍ ୧୨ ଲକ୍ଷ ଟଙ୍କା ଖର୍ଚ୍ଚ କରିଥିଲା । ୬ ମାସର ମରାମତି ପରେ ଏହି ସେତୁ ଜନସାଧାରଣଙ୍କ ପାଇଁ ଖୋଲା ଯାଇଥିଲା ।

ମାର୍ଚ୍ଚ ୨୦୨୨ରେ ମୋର୍ବି ବ୍ରିଜର ରକ୍ଷଣାବେକ୍ଷଣ ପାଇଁ ଓରେଭା ୧୫ ବର୍ଷର ଚୁକ୍ତି ପାଇଥିଲା । ପୋଲର ମରାମତି ପାଇଁ ଖର୍ଚ୍ଚ କରାଯାଇଥିବା ଅର୍ଥର ହିସାବ ସବ୍‌କଣ୍ଟ୍ରାକ୍ଟର ଦେବପ୍ରକାଶ ସଲ୍ୟୁସନ୍ ଫାର୍ମରୁ ଜବତ କରାଯାଇଛି । କାର୍ଯ୍ୟ ସମାପ୍ତ ହେବା ପରେ ଅକ୍ଟୋବର ୨୪ରେ, ଓରେୱା ଗ୍ରୁପ୍ ଚେୟାରମ୍ୟାନ୍ ଜୟସୁଖ ପଟେଲ ଏବଂ ତାଙ୍କ ପରିବାର ବ୍ରିଜ୍ ଉପରେ ଚାଲିବା ଭଳି ଏକମାତ୍ର ଫିଟନେସ୍‌ ପରୀକ୍ଷା ପରେ ସର୍ବସାଧାରଣଙ୍କ ପାଇଁ ଖୋଲାଯାଇଥିଲା । ସେତୁ ମରାମତି ପାଇଁ ଓରେଭା ଦାୟିତ୍ୱ ଦେଇଥିବା ଧ୍ରାଙ୍ଗଧର ଫାର୍ମର ବୈଷୟିକ ଜ୍ଞାନ ପର୍ଯ୍ୟାପ୍ତ ନୁହେଁ ।

ଫୋରେନସିକ୍‌ ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ବ୍ରିଜର ୪ଟି କେବୁଲ୍ ବହୁତ ପୁରୁଣା ଥିଲା । ସେଥିରେ କଳଙ୍କି ଲାଗିଯାଇଥିଲା । ମରାମତି ସମୟରେ କେବୁଲର ଓଏଲିଂ କିମ୍ବା ଗିରସିଂ ଭଳି କାର୍ଯ୍ୟ ମଧ୍ୟ କରାଯାଇନଥିଲା । ସେତୁର କାଠ ମୂଳକୁ କାଢ଼ି ଦିଆଯାଇ ଚାରି ସ୍ତରୀୟ ଆଲୁମିନିୟମ୍ ସିଟ୍‌ ଲଗାଯାଇଥିଲା । ଏହା ସେତୁର ଓଜନ ବଢ଼ାଇଥିଲା । ପୁରୁଣା କେବୁଲଗୁଡିକ ଏହି ଭାର ସମ୍ଭାଳି ପାରିଲା ନାହିଁ ଏବଂ ଭିଡ଼ ବଢ଼ିବାରୁ ପୋଲଟି ଭାରସାମ୍ୟ ହରାଇ ଭାଙ୍ଗି ଯାଇଥିଲା ।

ଷ୍ଟ୍ରକଚରାଲ୍‌ ଇଞ୍ଜିନିୟର ମାନଙ୍କର ଅନୁସନ୍ଧାନରୁ ଜଣାପଡିଛି ଯେ ଏହି ସମୟ ମଧ୍ୟରେ କେବୁଲ୍ ଧରିଥିବା ଆଙ୍କର୍ ପିନ୍‌ର ଶକ୍ତିକୁ ବିଚାରକୁ ନିଆଯାଇ ନାହିଁ । ଭାର ହେତୁ ସେତୁର ଦରବାରଗଡରେ ଶେଷ ଭାଗରେ ଥିବା ଆଙ୍କର୍ ପିନ୍‌ ଉପରକୁ ଉଠିଗଲା ଏବଂ ବ୍ରିଜ୍ ଗୋଟିଏ ପାର୍ଶ୍ୱକୁ ଯାଇ ନଦୀରେ ଭୁଶୁଡ଼ି ପଡ଼ିଥିଲା । ଆଙ୍କର୍ ପିନ୍‌ରେ କେବଳ ୧୨୫ ଲୋକଙ୍କର କ୍ଷମତା ବହନ କରିବାର କ୍ଷମତା ଥିଲା । କିନ୍ତୁ ସେତୁ ଉପରେ ୩୫୦ରୁ ଅଧିକ ଲୋକଙ୍କ ଭିଡ଼ ଲାଗିବାରୁ ପିନ୍ ଭାଙ୍ଗି ପୋଲଟି ଭୁଶୁଡ଼ି ପଡ଼ିଥିଲା ।