୨୦୨୪ରେ ମୋଦିଙ୍କୁ ପରାଜିତ କରିବ କଂଗ୍ରେସ : ମଣି ଶଙ୍କର ଆୟାର

ନୂଆଦିଲ୍ଲୀ : (ସଂକେତ୍ ଟିଭି) ଭାରତ ଯୋଡୋ ଯାତ୍ରାର ଉଦ୍ଦେଶ୍ୟ ରାଜନୈତିକ ନୁହେଁ। ଲକ୍ଷ ଲକ୍ଷ ଲୋକ ଆସୁଛନ୍ତି। ଏହାକୁ ଦେଖି ଭାଜପା ଭୟଭୀତ ହେବାରେ ଲାଗିଛି। ଯେତେବେଳେ ଯାତ୍ରା ସମାପ୍ତ ହେବ ସେତେବେଳେ ରାଜନୈତିକ ଉଷ୍ଣତା ବୃଦ୍ଧି ପାଇବ। ୨୦୨୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପରାଜିତ କରାଯାଇପାରିବ । ଭାଜପାକୁ ଟାର୍ଗେଟ କରି ଏହା କହିଛନ୍ତି କଂଗ୍ରେସର ବରିଷ୍ଠ ନେତା ମଣି ଶଙ୍କର ଆୟାର ।

ଏକ ସାକ୍ଷାତକାରରେ ସେ କହିଛନ୍ତି ଯେ ରାହୁଲଙ୍କ ଟି-ଶର୍ଟ ଏବଂ ଦାଢ଼ି ବିଷୟରେ ସେ କଥାବାର୍ତ୍ତା କରୁଥିବା ଭାଜପା ଆଉ କୌଣସି ପ୍ରସଙ୍ଗ ନଥିବା ପରି ମନେ ହେଉଛି। ଏହା ସହିତ ଅଖିଳେଶ ଯାଦବ ଏବଂ ଜୟନ୍ତ ଚୌଧୁରୀ ଉତ୍ତରପ୍ରଦେଶରେ ଭାରତ ଯୋଡୋ ଯାତ୍ରାରେ ସାମିଲ ହେବା ନେଇ ଦେଇଥିବା ମନ୍ତବ୍ୟକୁ କଟାକ୍ଷ କରି ସେ କହିଛନ୍ତ ବିରୋଧୀଦଳର ନେତା ନ ଆସିବା ଦ୍ୱାରା କିଛି ଫରକ ପଡ଼ିବ ନାହିଁ। ଯିଏ ଆସିବ ସେମାନଙ୍କୁ ସ୍ବାଗତ।

ଉତ୍ତରପ୍ରଦେଶର ବିରୋଧୀ ଦଳ ରାହୁଲ ଗାନ୍ଧୀଙ୍କ ନେତୃତ୍ୱରେ କଂଗ୍ରେସର ଭାରତ ଯୋଡୋ ଯାତ୍ରାଠାରୁ ଦୂରରେ ରହିବେ। କିନ୍ତୁ ଜମ୍ମୁ-କଶ୍ମୀରରେ ଏହି ଯାତ୍ରାରେ ବିରୋଧୀ ଦଳ ଅଂଶଗ୍ରହଣ କରିବେ। ତିନିଜଣ ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା ଏବଂ ନ୍ୟାଶନାଲ କନଫରେନ୍ସର ଓମାର ଅବଦୁଲ୍ଲାଙ୍କ ବ୍ୟତୀତ ପିପୁଲ୍ସ ଡେମୋକ୍ରାଟ ପାର୍ଟି ମୁଖ୍ୟ ମେହବୁବା ମୁଫତି ଟୁଇଟ କରି ଏହି ପଦଯାତ୍ରାରେ ତାଙ୍କର ଅଂଶଗ୍ରହଣକୁ ନିଶ୍ଚିତ କରିଛନ୍ତି। ଗୁପକର ଆଲାଇନ୍ସର ଅନ୍ୟ ଜଣେ ସଦସ୍ୟ, ସିପିଆଇର ଏମଓ୍ବାଇ ତାରିଗାମି ମଧ୍ୟ ଏଥିରେ ଅଂଶଗ୍ରହଣ କରିବେ।

ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫତି ଟୁଇଟ କରି କହିଛନ୍ତି ଯେ କଶ୍ମୀରରେ ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରାରେ ଯୋଗଦେବାକୁ ମୋତେ ଆନୁଷ୍ଠାନିକ ଭାବେ ନିମନ୍ତ୍ରଣ କରାଯାଇଛି। ସେମାନଙ୍କର ଅଦମ୍ୟ ସାହସକୁ ମୁଁ ସଲାମ କରୁଛି। ମୁଁ ବିଶ୍ୱାସ କରେ ଯେଉଁମାନେ ଫାସିଷ୍ଟ ଶକ୍ତିକୁ ଚ୍ୟାଲେଞ୍ଜ କରିବାକୁ ସାହସ କରନ୍ତି ସେମାନଙ୍କ ସହିତ ଠିଆ ହେବା ମୋର କର୍ତ୍ତବ୍ୟ। ଏକ ଉନ୍ନତ ଭାରତ ଗଠନ ଦିଗରେ ସେମାନଙ୍କ ପଦଯାତ୍ରାରେ ମୁଁ ଯୋଗଦେବି।