ଚନ୍ଦ୍ରଯାନ-୩ର କାୟୋଜେନିକ୍ ଇଞ୍ଜିନର ସଫଳ ପରୀକ୍ଷଣ କଲା ଇସ୍ରୋ
ନୂଆଦିଲ୍ଲୀ : (ସଂକେତ ଟିଭି) ଚଳିତ ବର୍ଷ ଲଞ୍ଚ ହେବାକୁ ଥିବା ମୁନ୍ ମିଶନ ଚନ୍ଦ୍ରଯାନ-୩ ପାଇଁ ପ୍ରକ୍ଷେପଣ ଯାନର ସିଇ-୨୦ କ୍ରାୟୋଜେନିକ୍ ଇଞ୍ଜିନ୍ର ସଫଳତାପୂର୍ବକ ପରୀକ୍ଷଣ କରାଯାଇଛି। ଭାରତୀୟ ଅନ୍ତରୀକ୍ଷ ଅନୁସନ୍ଧାନ (ଇସ୍ରୋ) ପକ୍ଷରୁ ଏହି ପରୀକ୍ଷଣ କରାଯ଼ାଇଥିଲା ।
ସୂଚନା ଅନୁସାରେ, ଚନ୍ଦ୍ରଯାନ-୩ ଭାରତର ତୃତୀୟ ଚନ୍ଦ୍ର ଅଭିଯାନ। ଏହାର ଉଦ୍ଦେଶ୍ୟ ଚନ୍ଦ୍ର ପୃଷ୍ଠରେ ସୁରକ୍ଷିତ ଭାବରେ ଲ୍ୟାଣ୍ଡିଂ ଏବଂ ରୋଭର ଦ୍ବାରା ନମୁନା ସଂଗ୍ରହ କରିବା। ଚଳିତ ବର୍ଷ ଜୁନ୍ ମାସରେ ଏହାକୁ ମହାକାଶକୁ ପଠାଇବା ନେଇ ଯୋଜନା ରହିଛି। ଚନ୍ଦ୍ରଯାନ-୩ କୁ ଆନ୍ଧ୍ରପ୍ରଦେଶର ଶ୍ରୀହରିକୋଟା ସ୍ଥିତ ସତୀଶ ଧବନ ଅନ୍ତରୀକ୍ଷ କେନ୍ଦ୍ରରୁ ଲଞ୍ଚ ଯାନ ମାର୍କ-୩ ଦ୍ବାରା ଚନ୍ଦ୍ରକୁ ପଠାଯିବ।
ତେବେ ଏହି କ୍ରାୟୋଜେନିକ୍ ଇଞ୍ଜିନ୍ ପରୀକ୍ଷଣକୁ ନେଇ ଇସ୍ରୋ ଅଧିକାରୀ କହିଛନ୍ତି ଯେ, ୨୪ ଫେବୃଆରୀରେ ତାମିଲନାଡୁର ମହେନ୍ଦ୍ରଗିରିରେ ଇସ୍ରୋ ପ୍ରୋପଲ୍ସନ କମ୍ପେ୍ଲକ୍ସର ହାଇ ଆଲଟିଟ୍ୟୁଡ୍ ଟେଷ୍ଟ ଫେସିଲିଟିରେ ୨୫ ସେକେଣ୍ଡର ନିର୍ଦ୍ଧାରିତ ସମୟ ପାଇଁ ପରୀକ୍ଷଣ କରାଯାଇଥିଲା। ଯାହାର ପରୀକ୍ଷଣ ସଫଳ ହୋଇଛି।
ଏହା ପୂର୍ବରୁ ଇସ୍ରୋ ଚନ୍ଦ୍ରଯାନ-୩ର ଲ୍ୟାଣ୍ଡରର ସଫଳତାପୂର୍ବକ ପରୀକ୍ଷଣ କରିଥିଲା। ଇସ୍ରୋ କହିଥିଲା ଯେ ଉପଗ୍ରହ ମିଶନ ପାଇଁ ଇଏମଆଇ/ଇଏମସି ପରୀକ୍ଷଣ ଅନ୍ତରୀକ୍ଷର ବାତାବରଣରେ ଉପଗ୍ରହ ପ୍ରଣାଳୀ କାର୍ଯ୍ୟକ୍ଷମତା ଏବଂ ଅପେକ୍ଷିତ ବିଦ୍ୟୁତ୍ ଚୁମ୍ବକୀୟ ସ୍ତର କୁ ସୁନିଶ୍ଚିତ କରିବା ପାଇଁ କରାଯାଇଥାଏ।
