ଉଦ୍ଧବ ଠାକରେ ସରକାରଙ୍କୁ ହଟାଇବାକୁ ଦୁଇ ବର୍ଷ ମଧ୍ୟରେ ହୋଇଥିଲା ୧୫୦ ବୈଠକ
ମୁମ୍ବାଇ : (ସଂକେତ୍ ଟିଭି) ଉଦ୍ଧବ ଠାକରେଙ୍କ ନେତୃତ୍ୱରେ ଶିବସେନା-ଏନସିପି-କଂଗ୍ରେସ ମିଳିତ ସରକାର ପତନ ପାଇଁ ଦୁଇ ବର୍ଷରେ ୧୦୦ ରୁ ୧୫୦ ବୈଠକ କରିଥିଲୁ । ଏହି ବିବୃତ୍ତି ରଖିଛନ୍ତି ମହାରାଷ୍ଟ୍ର କ୍ୟାବିନେଟ ମନ୍ତ୍ରୀ ତାନାଜୀ ସାୱନ୍ତ ।
ତାନାଜୀ ସାୱନ୍ତ ଧରାସିଭରେ ଏକ ସାଧାରଣ ସଭାରେ କହିଛନ୍ତି ଯେ, ;ଆମର ଏବଂ ଦେବେନ୍ଦ୍ର ଫଡନାଭିସ୍ ଜୀଙ୍କର ବୈଠକ ହୋଇଥିଲା। ମୁଁ ଏବଂ ବର୍ତ୍ତମାନର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଦୁଇ ବର୍ଷରେ ୧୦୦ ରୁ ୧୫୦ ବୈଠକ କରିଥିଲୁ। ଏହାପରେ ଦେବେନ୍ଦ୍ର ଫଡନାଭିସଙ୍କ ନିର୍ଦ୍ଦେଶରେ ଶିବସେନା ଏବଂ ବିଜେପି ଧରାସିଭ ଜିଲ୍ଲା ପରିଷଦ ନିର୍ବାଚନରେ ଏକାଠି ପ୍ରତିଦ୍ୱନ୍ଦ୍ୱୀତା କରିଥିଲେ ଏବଂ ଏଠାରୁ ମିଳିତ ମଞ୍ଚ ଆରମ୍ଭ ହୋଇଥିଲା।
ସାୱନ୍ତ କହିଛନ୍ତି ଯେ, ସେ ହିଁ ପ୍ରଥମେ ଯାଇ ମାତୋଶ୍ରୀରେ ବିଦ୍ରୋହର ବିଗୁଲ ବଜାଇଥିଲେ। ସାୱନ୍ତ ଏହା ମଧ୍ୟ କହିଛନ୍ତି ଯେ କଂଗ୍ରେସ ଏବଂ ଏନସିପି ସହିତ ସରକାର ଗଠନ କରିବା ରାଜ୍ୟର ୧୨ କୋଟି ଲୋକଙ୍କ ପ୍ରତି ଅପମାନ। ଯେଉଁମାନେ ଶିବସେନା-ବିଜେପି ମିଳିତ ମଞ୍ଚ ପାଇଁ ଦେଇଥିଲେ ଭୋଟ୍ ।
ତାନାଜୀ ସାୱନ୍ତଙ୍କ ବିବୃତ୍ତି ଉପରେ ପ୍ରତିକ୍ରିୟା ପ୍ରକାଶ କରି ଶିବସେନା ନେତା ତଥା ମହାରାଷ୍ଟ୍ର ବିଧାନ ପରିଷଦରେ ବିରୋଧୀ ଦଳର ନେତା ଅମ୍ବାଦାସ ଦାନଭେ କହିଛନ୍ତି ଯେ ବିଦ୍ରୋହର ମଞ୍ଜି ସିନ୍ଦେ ବିଧାୟକଙ୍କ ମନରେ ଅଛି। ବିଦ୍ରୋହୀ ବିଧାୟକମାନେ ଅଭିଯୋଗ କରିଛନ୍ତି ଯେ ଠାକରେ ଦଳର ବିଧାୟକଙ୍କୁ ଭେଟନ୍ତି ନାହିଁ ଏବଂ ମନ୍ତ୍ରୀ ତଥା ବିଧାୟକମାନଙ୍କୁ ଫଣ୍ଡ୍ ମିଳୁ ନାହିଁ, ଏଥିରୁ ସ୍ପଷ୍ଟ ଯେ ତାଙ୍କ ଖାଲି ବାହାନା ଥିଲା।
ଜୁନ୍ ୨୦୨୨ରେ ଏକନାଥ ସିନ୍ଦେଙ୍କ ନେତୃତ୍ୱରେ ଶିବସେନା ବିଧାୟକମାନେ ବିଦ୍ରୋହ କରିଥିଲେ, ଯେଉଁଥିପାଇଁ ଉଦ୍ଧବ ଠାକରେଙ୍କ ନେତୃତ୍ୱରେ ଶିବସେନା-ଏନସିପି-କଂଗ୍ରେସ ମିଳିତ ସରକାର ପତନ ହୋଇଥିଲା। ଏହା ପରେ ଏକନାଥ ସିନ୍ଦେଙ୍କ ନେତୃତ୍ୱରେ ଶିବସେନା ଏବଂ ବିଜେପିର ମିଳିତ ମଞ୍ଚରେ ଦେବେନ୍ଦ୍ର ଫଡନାଭିସ୍ ଉପମୁଖ୍ୟମନ୍ତ୍ରୀ ଭାବରେ ଏକ ନୂତନ ସରକାର ଗଠନ କରିଥିଲେ।
