୪୦୦ କୋଟି ଟଙ୍କାର ହେରୋଇନ ଜବତ, ୪ ଗିରଫ

ଚଣ୍ଡିଗଡ (ସଂକେତ ଟିଭି) ପଞ୍ଜାବ ପୋଲିସର ଗୁଇନ୍ଦା ୟୁନିଟ୍ ଦୁଇଟି ଭିନ୍ନଭିନ୍ନ ଅପରେସନ ଚଳାଇ ପ୍ରାୟ ୭୭ କେଜି ହେରୋଇନ ଜବତ କରିଛି । ଅନ୍ତର୍ଜାତୀୟ ବଜାରରେ ଏହି ଡ୍ରଗ୍ସର ମୂଲ୍ୟ ପ୍ରାୟ ୪୦୦ କୋଟି ଟଙ୍କା ହେବ । ଏହି ଘଟଣାରେ ୪ ଜଣଙ୍କୁ ଗିରଫ କରାଯାଇଛି । ସେମାନଙ୍କ ନିକଟରୁ ହେରୋଇନ ସହ ୩ଟି ପିସ୍ତଲ ଜବତ କରାଯାଇଛି ।

ସୂଚନା ଅନୁସାରେ, ପଞ୍ଜାବର ଫିରୋଜପୁର ଅଞ୍ଚଳରୁ ଏହି ହେରୋଇନ ଜବତ ହୋଇଛି । ଏନେଇ ଡିଜିପି ଗୌରବ ଯାଦବ ଟ୍ବିଟ୍ କରିଛନ୍ତି ଯେ, ୪ ଜଣ ଡ୍ରଗ୍ସ ମାଫିଆଙ୍କ ସମେତ ୭୭ କେଜିର ହେରୋଇନ ଜବତ କରାଯାଇଛି । ଦୁଇଟି ଅପରେସନର ଯଥାକ୍ରମେ ୪୧ କେଜି ଓ ୩୬ କେଜି ହେରୋଇନ ଜବତ ହୋଇଛି । ଚାଲାଣକାରୀଙ୍କ ଠାରୁ ୩ଟି ପିସ୍ତଲ ଜବତ ହୋଇଛି । ଏହି ମଡ୍ୟୁଲ ପଞ୍ଜାବରେ ସୀମା ପାର ଏବଂ ଆନ୍ତଃରାଜ୍ୟ ଡ୍ରଗ୍ସ କାରବାରରେ ବେଶ୍ ସକ୍ରିୟ ଥିଲା ।

ଏହି ଗ୍ୟାଙ୍ଗ୍‌ ସୀମାନ୍ତରେ ହେରୋଇନ ଚୋରା ଚାଲାଣରେ ଜଡ଼ିତ ଥିଲା । ଏହାପରେ ପଞ୍ଜାବ ଏବଂ ଅନ୍ୟ ରାଜ୍ୟରେ ଏହି ଚୋରା ଚାଲାଣ କରୁଥିଲା । ଅଭିଯୁକ୍ତଙ୍କ ବିରୋଧରେ ଏନ୍‌ଡିପିଏସ୍‌ ଆକ୍ଟରେ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି । ଏହି ରାକେଟ୍‌ରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବାକୁ ପୋଲିସ ଖୋଳତାଡ କରୁଛି ।