FeaturedGeneralLatest

ସ୍ତ୍ରୀଙ୍କୁ ମାରପିଟ୍ କରୁଥିବା ନେଇ ମୋଟିଭେସନାଲ ସ୍ପିକର ବିବେକ ବିନ୍ଦ୍ରାଙ୍କ ନାମରେ ମାମଲା ରୁଜୁ

ନୂଆଦିଲ୍ଲୀ (ସଂକେତ ଟିଭି) ମୋଟିଭେସନାଲ ସ୍ପିକର୍‌ ତଥା ବିଜନେଶ ଗୁରୁ ଭାବେ ପରିଚିତ ବିବେକ ବିନ୍ଦ୍ରାଙ୍କ ବିରୋଧରେ ଘରୋଇ ହିଂସାର ଅଭିଯୋଗ ଆସିଛି । ବିବାହର ମାସେ ନ ପୁରୁଣୁ ସେ ସ୍ତ୍ରୀ ୟାନିକାଙ୍କୁ ମାର୍‌ପିଟ ସହ ନିର୍ଯାତନା ଦେଉଥିବା ନେଇ ନୋଏଡାର ସେକ୍ଟର ୧୨୬ ଥାନାରେ ଅଭିଯୋଗ ହୋଇଛି। ବିବେକଙ୍କ ଶଳା ଏହି ଅଭିଯୋଗ କରିଛନ୍ତି। ନୋଏଡା ପୋଲିସ ତାଙ୍କ ନାମରେ ଘରୋଇ ହିଂସା ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ସୂଚନା ଅନୁସାରେ, ଡିସେମ୍ବର ୬ରେ ବିବେକ ଗାଜିଆବାଦ(ୟୁପି)ର ୟାନିକାଙ୍କୁ ଦିଲ୍ଲୀର ଲଳିତ ହୋଟେଲରେ ବିବାହ କରିଥିଲେ। ବିବାହ ପରେ ନବବିବାହିତ ଯୋଡ଼ି ନୋଏଡାର ସେକ୍ଟର ୯୪ରେ ଥିବା ସୁପରନୋଭା ୱେଷ୍ଟ ରେସିଡେନ୍ସିରେ ରହିବାକୁ ଆସିଥିଲେ। ବିବାହ ପରଦିନ ଅର୍ଥାତ ଡିସେମ୍ବର ୭ ତାରିଖ ସକାଳେ ବିନ୍ଦ୍ରା ଏବଂ ତାଙ୍କ ମା’ ପ୍ରଭାଙ୍କ ମଧ୍ୟରେ କୌଣସି କାରଣରୁ ପାଟିତୁଣ୍ଡ ହୋଇଥିଲା। ଏହି ସମୟରେ ୟାନିକା ବୁଝାସୁଝା କରିବାକୁ ଯାଇଥିଲେ। କିନ୍ତୁ ବିନ୍ଦ୍ରା ରାଗିଯାଇ ତାଙ୍କୁ ଏକ
କୋଠରୀରେ ବନ୍ଦ କରି ଗାଳି ଦେବା ସହ ମାର୍‌ପିଟ୍‌ କରିଥିଲେ। ଏଥିରେ ତାଙ୍କୁ ଏତେ ଜୋରରେ ଆଘାତ ଲାଗିଛି ଯେ, ସେ ଠିକଭାବେ ଶୁଣିପାରୁ ନାହାନ୍ତି। ୟାନିକାଙ୍କ ମୋବାଇଲ ଫୋନ ମଧ୍ୟ ବିନ୍ଦ୍ରା ଭାଙ୍ଗି ଦେଇଥିବା ଏତଲାରେ ଉଲ୍ଲେଖ ରହିଛି। ତେବେ ବିନ୍ଦ୍ରା ତାଙ୍କ ପତ୍ନୀଙ୍କୁ ବାଡାଉଥିବାର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେଉଛି।

ନୋଏଡା ଥାନା ପୋଲିସ ମାମଲାର ତଦନ୍ତ କରୁଥିବା ବେଳେ ତାଙ୍କ ବିରୋଧରେ IPC ଧାରା ୩୨୩, ୫୦୪, ୪୨୭, ୩୨୫ରେ ମାମଲା ରୁଜୁ ହୋଇଛି ।

ପୋଲିସର କହିବା ମୁତାବକ, ବିବେକଙ୍କ ସ୍ତ୍ରୀ ୟାନିକାଙ୍କ ଭାଇ ବୈଭବ କ୍ୱାତ୍ରା ଥାନାରେ ଏତଲା ଦେଇଛନ୍ତି। ବିବେକ ତାଙ୍କ ଭଉଣୀଙ୍କୁ ନିର୍ଯାତନା ଦେଉଥିବା ସେ ଅଭିଯୋଗରେ ଦର୍ଶାଇଛନ୍ତି। ପ୍ରମାଣସ୍ବରୂପ ସେ କିଛି ଫଟୋ ଏବଂ ଭିଡିଓ ମଧ୍ୟ ପୋଲିସକୁ ଦେଇଛନ୍ତି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

କିଛିଦିନ ପୂର୍ବେ ବିନ୍ଦ୍ରାଙ୍କ ଜାଲିଆତି କରିଥିବା ନେଇ ଥାନାରେ ଅଭିଯୋଗ ହୋଇଥିଲା। ଅନ୍ୟ ଜଣେ ଲୋକପ୍ରିୟ ମୋଟିଭେସନାଲ ସ୍ପିକର୍‌ ତଥା ୟୁଟ୍ୟୁବର୍‌ ସନ୍ଦିପ ମାହେଶ୍ୱରୀ ତାଙ୍କ ବିରୋଧରେ ଜାଲିଆତି ଅଭିଯୋଗ ଆଣିଥିଲେ। କିନ୍ତୁ ବିନ୍ଦ୍ରା ଏହି ଅଭିଯୋଗକୁ ଖଣ୍ଡନ କରିଥିଲେ।