ରାମଚନ୍ଦ୍ର କାଡାମ ହେଲେ କଂଗ୍ରେସ ବିଧାୟକ ଦଳ ନେତା
ଭୁବନେଶ୍ୱର (ସଂକେତ ଟିଭି): କଂଗ୍ରେସ ବିଧାୟକ ଦଳର ନେତା ହେଲେ ରାମଚନ୍ଦ୍ର କାଡ଼ାମ । ଅଖିଳ ଭାରତୀୟ କଂଗ୍ରେସ କମିଟି କୋରାପୁଟ ଜିଲ୍ଲା ପଟ୍ଟାଙ୍ଗୀ ବିଧାୟକ ତଥା ବରିଷ୍ଠ ଆଦିବାସୀ କଂଗ୍ରେସ ନେତା ରାମଚନ୍ଦ୍ର କାଡ଼ାମଙ୍କୁ ବିଧାୟକ ଦଳ ନେତା ଭାବେ ଚୟନ କରିଛି । କଂଗ୍ରେସ ବିଧାୟକ ଦଳ ନେତା ରେସ୍ରେ ତାରା ପ୍ରସାଦ ବାହିନୀପତି ଆଗରେ ଥିବା ଚର୍ଚ୍ଚା ଦୀର୍ଘ ଦିନ ଧରି ହେଉଥିଲା ।
ସେହିପରି ଏଆଇସିସି ବିଧାୟକ ଦଳ ନେତାଙ୍କ ସମେତ ଦଳର ଉପନେତା ଓ ମୁଖ୍ୟ ସଚେତକଙ୍କ ନାଁ ମଧ୍ୟ ଘୋଷଣା କରିଛି । ଭଦ୍ରକ ଜିଲ୍ଲା ବାସୁଦେବପୁର ବିଧାୟକ ଅଶୋକ ଦାସଙ୍କୁ କଂଗ୍ରେସ ବିଧାୟକ ଦଳ ଉପନେତା ଭାବେ ଦାୟିତ୍ୱ ମିଳିଛି । ଅଶୋକ ଦାସ ଯଦିଓ ବିଧାନସଭାରେ ନବାଗତ, ହେଲେ ପୂର୍ବତନ ମୁଖ୍ୟମନ୍ତ୍ରୀ ନୀଳମଣି ରାଉତରାୟଙ୍କ ଅଭେଦ୍ୟ ଗଡ଼ରେ କଂଗ୍ରେସକୁ ପୁଣିଥରେ ଜିତାଇବାରେ ଅଶୋକ ସଫଳ ହେବାରୁ ତାଙ୍କୁ ବିଧାନସଭାରେ ଏକ ପ୍ରମୁଖ ଦାୟିତ୍ବ ମିଳିଥିବା କୁହାଯାଉଛି । ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ବିଧାୟକ ଡଃ ସିଏସ୍ ରାଜନ ଏକ୍କାଙ୍କୁ ବିଧାନସଭାରେ ଦଳର ମୁଖ୍ୟ ସଚେତକ ଭାବେ ନିଯୁକ୍ତି ମିଳିଛି । ଡଃ ରାଜନ ଏକ୍କା 2019 ପରେ ଦ୍ବିତୀୟ ଥର ପାଇଁ ରାଜଗାଙ୍ଗପୁରରୁ ବିଧାୟକ ଭାବେ ନିର୍ବାଚିତ ହୋଇଛନ୍ତି ।
