ସେପ୍ଟେମ୍ବର ୮ରୁ ଆମେରିକା ଗସ୍ତରେ ଯିବେ ରାହୁଲ ଗାନ୍ଧି
ନୂଆଦିଲ୍ଲୀ (ସଂକେତ ଟିଭି): କଂଗ୍ରେସ ନେତା ରାହୁଲ ଗାନ୍ଧି ସେପ୍ଟେମ୍ବର ୮ରୁ ସେପ୍ଟେମ୍ବର ୧୦ ପର୍ଯ୍ୟନ୍ତ ଆମେରିକା ଗସ୍ତରେ ଯିବେ। ଏହି ସମୟରେ ସେ ଛାତ୍ରଛାତ୍ରୀ ଏବଂ ପ୍ରବାସୀ ଭାରତୀୟଙ୍କୁ ସମ୍ବୋଧନ କରିବେ ।
ସେପ୍ଟେମ୍ବର ୮ରେ ରାହୁଲ ଗାନ୍ଧି ଆମେରିକାର ଡାଲାସରେ ରହିବେ। ଡାଲାସରେ ସେ ଟେକ୍ସାସ ବିଶ୍ୱବିଦ୍ୟାଳୟରେ ଛାତ୍ରଛାତ୍ରୀଙ୍କୁ ସମ୍ବୋଧିତ କରିବେ। ସେପ୍ଟେମ୍ବର ୯ ଓ ୧୦ରେ ରାହୁଲ ୱାଶିଂଟନ ଡିସିରେ ରହିବେ। ଡାଲାସରେ ସେ ଭାରତୀୟ ସମ୍ପ୍ରଦାୟର ଲୋକଙ୍କ ସହ କଥା ହେବେ।
ନିକଟରେ ଇଣ୍ଡିଆନ୍ ଓଭରସିଜ୍ କଂଗ୍ରେସ ସଭାପତି ସାମ୍ ପିତ୍ରୋଦା ସୂଚନା ଦେଇଥିଲେ ଯେ ବିରୋଧୀ ଦଳ ନେତା ରାହୁଲ ଗାନ୍ଧୀ ଖୁବ୍ ଶୀଘ୍ର ୩ ଦିନିଆ ଆମେରିକା ଗସ୍ତରେ ଯିବେ। ଆଗକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନ୍ୟୁୟର୍କ ଗସ୍ତରେ ଯିବାକୁ ଥିବାବେଳେ ତା ପୂର୍ବରୁ ରାହୁଲ ଆମେରିକା ଗସ୍ତ କରିବେ ।
ସାମ କହିଥିଲେ ଯେ “ଇଣ୍ଡିଆନ୍ ଓଭରସିଜ୍ କଂଗ୍ରେସର ସଭାପତି ହେବା ପରଠାରୁ ମୋତେ ଭାରତୀୟ ପ୍ରବାସୀ, କୂଟନୀତିଜ୍ଞ, ଶିକ୍ଷାବିତ୍, ବ୍ୟବସାୟୀ, ରାଜନେତା, ଅନ୍ତର୍ଜାତୀୟ ଗଣମାଧ୍ୟମ ଏବଂ ଅନ୍ୟାନ୍ୟ ଲୋକମାନେ ରାହୁଲଙ୍କ ଗସ୍ତ ପାଇଁ ଅନୁରୋଧ କରୁଛନ୍ତି ।“
ଏହା ପୂର୍ବରୁ ଗତବର୍ଷ ଜୁନ୍ରେ ମଧ୍ୟ ଆମେରିକା ଯାଇଥିଲେ ରାହୁଲ ଗାନ୍ଧି । ସେ ସାନ୍ ଫ୍ରାନ୍ସିସ୍କୋରେ ଭାରତୀୟ ଛାତ୍ରଛାତ୍ରୀଙ୍କ ସହ କଥା ହୋଇଥିଲେ ଏବଂ ଏକ ପ୍ରେସ୍ କନ୍ଫେରେନ୍ସକୁ ସମ୍ବୋଧିତ କରିଥିଲେ । ୨୦୨୩ ମାର୍ଚ୍ଚରେ ରାହୁଲ ବ୍ରିଟେନ ଯାତ୍ରା କରିଥିଲେ । ସେଠାରେ ସେ କେମ୍ବ୍ରିଜ୍ ସମେତ ଅନେକ କାର୍ଯ୍ୟକ୍ରମରେ ଭାଗ ନେଇଥିଲେ ।
