ବନ୍ଧୁକରୁ ଫୁଟି ବଲିଉଡ ଅଭିନେତା ଗୋବିନ୍ଦା ଆହତ
ମୁମ୍ବାଇ (ସଂକେତ ଟିଭି): ବଲିଉଡ ଅଭିନେତା ଗୋବିନ୍ଦାଙ୍କ ନିଜ ଲାଇସେନ୍ସପ୍ରାପ୍ତ ବନ୍ଧୁକରୁ ଭୁଲବଶତଃ ଗୁଳି ଫୁଟି ସେ ଆହତ ହୋଇଛନ୍ତି । ତାଙ୍କୁ ମୁମ୍ବାଇର ଏକ ହସ୍ପିଟାଲରେ ଭର୍ତ୍ତି କରାଯାଇଛି । ଏନେଇ ମୁମ୍ବାଇ ପୋଲିସ ପକ୍ଷରୁ ସୂଚନା ଦିଆଯାଇଛି । ଡାକ୍ତର ଗୁଳିଟିକୁ ତାଙ୍କ ଗୋଡରୁ ବାହାର କରି ଦେଇଛନ୍ତି । ବର୍ତ୍ତମାନ ତାଙ୍କ ସ୍ବାସ୍ଥ୍ୟାବସ୍ଥା ଭଲ ରହିଥିବା ଗୋବିନ୍ଦାଙ୍କ ମ୍ୟାନେଜର ଶଶି ସିହ୍ନା ସୂଚନା ଦେଇଛନ୍ତି ।
ସୂଚନା ଅନୁଯାୟୀ, ଆଜି ସକାଳ ୫ଟା ସମୟରେ ଗୋବିନ୍ଦା କୋଲକାତା ଯିବା ପାଇଁ ବାହାରୁଥିଲେ । ଏହି ସମୟରେ ସେ ଲାଇସେନ୍ସପ୍ରାପ୍ତ ବନ୍ଧୁକ ସଫା କରୁଥିବା ସମୟରେ ଭୁଲବଶତଃ ହାତ ବାଜି ଗୁଳି ଫୁଟିଯାଇଥିଲା । ଫଳରେ ତାଙ୍କ ଗୋଡରେ ଗୁଳି ବାଜିଥିଲା । ଏହି ଘଟଣା ପରେ ଅଭିନେତା ଗୋବିନ୍ଦାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି । ପୋଲିସ ଘଟଣାର ତଦନ୍ତ ଜାରି ରଖିଛି ।
ଗୋବିନ୍ଦାଙ୍କ ମ୍ୟାନେଜର ଶଶି ସିହ୍ନା କହିଛନ୍ତି, ”ଅଭିନେତା ତଥା ଶିବସେନା ନେତା ଗୋବିନ୍ଦା ଆଜି ସକାଳେ କୋଲକାତା ଯିବାକୁ ବାହାରୁଥିଲେ । ଏହି ସମୟରେ ସେ ସେ ବନ୍ଧୁକ ଧରିଥିବା ବେଳେ ଏହା ହାତରୁ ଖସି ପଡିବାରୁ ଗୁଳି ଫୁଟିଥିଲା । ତାଙ୍କ ଗୋଡରେ ଗୁଳି ବାଜିବାରୁ ତାଙ୍କୁ ସଙ୍ଗେ ସଙ୍ଗେ ହସ୍ପିଟାଲରେ ଭର୍ତ୍ତି କରାଯାଇଥିଲା । ଡାକ୍ତର ଗୁଳିଟିକୁ ଗୋଡରୁ ବାହର କରି ଦେଇଛନ୍ତି । ବର୍ତ୍ତମାନ ତାଙ୍କ ଅବସ୍ଥା ସ୍ଥିର ରହିଛି । ସେ ବର୍ତ୍ତମାନ ଡାକ୍ତରଖାନାରେ ଅଛନ୍ତି ।”
