ଅଷ୍ଟମ ବେତନ କମିଶନକୁ ମିଳିଲା କ୍ୟାବିନେଟ୍ ମଞ୍ଜୁରୀ
ନୂଆଦିଲ୍ଲୀ (ସଂକେତ ଟିଭି): କେନ୍ଦ୍ର ସରକାର ଗୁରୁବାର ଅଷ୍ଟମ ବେତନ କମିଶନ ଘୋଷଣା କରିଛନ୍ତି। କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ଦ୍ୱାରା କର୍ମଚାରୀଙ୍କ ଦରମା ଏବଂ ପେନସନଭୋଗୀଙ୍କ ପେନସନ ବୃଦ୍ଧି ହେବ। ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ଯକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଅଷ୍ଟମ ବେତନ କମିଶନକୁ ମଞ୍ଜୁରୀ ମିଳିଛି। ଅଷ୍ଟମ ବେତନ କମିଶନକୁ ମଞ୍ଜୁରୀ ମିଳିବା ଫଳରେ ପ୍ରାୟ ଏକ କୋଟିରୁ ଅଧିକ ଲୋକ ଉପକୃତ ହେବେ ।
ଏନେଇ ସୂଚନା ଦେଇ ସୂଚନା ଏବଂ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ସପ୍ତମ ବେତନ କମିଶନ ୨୦୧୬ରେ ଗଠିତ ହୋଇଥିଲା ଏବଂ ଏହାର କାର୍ଯ୍ୟକାଳ ୨୦୨୬ରେ ଶେଷ ହେବ। ଅଷ୍ଟମ ବେତନ କମିଶନ ଏହାର ରିପୋର୍ଟ ଦାଖଲ କରିବା ପୂର୍ବରୁ ରାଜ୍ୟ ସରକାର, ସରକାରୀ କମ୍ପାନୀ ଇତ୍ୟାଦିଙ୍କ ସହିତ ଆଲୋଚନା କରିବ। ସରକାର ଖୁବଶୀଘ୍ର ଅଷ୍ଟମ ବେତନ କମିଶନର ଅଧ୍ୟକ୍ଷ ଏବଂ ଦୁଇ ସଦସ୍ୟଙ୍କ ନାମ ଘୋଷଣା କରିବେ। ଏହା ବିଶ୍ୱାସ କରାଯାଉଛି ଯେ ୮ମ ବେତନ କମିଶନ ଜାନୁଆରୀ ୨୦୨୬ ରୁ ଲାଗୁ କରାଯାଇପାରେ। କାରଣ ସପ୍ତମ ବେତନ କମିଶନର ସମୟ ସୀମା ଜାନୁଆରୀରେ ହିଁ ଶେଷ ହୋଇଯିବ। ଏହା ପୂର୍ବରୁ ସମସ୍ତ ଅଂଶୀଦାର ଏବଂ ସରକାରଙ୍କ ସହିତ ପରାମର୍ଶ କରାଯିବ।
ସରକାରଙ୍କ ଏହି ପଦକ୍ଷେପକୁ ଅପେକ୍ଷା କରିଥିଲେ ଏକ କୋଟିରୁ ଅଧିକ କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀ। କମିଶନ ଗଠନ ଦ୍ୱାରା ସେମାନଙ୍କର ମୂଳ ଦରମା, ଭତ୍ତା, ପେନସନ ଏବଂ ଅନ୍ୟାନ୍ୟ ସୁବିଧା ସଂଶୋଧନ କରିବାରେ ସାହାଯ୍ୟ ମିଳିବ। ଆଜି ଅଷ୍ଟମ ବେତନ କମିଶନ ନେଇ ଘୋଷଣା କରିବା ସମୟରେ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ୨୦୨୬ ସୁଦ୍ଧା ଅଷ୍ଟମ ବେତନ କମିଶନ ଗଠନ କରାଯିବ। ସେ ଆହୁରି ମଧ୍ୟ କହିଛନ୍ତି ଯେ ସପ୍ତମ ବେତନ କମିଶନର ସମସ୍ତ ସୁପାରିଶଗୁଡ଼ିକ ପୂର୍ବରୁ କାର୍ଯ୍ୟକାରୀ ହୋଇସାରିଛି।
ସରକାର ଅଷ୍ଟମ ମେତନ କମିଶନର ସଦସ୍ୟଙ୍କ ସମେତ ଅନ୍ୟାନ୍ୟ ବିବରଣୀ ବିଷୟରେ ପରେ ସୂଚନା ଦେବେ। ସପ୍ତମ ବେତନ କମିଶନ କେନ୍ଦ୍ର ସରକାରୀ କର୍ମଚାରୀଙ୍କ ଦରମା ଗଠନ, ଭତ୍ତା ଏବଂ ପେନସନରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିଛି। ଯାହା ଦରମା ସମାନତା ସୁନିଶ୍ଚିତ କରିଥିଲା ଏବଂ ସକ୍ରିୟ କର୍ମଚାରୀ ଏବଂ ଅବସରପ୍ରାପ୍ତ ପେନସନଭୋଗୀ ଉଭୟଙ୍କୁ ଲାଭ ଦେଇଥିଲା। ଏହା ପରେ, ୮ମ କେନ୍ଦ୍ରୀୟ ବେତନ ଆୟୋଗ ଗଠନ ହେବାକୁ ଯାଉଛି।
ପାରମ୍ପରିକ ଭାବରେ, କେନ୍ଦ୍ର ସରକାରୀ କର୍ମଚାରୀଙ୍କ ଦରମା, ଭତ୍ତା ଏବଂ ସୁବିଧା ସମୀକ୍ଷା ଏବଂ ପରିବର୍ତ୍ତନ ସୁପାରିଶ କରିବା ପାଇଁ ପ୍ରତି ୧୦ ବର୍ଷରେ କେନ୍ଦ୍ରୀୟ ବେତନ କମିଶନ ଗଠନ କରିଥାନ୍ତି। ଏହି କମିଶନ ମୁଦ୍ରାସ୍ଫୀତି ଏବଂ ଆର୍ଥିକ ପରିସ୍ଥିତି ଭଳି କାରଣଗୁଡ଼ିକୁ ଧ୍ୟାନରେ ରଖି ନିଷ୍ପତ୍ତି ନେଇଥାଏ। ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ଦ୍ୱାରା ୨୮ ଫେବୃଆରୀ ୨୦୧୪ରେ ଗଠିତ ସପ୍ତମ ବେତନ କମିଶନ ୧୯ ନଭେମ୍ବର ୨୦୧୫ରେ ଏହାର ରିପୋର୍ଟ ଦାଖଲ କରିଥିଲା, ଯାହାର ସୁପାରିଶ ୧ ଜାନୁଆରୀ ୨୦୧୬ରୁ ଲାଗୁ କରାଯାଇଥିଲା।
ଏହି ସମୟସୀମା ଆଧାରରେ, ୮ମ ବେତନ କମିଶନ ୧ ଜାନୁଆରୀ, ୨୦୨୬ ରୁ କାର୍ଯ୍ୟକାରୀ ହେବ ବୋଲି ଆଶା କରାଯାଉଛି। ପୂର୍ବ କମିଶନ ପରି, ଏହି ବେତନ କମିଶନର ସୁପାରିଶ ଅନୁଯାୟୀ ଦରମା ସଂଶୋଧନର ସମ୍ଭାବନା ରହିଛି। କମିଶନଙ୍କ ସୁପାରିଶ ଆଧାରରେ, ପେନସନଭୋଗୀଙ୍କ ପାଇଁ ମହଙ୍ଗା ଭତ୍ତା (DA) ଏବଂ ମହଙ୍ଗା ରିଲିଫ୍ (DR) ରେ ସଂଶୋଧନ କରାଯିବ।