ସ୍ୱେଚ୍ଛାକୃତ ଅବସର ନେଲେ ସୁଜାତା କାର୍ତ୍ତିକେୟନ ପାଣ୍ଡିଆନ

ଭୁବନେଶ୍ୱର(ସଂକେତ ଟିଭି): ୨୦୦୦ ବ୍ୟାଚର ଆଇଏଏସ ଅଧିକାରୀ ସୁଜାତା କାର୍ତ୍ତିକେୟନ ପାଣ୍ଡିଆନ ସ୍ୱେଚ୍ଛାକୃତ ଅବସର (VRS) ଗ୍ରହଣ କରିଛନ୍ତି। କେନ୍ଦ୍ର ସରକାର ତାଙ୍କ ଅବସର ଆବେଦନକୁ ଅନୁମୋଦନ କରିଥିବା ଜଣାପଡିଛି। ଏହି ଘଟଣା ଓଡ଼ିଶାର ରାଜନୈତିକ ଓ ପ୍ରଶାସନିକ ମହଲରେ ଚର୍ଚ୍ଚାର ବିଷୟ ହୋଇଛି।

ସୁଜାତା ପାଣ୍ଡିଆନ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ କାର୍ତ୍ତିକେୟନ ଏସ୍. ପାଣ୍ଡିଆନଙ୍କ ପତ୍ନୀ। ୨୦୨୪ ନିର୍ବାଚନ ପରେ ସେ ୬ ମାସର ଛୁଟି ନେଇଥିଲେ। ଛୁଟି ଶେଷ ହେବା ପରେ ଅଧିକ ଛୁଟି ପାଇଁ ଆବେଦନ କରିଥିଲେ ମଧ୍ୟ ଭାଜପା ସରକାର ତାହା ପ୍ରତ୍ୟାଖ୍ୟାନ କରିଥିଲେ। ଫଳସ୍ୱରୂପ, ସେ ଅର୍ଥ ବିଭାଗର ସ୍ବତନ୍ତ୍ର ସଚିବ ଭାବେ କାର୍ଯ୍ୟରେ ଯୋଗ ଦେଇଥିଲେ।

ଏହି ଘଟଣା ଓଡ଼ିଶାର ରାଜନୀତିରେ ଗୁରୁତ୍ୱପୂର୍ଣ୍ଣ ପ୍ରଭାପ ପକାଇଛି। ସୁଜାତା ମିଶନ ଶକ୍ତି ବିଭାଗର କମିଶନର-ସହ-ସଚିବ ଥିବା ସମୟରେ ବିଜେପି ତରଫରୁ ଅଭିଯୋଗ ଆସିଥିଲା। ନିର୍ବାଚନ କମିଶନ ତାଙ୍କୁ ଏକ “ଜନସାଧାରଣ ସହ ସିଧାସଳଖ ସମ୍ପର୍କ ନଥିବା” ବିଭାଗକୁ ବଦଳି କରିବାକୁ ନିର୍ଦ୍ଦେଶ ଦେଇଥିଲେ। ଫଳରେ ସେ ଅର୍ଥ ବିଭାଗକୁ ବଦଳି ହୋଇଥିଲେ।

ସୁଜାତାଙ୍କ ପରିବାର ଓଡ଼ିଶାର କେନ୍ଦ୍ରାପଡ଼ା ଜିଲ୍ଲାର। ତାଙ୍କ ପିତା ଝାଡ଼ଖଣ୍ଡର ଜାମସେଦପୁରରେ ଡାକ୍ତର ଭାବେ କାର୍ଯ୍ୟ କରୁଥିଲେ। ୨୦୦୦ ମସିହାରେ ନବୀନ ପଟ୍ଟନାୟକଙ୍କ ମୁଖ୍ୟମନ୍ତ୍ରୀ ହେବା ସମୟରେ ସୁଜାତାଙ୍କ ଆଇଏଏସ କ୍ୟାରିଅର ଆରମ୍ଭ ହୋଇଥିଲା। ସେ ମିଶନ ଶକ୍ତି ପରି ଗୁରୁତ୍ୱପୂର୍ଣ୍ଣ ବିଭାଗରେ କାର୍ଯ୍ୟ କରିଛନ୍ତି।

ସୁଜାତାଙ୍କ ଅବସର ପରେ ତାଙ୍କ ଆଗାମୀ ପଦକ୍ଷେପ ନେଇ ରାଜ୍ୟର ରାଜନୈତିକ ମହଲରେ କୌତୁହଳ ସୃଷ୍ଟି କରିଛି। ତାଙ୍କ ସ୍ୱାମୀ କାର୍ତ୍ତିକେୟନ ପାଣ୍ଡିଆନ ପୂର୍ବରୁ ରାଜନୀତିରୁ ଅବସର ନେଇଛନ୍ତି। ଏହି ଘଟଣା ଓଡ଼ିଶାର ରାଜନୈତିକ ପରିବେଶକୁ କିପରି ପ୍ରଭାବିତ କରିବ, ତାହାକୁ ନେଇ ଏବେ ସମସ୍ତଙ୍କ ନଜର ରହିଛି।