ଶ୍ରୀଲଙ୍କାରେ ପ୍ରଧାନମନ୍ତ୍ରୀ ମୋଦିଙ୍କୁ ସର୍ବୋଚ୍ଚ ସମ୍ମାନ “ମିତ୍ର ବିଭୂଷଣ” ପ୍ରଦାନ

କଲମ୍ବୋ (ସଂକେତ ଟିଭି): ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶ୍ରୀଲଙ୍କା ସରକାର ଆଜି ଦେଶର ସର୍ବୋଚ୍ଚ ବେସାମରିକ ସମ୍ମାନ “ମିତ୍ର ବିଭୂଷଣ”ରେ ସମ୍ମାନିତ କରିଛନ୍ତି। ଥାଇଲାଣ୍ଡ ଗସ୍ତ ପରେ ଶ୍ରୀଲଙ୍କା ପହଞ୍ଚିଥିବା ପ୍ରଧାନମନ୍ତ୍ରୀ ମୋଦିଙ୍କୁ ରାଷ୍ଟ୍ରପତି ଅନୁରା ଦିସାନାୟକେ ଏହି ସମ୍ମାନ ପ୍ରଦାନ କରିଥିଲେ। ଏହି ଉପଲକ୍ଷେ ଆୟୋଜିତ ଏକ ଭବ୍ୟ ସମାରୋହରେ ରାଷ୍ଟ୍ରପତି ଦିସାନାୟକେ କହିଛନ୍ତି ଯେ ପ୍ରଥମ ଥର ପାଇଁ ଶ୍ରୀଲଙ୍କା ଏହି ସମ୍ମାନ କୌଣସି ବିଦେଶୀ ନେତାଙ୍କୁ ପ୍ରଦାନ କରୁଛି ଏବଂ ପ୍ରଧାନମନ୍ତ୍ରୀ ମୋଦି ଏହାର ଯୋଗ୍ୟ ପାତ୍ର।

ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ଏହି ସମ୍ମାନ କେବଳ ତାଙ୍କ ପାଇଁ ନୁହେଁ ବରଂ ସମଗ୍ର ୧୪୦ କୋଟି ଭାରତୀୟଙ୍କ ପାଇଁ ଏକ ଗର୍ବର ବିଷୟ। ତାଙ୍କ ମତରେ ଏହା ଭାରତ ଓ ଶ୍ରୀଲଙ୍କା ମଧ୍ୟରେ ଥିବା ଐତିହାସିକ ସମ୍ପର୍କ ଓ ଗାଢ଼ ବନ୍ଧୁତାର ପ୍ରତୀକ। ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ୨୦୧୯ ମସିହାର ଆତଙ୍କବାଦୀ ଆକ୍ରମଣ, କୋଭିଡ ମହାମାରୀ କିମ୍ବା ଆର୍ଥିକ ସଙ୍କଟ ସମୟରେ ଭାରତ ସର୍ବଦା ଶ୍ରୀଲଙ୍କାର ପାଖରେ ଛିଡା ହୋଇଥିଲା।

ଏହି ଗସ୍ତ ସମୟରେ ଉଭୟ ଦେଶ ମଧ୍ୟରେ ଅନେକ ଗୁରୁତ୍ଵପୂର୍ଣ୍ଣ ଚୁକ୍ତିନାମା ସ୍ୱାକ୍ଷରିତ ହୋଇଛି। ଭାରତ ଶ୍ରୀଲଙ୍କାକୁ ୧୦୦ ନିୟୁତ ଡଲାର ଋଣ ମାଫ କରିବା ସହ ସୁଧ ହାର ହ୍ରାସ କରିଛି। ପୂର୍ବାଞ୍ଚଳ ବିକାଶ ପାଇଁ ପ୍ରାୟ ୨.୪ ବିଲିୟନ ଶ୍ରୀଲଙ୍କା ରୁପି (୬୦ ନିୟୁତ ଡଲାର) ଯୋଗାଇଦେବା ସହ ଟ୍ରିନ୍କୋମାଲିକୁ ଏକ ଶକ୍ତି ହବ୍ ଭାବରେ ବିକଶିତ କରିବା ପାଇଁ ଯୁଗ୍ମ ପ୍ରକଳ୍ପ ଆରମ୍ଭ କରାଯିବ। ଉଭୟ ନେତା ଏକ ସୌର ଶକ୍ତି ପ୍ରକଳ୍ପ ମଧ୍ୟ ଉଦ୍ଘାଟନ କରିଛନ୍ତି।

“ମିତ୍ର ବିଭୂଷଣ” ସମ୍ମାନର ଡିଜାଇନ୍ ଉଭୟ ଦେଶର ସାଂସ୍କୃତିକ ସମ୍ପର୍କକୁ ପ୍ରତିଫଳିତ କରେ। ଏଥିରେ ଧର୍ମ ଚକ୍ର (ବୌଦ୍ଧ ଐତିହ୍ୟ), ପୁଣ କଳସ (ସମୃଦ୍ଧି), ନବରତ୍ନ (ସ୍ଥାୟୀ ବନ୍ଧୁତା) ଏବଂ ସୂର୍ଯ୍ୟ-ଚନ୍ଦ୍ର (ଅନନ୍ତ ସମ୍ପର୍କ) ଭଳି ପ୍ରତୀକାତ୍ମକ ଉପାଦାନ ରହିଛି। ପ୍ରଧାନମନ୍ତ୍ରୀ ମୋଦିଙ୍କ ଏହି ଚତୁର୍ଥ ଶ୍ରୀଲଙ୍କା ଗସ୍ତ ଦ୍ୱିପକ୍ଷୀୟ ସମ୍ପର୍କକୁ ନୂତନ ଉଚ୍ଚତାରେ ନେଇଛି ବୋଲି ରାଜନୈତିକ ପର୍ଯ୍ୟବେକ୍ଷକମାନେ ମତ ଦେଇଛନ୍ତି।