ସ୍ୱୟଂ ସହାୟକ ଗୋଷ୍ଠୀ ଢାଞ୍ଚାରେ ପୁନର୍ଗଠନ ହେବ

ଭୁବନେଶ୍ୱର (ସଂକେତ ଟିଭି): ରାଜ୍ୟରେ ସ୍ୱୟଂ ସହାୟକ ଗୋଷ୍ଠୀ (SHG) ଢାଞ୍ଚାରେ ପୁନର୍ଗଠନ ହେବ ବୋଲି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଆଜି ସୂଚନା ଦେଇଛନ୍ତି। ଚଳିତ ମାସରେ ଏହି ଗୋଷ୍ଠୀଗୁଡ଼ିକୁ ପୁନଃସଂଗଠିତ କରାଯିବ ଏବଂ ଜିଲ୍ଲା ଓ ରାଜ୍ୟ ସ୍ତରରେ GPLF, CPL ଏବଂ BLF ପାଇଁ ନୂତନ ନେତୃତ୍ୱ ଗଠନ କରାଯିବ।

ପରିଡ଼ା କହିଛନ୍ତି, “କେନ୍ଦ୍ର ସରକାର ପ୍ରତ୍ୟେକ ପରିବାରକୁ ସ୍ୱୟଂ ସହାୟକ ଗୋଷ୍ଠୀ ସହିତ ଯୋଗାଯୋଗ କରିବାକୁ ନିର୍ଦ୍ଦେଶ ଦେଇଥିଲେ। ମାତ୍ର, ପୂର୍ବତନ ସରକାର କେତେକ ନିର୍ଦ୍ଦିଷ୍ଟ ଗୋଷ୍ଠୀକୁ ପ୍ରାଧାନ୍ୟ ଦେଇ ଅନ୍ୟମାନଙ୍କୁ ବାଦ ଦେଇଥିଲେ। ବର୍ତ୍ତମାନ ମିଶନ ଶକ୍ତି ବିଭାଗ ସମସ୍ତ ପରିବାରକୁ ଏହି ଗୋଷ୍ଠୀ ସହିତ ଯୋଗାଯୋଗ କରିବା ପାଇଁ ପ୍ରୟାସ କରୁଛି। ପୂର୍ବରୁ ରାଜନୈତିକ ଉଦ୍ଦେଶ୍ୟରେ ଏହି ଗୋଷ୍ଠୀଗୁଡ଼ିକୁ ଗଠନ କରାଯାଇଥିଲା।”

ଉପମୁଖ୍ୟମନ୍ତ୍ରୀ ଜଣାଇଛନ୍ତି ଯେ, ଏବେ ସମସ୍ତେ GPLF ନିର୍ବାଚନରେ ଭାଗ ନେଇପାରିବେ। ଯେଉଁମାନେ ପୂର୍ବରୁ ସଭାପତି ଓ ସମ୍ପାଦକ ଭାବରେ କାର୍ଯ୍ୟ କରୁଥିଲେ, ସେମାନଙ୍କୁ ବଦଳାଯାଇ ନୂଆ ଲୋକ ନିର୍ବାଚିତ ହେବେ। ତୃଣମୂଳ ସ୍ତରରେ ନୂତନ ନେତୃତ୍ୱ ଗଠନ ପାଇଁ ଏହି ପଦକ୍ଷେପ ନିଆଯାଉଛି। ଆଗାମୀ ମାସରେ ଜିଲ୍ଲା ଓ ରାଜ୍ୟ ସ୍ତରରେ ନୂତନ ସଦସ୍ୟ ନିଯୁକ୍ତି ଦିଆଯିବ।

ପରିଡ଼ା ଆହୁରି ମଧ୍ୟ କହିଛନ୍ତି ଯେ, ପୂର୍ବତନ ସରକାର ରାଜନୈତିକ ଲାଭ ପାଇଁ କେତେକ ସଦସ୍ୟଙ୍କୁ ଦୀର୍ଘ ସମୟ ପର୍ଯ୍ୟନ୍ତ ପଦରେ ରଖିଥିଲେ, ଯାହାକି ନିୟମ ବିରୁଦ୍ଧ। ରାଜ୍ୟରେ ଅନେକ ସ୍ୱୟଂ ସହାୟକ ଗୋଷ୍ଠୀ ରେଜିଷ୍ଟ୍ରେସନ୍ ବିନା କାର୍ଯ୍ୟ କରୁଥିବା ବେଳେ କୋଟି କୋଟି ଟଙ୍କା ବଣ୍ଟନ କରାଯାଇଛି। ରେଜିଷ୍ଟ୍ରେସନ୍ ନଥିବାରୁ ଅଡିଟ୍ ମଧ୍ୟ ହୋଇନାହିଁ, ଯାହାକି ଅସ୍ୱାଭାବିକ ବୋଲି ସେ ମତଦେଇଛନ୍ତି।