ରାଜ୍ୟରେ ଆରମ୍ଭ ହେଲା କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନା

କଟକ (ସଂକେତ ଟିଭି): ରାଜ୍ୟରେ ଆଜି କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାର ଶୁଭାରମ୍ଭ ହୋଇଛି । କଟକର ବାଲିଯାତ୍ରା ପଡ଼ିଆରେ ଆୟୋଜିତ ବିଶାଳ କାର୍ଯ୍ୟକ୍ରମରେ କେନ୍ଦ୍ରୀୟ ସ୍ବାସ୍ଥ୍ୟ ମନ୍ତ୍ରୀ ଜେ.ପି. ନଡ୍ଡା ଏହି ଯୋଜନାର ଶୁଭାରମ୍ଭ କରିଛନ୍ତି। ଏଥିରେ ରାଜ୍ୟର ୧ କୋଟି ୩ ଲକ୍ଷ ପରିବାର ଅନ୍ତର୍ଭୁକ୍ତ ହେବେ ଏବଂ ପ୍ରତ୍ୟେକ ସଦସ୍ୟଙ୍କୁ ପୃଥକ୍ ଆୟୁଷ୍ମାନ କାର୍ଡ୍ ମିଳିବ। ଦେଶର ୨୯,୦୦୦ ତାଲିକାଭୁକ୍ତ ଡାକ୍ତରଖାନାରେ ଏହି ସୁବିଧା ମିଳିବ।

କଟକର ବାଲିଯାତ୍ରା ତଳପଡ଼ିଆରେ ଆୟୋଜିତ ଜନସଭାକୁ ସମ୍ବୋଧନ କରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, “ଏହି ଯୋଜନା ୬ ବର୍ଷ ପୂର୍ବେ ଲାଗୁ ହେବାର ଥିଲା, କିନ୍ତୁ ତତ୍କାଳୀନ ସରକାର ଏହାକୁ ଅବହେଳା କରିଥିଲେ। ଆମର ଡବଲ୍ ଇଞ୍ଜିନ ସରକାର ମାତ୍ର ୧୦ ମାସରେ ଏହାକୁ ବାସ୍ତବତାରେ ପରିଣତ କରିଛି।” ଆଗାମୀ ୩ ମାସ ମଧ୍ୟରେ ସମସ୍ତ ଯୋଗ୍ୟ ପରିବାରକୁ ଏହି କାର୍ଡ ପହଞ୍ଚିବ ବୋଲି ସେ ନିଶ୍ଚିତତା ଦେଇଛନ୍ତି।

ଯୋଜନାର ମୁଖ୍ୟ ବିଶେଷତା:

• ପ୍ରତ୍ୟେକ ପରିବାର ସଦସ୍ୟଙ୍କୁ ପୃଥକ୍ କାର୍ଡ ମିଳିବ
• ରାଜ୍ୟ ବାହାରେ ଥିବା ୨୯,୦୦୦ ଡାକ୍ତରଖାନାରେ ଚିକିତ୍ସା ସୁବିଧା
• ୨୩ ଲକ୍ଷ ବୟସ୍କ ନାଗରିଙ୍କୁ ବିଶେଷ ଲାଭ
• ସମସ୍ତ ସେବା ନିଃଶୁଳ୍କ

ସ୍ୱାସ୍ଥ୍ୟ କ୍ଷେତ୍ରରେ ଅନ୍ୟାନ୍ୟ ଉନ୍ନୟନ:
ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ଯେ:

• ଗତ ୧୦ ମାସରେ ୪,୦୦୦ ସ୍ୱାସ୍ଥ୍ୟ କର୍ମୀ ନିଯୁକ୍ତି ପ୍ରଦାନ
• ଆଗାମୀ ଦିନରେ ଆହୁରି ୫,୩୭୪ ଡାକ୍ତର ନିଯୁକ୍ତି ହେବେ
• ଭଦ୍ରକ, ଜଗତସିଂହପୁର, ନବରଙ୍ଗପୁର ଓ ଢେଙ୍କାନାଳରେ ନୂତନ ମେଡିକାଲ କଲେଜ
• ୪ଟି ଜିଲ୍ଲାରେ ଡେଣ୍ଟାଲ କଲେଜ ପ୍ରତିଷ୍ଠା

ଏହି ଅବସରରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଜନଜାତି ବ୍ୟାପାର ମନ୍ତ୍ରୀ ଜୁଏଲ ଓରାମ ସମେତ ଅନେକ ଗଣମାନ୍ୟ ବ୍ୟକ୍ତି ଉପସ୍ଥିତ ଥିଲେ।