ଯାଜପୁରରେ ପୂର୍ବତନ ବିଧାୟକଙ୍କ ଗାଡ଼ି ଆକ୍ରମଣ: ୪ ଜଣ ଗିରଫ

କଟକ (ସଂକେତ ଟିଭି): ଯାଜପୁର ଜିଲ୍ଲାର ଧର୍ମଶାଳା ଥାନା ଅନ୍ତର୍ଗତ ଆରୁହା ଗ୍ରାମରେ ପୂର୍ବତନ ବିଧାୟକ ପ୍ରଣବ ବଳବନ୍ତରାୟଙ୍କ ଗାଡ଼ି ଆକ୍ରମଣ ଘଟଣାରେ ପୋଲିସ୍ ୪ ଜଣକୁ ଗିରଫ କରିଛି। ଗତ ରବିବାର ଦିନ ଆରୁହା ଗ୍ରାମରେ ଅନୁଷ୍ଠିତ ହିଙ୍ଗୁଳା ଯଜ୍ଞ ଦର୍ଶନ ପାଇଁ ପୂର୍ବତନ ବିଧାୟକ ଓ ତାଙ୍କ ସମର୍ଥକମାନେ ଯାଇଥିବା ବେଳେ ସ୍ଥାନୀୟ ଲୋକେ ବିରୋଧ କରି ଗାଡ଼ିକୁ ଆକ୍ରମଣ କରିଥିଲେ। ଏହାକୁ ନେଇ ସେଠାରେ ଉତ୍ତେଜନା ସୃଷ୍ଟି ହୋଇଥିଲା। ପୋଲିସ୍ ପହଞ୍ଚିବା ପରେ ସ୍ଥିତି ନିୟନ୍ତ୍ରଣରେ ଆସିଥିଲା।
ପୂର୍ବତନ ବିଧାୟକ ଏହି ଘଟଣାରେ ଯାଜପୁର ପୋଲିସକୁ ଦାୟୀ କରି କହିଛନ୍ତି ଯେ, ବିଧାୟକଙ୍କ ସମର୍ଥକମାନେ ଏହି ଆକ୍ରମଣ କରାଇଛନ୍ତି। ଥାନାରେ ଲିଖିତ ଅଭିଯୋଗ ହେବା ପରେ ଯାଜପୁର ଏସ୍.ଡି.ପି.ଓ. ତଦନ୍ତ କରି ୪ ଜଣକୁ ଗିରଫ କରିଛନ୍ତି। ମଙ୍ଗଳବାର ସେମାନଙ୍କୁ କୋର୍ଟକୁ ଚାଲାଣ କରାଯାଇଛି।

ଧର୍ମଶାଳା ବିଧାୟକ ହିମାଂଶୁ ଶେଖର ସାହୁ ଏହି ହିଂସା ଘଟଣାକୁ ନେଇ ପ୍ରତିକ୍ରିୟା ଦେଇ କହିଛନ୍ତି, “ପୂର୍ବତନ ବିଧାୟକ ନିଜ କାର୍ଯ୍ୟକୁ ଘୋଡାଇବାକୁ ଯାଇ ଅଭିଯୋଗ କରୁଛନ୍ତି। ସେ ସ୍ଥାନକୁ ଯାଉଥିଲେ କାହିଁକି? ଆଇନ୍ ହାତକୁ ନେଉଥିଲେ କାହିଁକି? ମୁଁ ରାଜ୍ୟ ବାହାରେ ଥିଲି ଏବଂ ଏଥିରେ ଆମ ଦଳର କୌଣସି ଭୂମିକା ନାହିଁ। ଏହା ବିଜେଡିର ଅନ୍ତର୍କଳହର ପରିଣାମ।”

ସେ ଆହୁରି କହିଛନ୍ତି, “ବିଜେଡିରେ ଅନ୍ତର୍କଳହ ବଢ଼ିଯିବାରୁ ଏହା ଧର୍ମଶାଳା ପଞ୍ଚାୟତକୁ ପ୍ରଭାବିତ କରିଛି। ପୂର୍ବତନ ବିଧାୟକ ନିଜ ଦଳର ସମସ୍ୟାକୁ ଘୋଡାଇବାକୁ ଚେଷ୍ଟା କରୁଛନ୍ତି। ଯିଏ ଦୋଷୀ, ପୋଲିସ୍ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବ।”