ରତ୍ନଭଣ୍ଡାର ମରାମତି ନହୋଇଥିଲେ ଭାଙ୍ଗି ପଡ଼ିଥାନ୍ତା: ଆଇନ ମନ୍ତ୍ରୀ ପୃଥ୍ବୀରାଜ

ଭୁବନେଶ୍ୱର (ସଂକେତ ଟିଭି): ଯଦି ରତ୍ନଭଣ୍ଡାରର ମରାମତି କାର୍ଯ୍ୟ ହୋଇନଥାନ୍ତା, ତେବେ ଏହା ଭାଙ୍ଗି ପଡ଼ିଥାନ୍ତା। ଶ୍ରୀମନ୍ଦିର ରତ୍ନଭଣ୍ଡାରର ମରାମତି ପ୍ରସଙ୍ଗରେ ଆଜି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଏହା କହିଛନ୍ତି । ସେ କହିଛନ୍ତି ଯେ ରତ୍ନଭଣ୍ଡାରକୁ ଶହେ ବର୍ଷରୁ ଦୁଇଶହ ବର୍ଷ ପର୍ଯ୍ୟନ୍ତ ସୁରକ୍ଷିତ ରଖିବା ପାଇଁ ମରାମତି କାର୍ଯ୍ୟ ଅତ୍ୟନ୍ତ ଜରୁରୀ। ଏଥିପାଇଁ ଭାରତୀୟ ପ୍ରାକ୍-ଐତିହାସିକ ସର୍ବେକ୍ଷଣ ବିଭାଗ (ASI)କୁ କୌଣସି ପ୍ରକାରେ ବ୍ୟାହତ ନକରିବାକୁ ତାଙ୍କୁ ସ୍ପଷ୍ଟ ନିର୍ଦ୍ଦେଶ ଦିଆଯାଇଛି।

ସ୍ନାନପୂର୍ଣ୍ଣିମା ପୂର୍ବରୁ ରତ୍ନଭଣ୍ଡାରର ମରାମତି କାର୍ଯ୍ୟ ଅନ୍ତିମ ପର୍ଯ୍ୟାୟରେ ପହଞ୍ଚିଛି। ନିତିଦିନିଆ କାର୍ଯ୍ୟକ୍ରମକୁ ବାଧା ନଦେଇ ମରାମତି କାମ ନିୟମିତ ଭାବରେ ଚାଲିଛି। ପ୍ରତିଦିନ ପ୍ରାୟ ଦେଢ଼ ଘଣ୍ଟାରୁ ଦୁଇ ଘଣ୍ଟା ଧରି ଏହି କାର୍ଯ୍ୟ ସମ୍ପାଦିତ ହେଉଛି। ଆଇନ ମନ୍ତ୍ରୀ କହିଛନ୍ତି, “ରତ୍ନଭଣ୍ଡାରର ଯେତିକି କ୍ଷତି ହୋଇଥିଲା, ଯଦି ମରାମତି ହୋଇନଥାନ୍ତା, ମୋର ଆଶଙ୍କା ଥାଏ ଯେ ଏହା କୌଣସି ସମୟରେ ଭାଙ୍ଗି ପଡ଼ିଥାନ୍ତା। ତେଣୁ ଏହାକୁ ଦୀର୍ଘ ସମୟ ପାଇଁ ସୁରକ୍ଷିତ ରଖିବା ପାଇଁ ମରାମତି କାର୍ଯ୍ୟ ଅତ୍ୟନ୍ତ ଆବଶ୍ୟକ।”

ତାଙ୍କ ମତରେ, ASI ନିଜ ସ୍ୱତନ୍ତ୍ର ସମୟାନୁସାରେ କାର୍ଯ୍ୟ କରୁଛି, ମାତ୍ର ସମୟ ସୀମିତ ଥିବାରୁ କାର୍ଯ୍ୟ ବିଳମ୍ବିତ ହେଉଛି। ସ୍ନାନଯାତ୍ରା ପୂର୍ବରୁ ମରାମତି କାର୍ଯ୍ୟ ସମାପ୍ତ କରିବାକୁ ସବୁ ପ୍ରୟାସ ଚାଲିଛି। ମନ୍ତ୍ରୀ ନିବେଦନ କରିଛନ୍ତି ଯେ ରତ୍ନଭଣ୍ଡାରର କାର୍ଯ୍ୟ ସମ୍ପୂର୍ଣ୍ଣ ନହୋଇଥିବା ପର୍ଯ୍ୟନ୍ତ ସମସ୍ତେ ଧৈର୍ଯ୍ୟ ଧରି ଅପେକ୍ଷା କରନ୍ତୁ।