ରାଜ୍ୟ କ୍ୟାବିନେଟ ବୈଠକ: ଭିଜନ୍ ୨୦୩୬ ନେଇ ଆଲୋଚନା, ୭ଟି ପ୍ରସ୍ତାବକୁ ଅନୁମୋଦନ
ଭୁବନେଶ୍ବର (ସଂକେତ ଟିଭି): ରାଜ୍ୟ କ୍ୟାବିନେଟର ଏକ ଗୁରୁତ୍ୱପୂର୍ଣ୍ଣ ବୈଠକ ଆଜି ଲୋକସେବା ଭବନରେ ସମାପ୍ତ ହୋଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ମନ୍ତ୍ରୀମଣ୍ଡଳ ଏବଂ ବିଭାଗୀୟ ସଚିବମାନେ ଉପସ୍ଥିତ ଥିଲେ। ଆଜିର ବୈଠକରେ ୭ଟି ପ୍ରସ୍ତାବ ଉପରେ ମନ୍ତବ୍ୟ ଗ୍ରହଣ କରାଯାଇଛି। ଏଥିରେ ଓଡ଼ିଶା ଭିଜନ୍ ଡକ୍ୟୁମେଣ୍ଟ ୨୦୩୬ ଉପରେ ମଧ୍ୟ ଆଲୋଚନା ହୋଇଥିବା ଜଣାପଡିଛି।
୧. ଓଡ଼ିଶା ଉତ୍ପାଦ ଶୁଳ୍କ ନିୟମରେ ସଂଶୋଧନ: ଆଜିର କ୍ୟାବିନେଟ୍ ବୈଠକରେ ଓଡ଼ିଶା ଉତ୍ପାଦ ଶୁଳ୍କ ନିୟମ, ୨୦୧୭ର ନିୟମ ୭୯ରେ ସଂଶୋଧନକୁ ମଞ୍ଜୁରୀ ଦିଆଯାଇଛି। ଏହାଦ୍ୱାରା ଡିଷ୍ଟିଲେରୀ, ବଟଲିଂ ୟୁନିଟ୍ ଏବଂ ବ୍ରୁଅରୀ ପାଇଁ ଅତିରିକ୍ତ ଘଣ୍ଟା କାର୍ଯ୍ୟ ଶୁଳ୍କ ଛାଡ଼ କରାଯାଇଛି। ଏହି ପଦକ୍ଷେପ ରାଜ୍ୟରେ ବ୍ୟବସାୟିକ ସୁବିଧା, ନିବେଶ ପରିବେଶ ଏବଂ ରୋଜଗାର ସୃଷ୍ଟିରେ ସହାୟକ ହେବ ବୋଲି ଆଶା କରାଯାଉଛି।
୨. ଏକ୍ସାଇଜ୍ କନେଷ୍ଟବଳ ପୁନର୍ଗଠନ: ସେବା ପରିଚାଳନାରେ ଉନ୍ନତି ଆଣିବା ପାଇଁ ଏକ୍ସାଇଜ୍ କନେଷ୍ଟବଳ କ୍ୟାଡରକୁ ଡିଭିଜନାଲରୁ ଜିଲ୍ଲା ସ୍ତରକୁ ସ୍ଥାନାନ୍ତର କରାଯିବ। ଏହା ନିଯୁକ୍ତି ପ୍ରକ୍ରିୟାକୁ ସୁଗମ କରିବ ଏବଂ କର୍ମଚାରୀଙ୍କ ପରିଚାଳନା ଉନ୍ନତ ହେବ।
୩. ଅଙ୍ଗନୱାଡି କର୍ମୀଙ୍କ ଶିକ୍ଷାଗତ ଯୋଗ୍ୟତା ବୃଦ୍ଧି: ଓଡ଼ିଶା ଶିଶୁ ଏବଂ ମହିଳା କଲ୍ୟାଣ ସେବା ନିୟମରେ ସଂଶୋଧନ କରାଯାଇ ଜୁନିଅର ଗ୍ରେଡ୍ ପଦବୀ ପାଇଁ ଆବେଦନକାରୀ ଅଙ୍ଗନୱାଡି କର୍ମୀଙ୍କ ସର୍ବନିମ୍ନ ଶିକ୍ଷାଗତ ଯୋଗ୍ୟତା ହାଇସ୍କୁଲରୁ ସ୍ନାତକକୁ ବୃଦ୍ଧି କରାଯାଇଛି। ଏହା ଶିଶୁ ଯତ୍ନ କ୍ଷେତ୍ରରେ ଆଧୁନିକ ଆବଶ୍ୟକତାକୁ ସାମ୍ନେ ରଖିବ।
୪. ଆନନ୍ଦପୁର ବ୍ୟାରେଜ ପ୍ରକଳ୍ପ ପାଇଁ ଟେଣ୍ଡର ଅନୁମୋଦନ: କେନ୍ଦୁଝର ଜିଲ୍ଲାର ସମନ୍ୱିତ ଆନନ୍ଦପୁର ବ୍ୟାରେଜ ପ୍ରକଳ୍ପ ପାଇଁ ୧୦୮ କୋଟି ଟଙ୍କାର ଟେଣ୍ଡରକୁ କ୍ୟାବିନେଟ୍ ଅନୁମୋଦନ ଦେଇଛି। ଏହି ପ୍ରକଳ୍ପରେ ବୈତରଣୀ ନଦୀର ଉଭୟ ପାର୍ଶ୍ୱରେ ଭୂତଳ ପାଇପଲାଇନ ଜଳସେଚନ ପ୍ରଣାଳୀ ନିର୍ମାଣ ହେବ, ଯାହାଦ୍ୱାରା ୩,୪୫୦ ହେକ୍ଟରରୁ ଅଧିକ ଜମି ସମୃଦ୍ଧ ହେବ।
୫. କଲ୍ୟାଣ ସେବା ପୁନର୍ଗଠନ: କଲ୍ୟାଣ ଯୋଜନା କାର୍ଯ୍ୟକାରିତାରେ ସୁବିଧା ପ୍ରଦାନ ପାଇଁ ଓଡ଼ିଶା କଲ୍ୟାଣ ସେବା ଏବଂ ଅଧସ୍ତନ କଲ୍ୟାଣ ସେବା କ୍ୟାଡରର ପୁନର୍ଗଠନ କରାଯାଇଛି। ଏଥିରେ ଅନୁସୂଚିତ ଜନଜାତି, ଜାତି ଏବଂ ଅନ୍ୟ ପଛୁଆ ବର୍ଗଙ୍କ ପାଇଁ ୨୪ଟି ନୂତନ ପଦବୀ ସୃଷ୍ଟି କରାଯାଇଛି।
୬. ଜରୁରୀକାଳୀନ ଆମ୍ବୁଲାନ୍ସ ସେବା ବିସ୍ତାର: କ୍ୟାବିନେଟ୍ ୨୦୨୩-୨୪ରୁ ୨୦୨୭-୨୮ ପାଇଁ ଇଏମଏଏସ (ଜରୁରୀକାଳୀନ ଚିକିତ୍ସା ଆମ୍ବୁଲାନ୍ସ ସେବା)ର ପର୍ଯ୍ୟାୟ-୩କୁ ଅନୁମୋଦନ ଦେଇଛି। ୨୩୯.୮୪ କୋଟି ଟଙ୍କା ବଜେଟ୍ ଥିବା ଏହି ଯୋଜନା ବାର୍ଷିକ ୧୧-୧୨ ଲକ୍ଷ ଜରୁରୀକାଳୀନ ସେବା ପ୍ରଦାନ କରିବ। ରାଜ୍ୟର ୮୬୬ଟି ଆମ୍ବୁଲାନ୍ସ (ଏଏଲଏସ, ବିଏଲଏସ ଏବଂ ଡଙ୍ଗା ଆମ୍ବୁଲାନ୍ସ) ଏବଂ ୨୪୍ଠ୭ ଘଣ୍ଟିଆ କଲ୍ ସେଣ୍ଟର ମାଧ୍ୟମରେ ଏହି ସେବା ପରିଚାଳିତ ହେବ।
