ଗତ ତିନି ଦଶନ୍ଧି ଧରି ଆତଙ୍କବାଦୀ ସମର୍ଥନ କରିଥିବା କଥା ସ୍ବୀକାର କଲା ପାକିସ୍ତାନ
ନୂଆଦିଲ୍ଲୀ (ସଂକେତ ଟିଭି): ପାହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ଏକ ବଡ଼ ସ୍ବୀକାରୋକ୍ତି କରିଛି। ପାକିସ୍ତାନୀ ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ୍ ଗତ ତିନି ଦଶନ୍ଧି ଧରି ଆତଙ୍କବାଦୀଙ୍କୁ ସମର୍ଥନ କରିଆସୁଥିବା କଥା ସ୍ୱୀକାର କରିଛନ୍ତି। ମାତ୍ର, ସେ ଏଥିପାଇଁ ଆମେରିକା ଓ ପଶ୍ଚିମା ଦେଶମାନଙ୍କୁ ଦାୟୀ କରିଛନ୍ତି।
ସ୍କାଏ ନ୍ୟୁଜ୍କୁ ଦିଆଯାଇଥିବା ସାକ୍ଷାତକାରରେ ଆସିଫ୍ କହିଛନ୍ତି, ଆମେରିକା ଓ ପଶ୍ଚିମ ଦେଶମାନଙ୍କ ପାଇଁ ଆମକୁ ଏପରି ଖରାପ କାମ (ଡାର୍ଟି ୱର୍କ) କରିବାକୁ ପଡ଼ିଛି।” ତାଙ୍କ ମତରେ, ପାକିସ୍ତାନ ଆତଙ୍କବାଦୀ ସଂଗଠନଗୁଡ଼ିକୁ ସମର୍ଥନ କରିଥିଲା କାରଣ ଏହା ପାଶ୍ଚାତ୍ୟ ଦେଶମାନଙ୍କ ରଣନୀତିର ଅଂଶ ଥିଲା। ମାତ୍ର, ପରେ ସେ ଏହାକୁ ଏକ “ଭୁଲ” ବୋଲି କହି ଯୋଗକରିଛନ୍ତି ଯେ ଏଥିପାଇଁ ପାକିସ୍ତାନ ମଧ୍ୟ ବହୁତ କ୍ଷତି ସହିଛି।
ଏହି ମନ୍ତବ୍ୟ ଆସିଥାଏ ଯେତେବେଳେ ପାହଲଗାମ ଆକ୍ରମଣରେ ୨୬ ଜଣ ପର୍ଯ୍ୟଟକ ନିହତ ହୋଇଥିଲେ ଏବଂ ଭାରତ ଏଥିପାଇଁ ପାକିସ୍ତାନକୁ ପରୋକ୍ଷ ଭାବେ ଦାୟୀ କରିଛି। ଭାରତ ସରକାର ବାରମ୍ବାର ଦାବି କରିଆସିଛନ୍ତି ଯେ ପାକିସ୍ତାନ ଆତଙ୍କବାଦୀଙ୍କୁ ପ୍ରଶ୍ରୟ ଦେଇଥାଏ, ଯାହାକି ଆସିଫଙ୍କ ସ୍ୱୀକାରୋକ୍ତିରେ ଆହୁରି ଶକ୍ତି ପାଇଛି।
ଏହି ଘଟଣା ପରେ ଭାରତ-ପାକିସ୍ତାନ ମଧ୍ୟରେ ତନାବ ବୃଦ୍ଧି ପାଇଛି। ପାକିସ୍ତାନ ପ୍ରତିରକ୍ଷା ମନ୍ତ୍ରୀଙ୍କ ଏହି ବିବୃତ୍ତି ଦେଶଟିର ଆତଙ୍କବାଦ ସହିତ ଯୋଡ଼ିଥିବା ଦୀର୍ଘଦିନର ସମ୍ପର୍କକୁ ଉଜାଗର କରିଛି। ଭାରତର ମତାମତକୁ ଏହା ଆହୁରି ବଳଦୃଢ଼ କରିଛି ଯେ ପାକିସ୍ତାନ ଆନ୍ତର୍ଜାତିକ ସ୍ତରରେ ଆତଙ୍କବାଦକୁ ପ୍ରୋତ୍ସାହନ ଦେଇଆସୁଛି।
