ପହଲଗାମ ଆକ୍ରମଣର ଗୁପ୍ତଚର ରିପୋର୍ଟ ୩ ଦିନ ପୂର୍ବରୁ ପାଇଥିଲେ ମୋଦୀ : ଖଡ଼ଗେ
ରାଞ୍ଚି (ସଂକେତ ଟିଭି): ଝାଡ଼ଖଣ୍ଡ ରାଜଧାନୀ ରାଞ୍ଚିରେ ଅନୁଷ୍ଠିତ ‘ସମ୍ବିଧାନ ବଞ୍ଚାଅ’ ରାଲିରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ସେ ଦାବି କରିଛନ୍ତି ଯେ, ଜମ୍ମୁ-କାଶ୍ମୀରରେ ହୋଇଥିବା ଆତଙ୍କବାଦୀ ଆକ୍ରମଣ ସମ୍ପର୍କରେ ପ୍ରଧାନମନ୍ତ୍ରୀ ମୋଦୀଙ୍କୁ ଗୁପ୍ତଚର ବିଭାଗରୁ ପୂର୍ବାହ୍ନରେ ରିପୋର୍ଟ ମିଳିଥିଲା। ଏହାପରେ ସେ ନିଜର ଜମ୍ମୁ-କାଶ୍ମୀର ଯାତ୍ରା ବାତିଲ କରିଥିଲେ।
ଖଡ଼ଗେ କହିଛନ୍ତି ଯେ, ୨୨ ଏପ୍ରିଲରେ ପହଲଗାମରେ ହୋଇଥିବା ଆକ୍ରମଣର ତିନି ଦିନ ପୂର୍ବରୁ ପ୍ରଧାନମନ୍ତ୍ରୀଙ୍କୁ ଏକ ଗୁପ୍ତଚର ରିପୋର୍ଟ ପଠାଯାଇଥିଲା। ତେଣୁ ସେ ନିଜ କାଶ୍ମୀର ଯାତ୍ରା ବାତିଲ କରିଥିଲେ। ଏହି ଆକ୍ରମଣରେ ୨୬ ଜଣଙ୍କର ମୃତ୍ୟୁ ହୋଇଥିଲା, ଯେଉଁଥିରେ ଅଧିକାଂଶ ପର୍ଯ୍ୟଟକ ଥିଲେ। ସେ ଆହୁରି କହିଛନ୍ତି ଯେ, ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀ ମୋଦୀ ଗୁପ୍ତଚର ବିଭାଗରେ ତ୍ରୁଟି ଥିବା ସ୍ୱୀକାର କରିଥିଲେ।
ଖଡ଼ଗେ ସରକାରଙ୍କୁ ପ୍ରଶ୍ନ କରିଛନ୍ତି ଯେ, ଯଦି ପ୍ରଧାନମନ୍ତ୍ରୀ ଆକ୍ରମଣର ରିପୋର୍ଟ ପାଇଥିଲେ, ତେବେ କାହିଁକି ପହଲଗାମରେ ଅଧିକ ସୁରକ୍ଷା ବାହିନୀ ମୋଟିଆଣ କରାଯାଇନଥିଲା? ଏହି ଘଟଣାରେ ହୋଇଥିବା ଜୀବନ ଓ ସମ୍ପତ୍ତି କ୍ଷତି ପାଇଁ କେନ୍ଦ୍ର ସରକାର ଦାୟୀ ନୁହଁନ୍ତି କି?
ଖଡ଼ଗେ ସ୍ପଷ୍ଟ କରିଛନ୍ତି ଯେ, ପହଲଗାମ ଆକ୍ରମଣ ପରେ ପାକିସ୍ତାନ ବିରୋଧରେ କେନ୍ଦ୍ର ସରକାର ଯେକୌଣସି କାର୍ଯ୍ୟାନୁଷ୍ଠାନ ନିଅନ୍ତେ, କଂଗ୍ରେସ ସରକାରଙ୍କ ସହିତ ଛିଡ଼ା ହେବ। ଦେଶ ସର୍ବୋପରି ଏବଂ ଏହା ଦଳ, ଧର୍ମ ଓ ଜାତିରୁ ଉର୍ଦ୍ଧ୍ୱରେ। ତାଙ୍କ ମତରେ, ଏଭଳି ସମୟରେ ସମସ୍ତେ ଏକତ୍ରିତ ହୋଇ ଦେଶର ସୁରକ୍ଷା ପାଇଁ କାମ କରିବା ଜରୁରୀ।
#WATCH | Ranchi, Jharkhand: During Samvidhan bachao rally, Congress chief Mallikarjun Kharge says, " There is intelligence failure, govt has accepted it and they will resolve it. If they knew this, why didn't they do anything?…I got information that 3 days before the attack,… pic.twitter.com/xftdPJXgm5
— ANI (@ANI) May 6, 2025
