ଧର୍ମଶାଳା ବ୍ଲକ୍ ଏବିଡିଓଙ୍କ ଘରେ ଭିଜିଲାନ୍ସ ରେଡ୍, ୭ ସ୍ଥାନରେ ଚଢାଉ
ଯାଜପୁର (ସଂକେତ ଟିଭି): ଓଡ଼ିଶା ଭିଜିଲାନ୍ସ ଟିମ୍ ଗୁରୁବାର ସକାଳେ ଯାଜପୁର ଜିଲ୍ଲାର ଧର୍ମଶାଳା ବ୍ଲକର ଅତିରିକ୍ତ ବ୍ଲକ୍ ଉନ୍ନୟନ ଅଧିକାରୀ (ଏବିଡିଓ) ଅସିତ କୁମାର ପାତ୍ରଙ୍କ ଘରେ ତଲାସୀ ଅଭିଯାନ ଚଳାଇଛି। ଆୟଠାରୁ ଅଧିକ ସମ୍ପତ୍ତି ଅର୍ଜନ ଅଭିଯୋଗରେ କଟକ ସ୍ପେସିଆଲ ଭିଜିଲାନ୍ସ ଜଜ୍ଙ୍କ ଓାରେଣ୍ଟ ଅନୁଯାୟୀ ଏହି କାର୍ଯ୍ୟାନୁଷ୍ଠାନ ହାତଧରା ହୋଇଛି। ଯାଜପୁର, କଟକ, ଭଦ୍ରକ ଏବଂ ଭୁବନେଶ୍ୱରର ୭ଟି ସ୍ଥାନରେ ଏକା ସମୟରେ ଚଢାଉ ଚାଲିଛି।
ଭିଜିଲାନ୍ସ ଟିମ୍ ଅଧୀନରେ ୮ ଜଣ ଡିଏସପି, ୯ ଜଣ ଇନ୍ସପେକ୍ଟର ଏବଂ ଅନ୍ୟ କର୍ମଚାରୀ ସାମିଲ ହୋଇଛନ୍ତି। ତଲାସୀ କରାଯାଉଥିବା ସ୍ଥାନଗୁଡ଼ିକ ମଧ୍ୟରେ ଯାଜପୁର ରୋଡ୍ କହ୍ନେଇପୁରସ୍ଥିତ ପାତ୍ରଙ୍କ ୪ ମହଲା ବିଶିଷ୍ଟ କୋଠା, କଟକ ଚାଉଳିଆଗଞ୍ଜର ମେଟ୍ରୋ ଆଭେନ୍ୟୁ ଆପାର୍ଟମେଣ୍ଟର ଫ୍ଲାଟ୍, ଯାଜପୁର ଗରଡେଶ୍ୱରସ୍ଥିତ ଜନ୍ମସ୍ଥାନ, ଭଦ୍ରକ ସନାବନସ୍ତ ଗାଁର ସମ୍ପର୍କୀୟଙ୍କ ଘର, ଧର୍ମଶାଳା ସରକାରୀ ବାସଭବନ, ବ୍ଲକ୍ ଅଫିସ୍ ଏବଂ ଭୁବନେଶ୍ୱର ଚନ୍ଦ୍ରଶେଖରପୁରସ୍ଥିତ ବାସଗୃହ ଅନ୍ତର୍ଭୁକ୍ତ।
ଅଧିକାରୀ ଅସିତ କୁମାର ପାତ୍ର ନିଜ ଆୟ ଉତ୍ସରୁ ଅଧିକ ସମ୍ପତ୍ତି ଅର୍ଜନ କରିଥିବା ଅଭିଯୋଗ ଉପରେ ଭିଜିଲାନ୍ସ ତଦନ୍ତ କରୁଛି। ସ୍ୱତନ୍ତ୍ର ବିଚାରପତିଙ୍କ ଅନୁମତି ପରେ ଏହି ତଲାସୀ ଅଭିଯାନ ଆରମ୍ଭ ହୋଇଥିବା ବିଜ୍ଞପ୍ତି ଦିଆଯାଇଛି। ଅଭିଯାନ ସମୟରେ ଦଲିଲ ଏବଂ ଅନ୍ୟାନ୍ୟ ପ୍ରମାଣ ସଂଗ୍ରହ କରାଯାଇଥିବା କଥା ମଧ୍ୟ ଜଣାଯାଇଛି।
