ଛତିଶଗଡ଼ରେ ନକ୍ସଲ ଏନକାଉଣ୍ଟର: ଟପ୍ ମାଓ ନେତା ବାସବ୍ ରାଜୁ ସହ ୩୦ ନକ୍ସଲ ନିହତ

ରାୟପୁର (ସଂକେତ ଟିଭି): ଛତିଶଗଡ଼ର ନାରାୟଣପୁର ଓ ଦାନ୍ତେୱାଡା ସୀମାରେ ସୁରକ୍ଷା ବାହିନୀ ଏବଂ ନକ୍ସଲଙ୍କ ମଧ୍ୟରେ ଗୁଳି ବିନିମୟ ଘଟିଛି । ଏହି ଏନକାଉଣ୍ଟରରେ ଭାରତୀୟ କମ୍ୟୁନିଷ୍ଟ ପାର୍ଟି (ମାଓବାଦୀ)ର ଟପ୍ ନେତା ନମ୍ବାଲା କେଶବ ରାଓ ଓରଫେ ବାସବ୍ ରାଜୁ ସହ ୩୦ ଜଣ ନକ୍ସଲ ନିହତ ହୋଇଛନ୍ତି । ଡିଆରଜି (ଜିଲ୍ଲା ରିଜର୍ଭ ଗାର୍ଡ) ଯବାନଙ୍କ ମିଳିତ ଅପରେସନରେ ବହୁ ଅସ୍ତ୍ରଶସ୍ତ୍ର ମଧ୍ୟ ଜବ୍ତ କରାଯାଇଛି ।

ଆଜି ସକାଳେ ଆବୁଝମାଡ଼ ଜଙ୍ଗଲରେ ଡିଆରଜି ଯବାନଙ୍କ ସହ ନକ୍ସଲଙ୍କ ଗୁଳି ବିନିମୟ ହୋଇଥିଲା । ନାରାୟଣପୁର, ଦାନ୍ତେୱାଡା, ବିଜାପୁର ଏବଂ କୋଣ୍ଡାଗାଓଁ ଜିଲ୍ଲାର ସୁରକ୍ଷା ଦଳ ମିଳିତ ଭାବରେ ଏହି ଅପରେସନରେ ଯୋଗ ଦେଇଥିଲେ । ନାରାୟଣପୁର ପୋଲିସ ଅଧିକ୍ଷକ ପ୍ରଭାତ କୁମାର କହିଛନ୍ତି ଯେ, ଏହି ଏନକାଉଣ୍ଟର ଓରଛାର ବୋଟର ଅଞ୍ଚଳରେ ଘଟିଥିଲା ଏବଂ ଅପରେସନ ଏବେବି ଜାରି ଅଛି ।

ନିହତ ନକ୍ସଲଙ୍କ ମଧ୍ୟରେ ମାଓବାଦୀଙ୍କ ଶୀର୍ଷ ନେତା ବାସବ୍ ରାଜୁ ଅନ୍ୟତମ । ତାଙ୍କ ଉପରେ ୧ କୋଟି ଟଙ୍କାର ପୁରସ୍କାର ଘୋଷିତ ହୋଇଥିଲା । ୧୯୭୦ ଦଶକରୁ ନକ୍ସଲ ଆନ୍ଦୋଳନରେ ସକ୍ରିୟ ଥିବା ବାସବ୍ ରାଜୁ ଭାରତୀୟ କମ୍ୟୁନିଷ୍ଟ ପାର୍ଟି (ମାଓବାଦୀ)ର ସାଧାରଣ ସମ୍ପାଦକ ଭାବରେ କାର୍ଯ୍ୟ କରୁଥିଲେ । ଆନ୍ଧ୍ରପ୍ରଦେଶରେ ଜନ୍ମିତ ଏହି ଟପ୍ ନେତା ଜଙ୍ଗଲରେ ଦୀର୍ଘ ଦଶନ୍ଧି ଧରି ନକ୍ସଲ ଆନ୍ଦୋଳନକୁ ନେଇଥିଲେ ।

ଏହି ଏନକାଉଣ୍ଟରରେ ଜଣେ ଡିଆରଜି ଯବାନ ଶହୀଦ ହୋଇଛନ୍ତି ଏବଂ ଅନ୍ୟ ଜଣେ ଆହତ ହୋଇଛନ୍ତି । ଛତିଶଗଡ଼ ଉପମୁଖ୍ୟମନ୍ତ୍ରୀ ତଥା ଗୃହମନ୍ତ୍ରୀ ବିଜୟ ଶର୍ମା କହିଛନ୍ତି, “ଯବାନମାନେ ଏକ ବଡ଼ ସଫଳତା ଅର୍ଜନ କରିଛନ୍ତି । ଏହା ଛତିଶଗଡ଼ ତଥା ଦେଶର ନକ୍ସଲ ବିରୋଧୀ ଅଭିଯାନରେ ଏକ ମାଇଲଖୁଣ୍ଟ ସାବ୍ୟସ୍ତ କରେ ।”