ରାଜ୍ୟ ସରକାରଙ୍କ ବିଫଳତା ବିରୋଧରେ ୧୩ରୁ ଆନ୍ଦୋଳନକୁ ଓହ୍ଲାଇବ ବିଜେଡି
ଭୁବନେଶ୍ୱର (ସଂକେତ ଟିଭି): ବିଜେପି ସରକାରଙ୍କ ଏକ ବର୍ଷ ପୂର୍ତ୍ତି ଉପଲକ୍ଷେ ଆୟୋଜିତ ରାଜ୍ୟବ୍ୟାପୀ କାର୍ଯ୍ୟକ୍ରମକୁ ବିଜୁ ଜନତା ଦଳ (ବିଜେଡି) ଜୋରଦାର ଭାବେ ପ୍ରତିବାଦ କରିଛି। ଦଳ ଆଗ୍ରହ କରିଛି ଯେ ଏହି ସରକାର ମହିଳା, ଯୁବକ ଏବଂ ଛାତ୍ରଙ୍କ ପ୍ରତି ଦିଆଯାଇଥିବା ପ୍ରତିଶୃତି ପାଳନରେ ସମ୍ପୂର୍ଣ୍ଣ ବିଫଳ ହୋଇଛି।
ବିଜେଡି ନେତୃତ୍ୱ ଦାବି କରିଛନ୍ତି ଯେ ବିଜେପି ସରକାର ମହିଳାଙ୍କ ସଶକ୍ତିକରଣ ପାଇଁ ପୂର୍ବରୁ ଚାଲୁଥିବା ଯୋଜନାଗୁଡ଼ିକୁ ବନ୍ଦ କରିଦେଇଛି। ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ପଞ୍ଚାୟତ ସ୍ତରରେ ମହିଳାଙ୍କ ପାଇଁ ୩୩% ସଂରକ୍ଷଣ ଆରମ୍ଭ କରିଥିଲେ, ଯାହାକୁ ନବୀନ ପଟ୍ଟନାୟକ ୫୦%କୁ ବୃଦ୍ଧି କରିଥିଲେ। ଏହା ଛଡ଼ା, ମିଶନ ଶକ୍ତି ମାଧ୍ୟମରେ ୭୦ ଲକ୍ଷରୁ ଅଧିକ ମହିଳାଙ୍କୁ ସ୍ୱାବଲମ୍ୱୀ କରାଯାଇଥିଲା। ମାତ୍ର ବିଜେପି ସରକାର ଏହି ଯୋଜନାଗୁଡ଼ିକୁ ପ୍ରାୟ ବନ୍ଦ କରିଦେଇଛି ବୋଲି ବିଜେଡି ଆକ୍ଷେପ କରିଛି।
ସୁଭଦ୍ରା ଯୋଜନାରେ ପ୍ରତିଶୃତି କୃତ ୫୦,୦୦୦ ଟଙ୍କା ପ୍ରଦାନ ବିଷୟରେ ମଧ୍ୟ ପ୍ରଶ୍ନ ଉଠାଇ ଦଳର ବରିଷ୍ଠ ନେତା ପ୍ରମିଳା ମଲ୍ଲିକ କହିଛନ୍ତି, “ବିଜେପି ଦୁଇ ବର୍ଷରେ ୫୦,୦୦୦ ଟଙ୍କା ଦେବା ପରିବର୍ତ୍ତେ ଏହାକୁ ପାଞ୍ଚ ବର୍ଷରେ ୧୦ କିସ୍ତିରେ ଦେଉଛି, ଯାହା ଏକ ପ୍ରତାରଣା ମାତ୍ର।”
ବିଜେଡି ଉପସଭାପତି ସଞ୍ଜୟ ଦାସବର୍ମା କହିଛନ୍ତି ଯେ ବିଜେପି ସରକାର ରାଜ୍ୟର ଯୁବକ ଓ ଛାତ୍ରଙ୍କ ଭବିଷ୍ୟତ ସହିତ ଖେଳିଛି। ପ୍ରତିଶୃତିକୃତ ୧.୫ ଲକ୍ଷ ଚାକିରି ପ୍ରଦାନ ନହେବା ସହିତ ପରୀକ୍ଷା ବିଭ୍ରାଟ (ଓଜେଏସ, ଷ୍ଟାଫ ସିଲେକ୍ସନ, ଓପିଏସସି) ଯୋଗୁଁ ଅନେକ ପରୀକ୍ଷାର୍ଥୀ ମାନସିକ ଯନ୍ତ୍ରଣା ଭୋଗୁଛନ୍ତି। ସେ ମତ ଦେଇଛନ୍ତି, “ଏକ ବର୍ଷ ଭିତରେ ଗୋଟିଏ ମଧ୍ୟ ପରୀକ୍ଷା ସୁଚାରୁ ଭାବେ ହୋଇନାହିଁ।”
ଏହି ଅନ୍ୟାୟ ବିରୋଧରେ ବିଜେଡି ଆସନ୍ତା ୧୩ ଜୁନ୍ ଯାଜପୁରରେ ଏକ ବିରାଟ ମହିଳା ସମ୍ମିଳନୀ ଏବଂ ୧୮ ଜୁନ୍ ପୁରୀରେ ଯୁବ ସମାବେଶ ଆୟୋଜନ କରିବାକୁ ଯାଉଛି। ଦଳ କହିଛି ଯେ ସରକାରଙ୍କ ବିଫଳତାକୁ ଜନତାଙ୍କ ସମ୍ମୁଖରେ ଉପସ୍ଥାପନ କରାଯିବ।
