ଜର୍ମାନୀରେ ସୂର୍ଯ୍ୟକୁମାର ଯାଦବଙ୍କ ସଫଳ ଅସ୍ତ୍ରୋପଚାର

ନୂଆଦିଲ୍ଲୀ (ସଂକେତ ଟିଭି): ଜର୍ମାନୀର ମ୍ୟୁନିଖରେ ଭାରତୀୟ କ୍ରିକେଟ ଟିମ୍ୱାର ଟି-୨୦ ଅଧିନାୟକ ସୂର୍ଯ୍ୟକୁମାର ଯାଦବଙ୍କ ସ୍ପୋର୍ଟସ୍ ହାର୍ନିଆ ଅସ୍ତ୍ରୋପଚାର ସଫଳତାର ସହିତ ସମ୍ପନ୍ନ ହୋଇଛି। ଏହି ଅସ୍ତ୍ରୋପଚାର ପରେ ସେ ଶୀଘ୍ର ବେଙ୍ଗାଲୁରୁର ବିସିସିଆଇ ସେଣ୍ଟର ଅଫ୍ ଏକ୍ସିଲେନ୍ସରେ ପୁନର୍ବାସ ଆରମ୍ଭ କରିବେ। ଗତ ତିନି ବର୍ଷ ମଧ୍ୟରେ ଏହା ତାଙ୍କର ତୃତୀୟ ଅସ୍ତ୍ରୋପଚାର।

୩୪ ବର୍ଷୀୟ ବ୍ୟାଟସମ୍ୟାନ୍ ଇନଷ୍ଟାଗ୍ରାମରେ ନିଜ ଅବସ୍ଥା ବିଷୟରେ ଲେଖିଛନ୍ତି, “ଜୀବନ ଅପଡେଟ୍: ଡାହାଣ ପେଟର ତଳ ଭାଗରେ ସ୍ପୋର୍ଟସ୍ ହାର୍ନିଆ ପାଇଁ ଅସ୍ତ୍ରୋପଚାର କରାଯାଇଛି। ଅସ୍ତ୍ରୋପଚାର ସଫଳ ହୋଇଥିବାରୁ ଖୁସି ଏବଂ ମୁଁ ଏବେ ସୁସ୍ଥ ହେବା ରାସ୍ତାରେ ଅଛି। ଶୀଘ୍ର ଫେରିବି।” ସ୍ପୋର୍ଟସ୍ ହାର୍ନିଆ ଏକ ପ୍ରକାରର ମାଂସପେଶୀ ଆଘାତ, ଯାହା ଅଣ୍ଟା କିମ୍ବା ତଳିପେଟ ଅଞ୍ଚଳକୁ ପ୍ରଭାବିତ କରେ।

ଅସ୍ତ୍ରୋପଚାର ପରେ ସୂର୍ଯ୍ୟକୁମାର ପ୍ରାୟ ଦୁଇ ସପ୍ତାହ ମଧ୍ୟରେ ବେଙ୍ଗାଲୁରୁରେ ପୁନର୍ବାସ ଆରମ୍ଭ କରିବେ। ଭାରତର ପରବର୍ତ୍ତୀ ଆନ୍ତର୍ଜାତୀୟ କ୍ରିକେଟ୍ ସିରିଜ୍ ଅଗଷ୍ଟ ମାସରେ ବାଂଲାଦେଶ ବିପକ୍ଷରେ ଅନୁଷ୍ଠିତ ହେବ, ଯେଉଁଥିରେ ତିନୋଟି ଦିନିକିଆ ଏବଂ ଟି-୨୦ ମ୍ୟାଚ୍ ଅନ୍ତର୍ଭୁକ୍ତ ରହିଛି। ସୂର୍ଯ୍ୟକୁମାର ୨୦୨୩ ବିଶ୍ୱକପ୍ ଫାଇନାଲ ପରଠାରୁ ୫୦ ଓଭର ଫର୍ମାଟରେ ଖେଳି ନାହାଁନ୍ତି।

ଗତ ତିନି ବର୍ଷ ମଧ୍ୟରେ ଏହା ତାଙ୍କର ତୃତୀୟ ଅସ୍ତ୍ରୋପଚାର। ୨୦୨୩ ମସିହାରେ ତାଙ୍କ ଗୋଡ଼ରେ ଅସ୍ତ୍ରୋପଚାର ହୋଇଥିଲା ଏବଂ ୨୦୨୪ ମସିହାରେ ମଧ୍ୟ ସ୍ପୋର୍ଟସ୍ ହାର୍ନିଆ ପାଇଁ ଚିକିତ୍ସା ନେଇଥିଲେ। ଅସ୍ତ୍ରୋପଚାର ପୂର୍ବରୁ, ସୂର୍ଯ୍ୟକୁମାର ଆଇପିଏଲ ୨୦୨୫ରେ ମୁମ୍ବାଇ ଇଣ୍ଡିଆନ୍ସ ପାଇଁ ଉତ୍କୃଷ୍ଟ ପ୍ରଦର୍ଶନ କରିଥିଲେ ଏବଂ ଟୁର୍ଣ୍ଣାମେଣ୍ଟରେ ଦ୍ୱିତୀୟ ସର୍ବାଧିକ ୭୧୭ ରନ୍ ସଂଗ୍ରହ କରିଥିଲେ।