ଆମେରିକା ସହିତ ପରମାଣୁ ଚୁକ୍ତି ନେଇ ଆଉ ହେବ ନାହିଁ ଆଲୋଚନା: ଇରାନ

ତେହେରାନ (ସଂକେତ ଟିଭି): ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧବିରତି ପରେ ମଧ୍ୟ ମଧ୍ୟପ୍ରାଚ୍ୟରେ ଉତ୍ତେଜନା ବୃଦ୍ଧି ପାଇଛି। ଇରାନର ବୈଦେଶିକ ମନ୍ତ୍ରୀ ଆବାସ ଆରାଘଚି ସ୍ପଷ୍ଟ କରିଛନ୍ତି ଯେ ଆମେରିକା ସହିତ ପରମାଣୁ ଚୁକ୍ତି ନେଇ ଆଉ କୌଣସି ଆଲୋଚନା ହେବ ନାହିଁ। ଏହି ମନ୍ତବ୍ୟ ଆସିଛି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦାବି ପରେ, ଯିଏ କହିଥିଲେ ଯେ ଇରାନ ସହିତ ଆସନ୍ତା ସପ୍ତାହରେ ପୁଣି ଥରେ ଆଲୋଚନା ହେବ।

ହ୍ବାଇଟ ହାଉସର ପ୍ରେସ ସଚିବ କାରୋଲିନ ଲେଭିଟ ଏକ ପ୍ରେସ ବ୍ରିଫିଂରେ କହିଛନ୍ତି ଯେ ଆମେରିକା ଇରାନ ସହିତ କୂଟନୈତିକ ଆଲୋଚନା ଜାରି ରଖିଛି। ତାଙ୍କ ମତରେ, ଏକ ନୂତନ ଚୁକ୍ତି ପ୍ରକ୍ରିୟା ଚାଲିଛି, ଯାହା ଅନୁଯାୟୀ ଆମେରିକା ଇରାନକୁ ପ୍ରାୟ ୩୦ ବିଲିୟନ ଡଲାର (୨.୨୭ ଲକ୍ଷ କୋଟି ଟଙ୍କା) ଦେବାର ପ୍ରସ୍ତାବ ରଖିଛି। ଏହି ଅର୍ଥ ଆମେରିକା ସିଧାସଳଖ ନଦେଇ ଆରବ ଦେଶଗୁଡ଼ିକ ମାଧ୍ୟମରେ ପଠାଇବା ହେବା ସମ୍ଭାବନା ରହିଛି।

ଇରାନର ସରକାରୀ ଟିଭି ସହିତ କଥାବାର୍ତ୍ତା ସମୟରେ ଆରାଘଚି କହିଛନ୍ତି, ‘‘ଆମେରିକା ସହିତ ପୁଣି ଥରେ ଆଲୋଚନା ଆରମ୍ଭ କରିବା ପାଇଁ କୌଣସି ଚୁକ୍ତି କିମ୍ବା ବ୍ୟବସ୍ଥା ହୋଇନାହିଁ। ନା କୌଣସି ପ୍ରତିଶ୍ରୁତି ଦିଆଯାଇଛି, ନା ଏହି ବିଷୟରେ କୌଣସି ଆଲୋଚନା ହୋଇଛି।’’ ସେ ଆଗରୁ ମଧ୍ୟ କହିଥିଲେ ଯେ ଇରାନର ସ୍ବାର୍ଥ ଉପରେ ହିଁ ସେମାନଙ୍କର ନିଷ୍ପତ୍ତି ଆଧାରିତ ହେବ।

ଇରାନର ପରମାଣୁ କାର୍ଯ୍ୟକ୍ରମ ବିଶ୍ୱ ବିବାଦର କେନ୍ଦ୍ରବିନ୍ଦୁ ହୋଇଛି। ଆମେରିକା, ଇସ୍ରାଏଲ ଓ ଅନ୍ୟ ପାଶ୍ଚାତ୍ୟ ଦେଶମାନେ ଦାବି କରୁଛନ୍ତି ଯେ ଇରାନ ଗୁପ୍ତ ଭାବରେ ପରମାଣୁ ଅସ୍ତ୍ର ତିଆରି କରୁଛି। ଅପର ପକ୍ଷରେ, ଇରାନ ଜୋର ଦେଇ କହୁଛି ଯେ ସେମାନଙ୍କର ପରମାଣୁ କାର୍ଯ୍ୟକ୍ରମ କେବଳ ଶାନ୍ତିପୂର୍ଣ୍ଣ ଉଦ୍ଦେଶ୍ୟ ଯେପରିକି ବିଦ୍ୟୁତ ଉତ୍ପାଦନ ଏବଂ ଚିକିତ୍ସା ଗବେଷଣା ପାଇଁ ହିଁ ବ୍ୟବହୃତ ହେଉଛି।