ଆମେରିକାରେ ନୂଆ ରାଜନୈତିକ ଦଳ ଘୋଷଣା କଲେ ଏଲନ ମସ୍କ
ଓାସିଂଟନ (ସଂକେତ୍ ଟିଭି) ବିଶ୍ବବିଖ୍ୟାତ କୋଟିପତି ଏବଂ ଉଦ୍ୟୋଗୀ ଏଲନ ମସ୍କ ଏକ ନୂତନ ରାଜନୈତିକ ଦଳ ଗଠନ କରିଛନ୍ତି । ଏହି ଦଳର ନାମ “ଆମେରିକା ପାର୍ଟି” ରଖାଯାଇଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ବିବାଦ ଏବଂ ମତଭେଦ ପରେ ମସ୍କ ଏହି ନିଷ୍ପତ୍ତି ନେଇଥିବା କୁହାଯାଉଛି ।
ମସ୍କ ଦଳର ଉଦ୍ଦେଶ୍ୟ ବ୍ୟାଖ୍ୟା କରି କହିଛନ୍ତି, “ଆମେରିକା ପାର୍ଟି ଜନ୍ମ ହୋଇଛି ଲୋକଙ୍କୁ ସେମାନଙ୍କ ସ୍ବାଧୀନତା ଫେରାଇଦେବା ପାଇଁ । ଆମେ ଲୋକଙ୍କୁ ସେମାନଙ୍କ ନିୟନ୍ତ୍ରଣ ଫେରାଇଦେବା ଚାହୁଁଛୁ ।” ଟ୍ରମ୍ପଙ୍କ ସହ ତାଙ୍କର ବିବାଦ ବୃଦ୍ଧି ପାଇବା ପରେ ମସ୍କ ଏହି ଦଳ ଗଠନ କରିଛନ୍ତି ବୋଲି କୁହାଯାଉଛି ।
ଗତ କିଛି ସମୟରେ ଆମେରିକାରେ ଏକ ନୂତନ ରାଜନୈତିକ ଦଳର ଆବଶ୍ୟକତା ଉପରେ ଆଲୋଚନା ଚାଲିଥିଲା । ଏକ ସର୍ଭେ ଅନୁଯାୟୀ, ୨:୧ ଅନୁପାତରେ ଆମେରିକୀୟମାନେ ଏକ ନୂତନ ରାଜନୈତିକ ବିକଳ୍ପ ଚାହୁଁଥିବା ଜଣାପଡିଛି । ମସ୍କ ଏହି ପରିସ୍ଥିତିକୁ ଏକ ସୁଯୋଗ ଭାବେ ନେଇ ନୂତନ ଦଳ ଗଠନ କରିଛନ୍ତି ।
ଟେସଲା ଏବଂ ସ୍ପେସଏକ୍ସର ମାଲିକ ମସ୍କଙ୍କ ଏହି ଘୋଷଣା ଆମେରିକାର ରାଜନୈତିକ ପରିବେଶକୁ ସରଗରମ କରି ଦେଇଛି । ରାଷ୍ଟ୍ରପତି ଟ୍ରମ୍ପଙ୍କୁ ପ୍ରତ୍ୟକ୍ଷ ଚ୍ୟାଲେଞ୍ଜ ଦେବାକୁ ମସ୍କ ପ୍ରସ୍ତୁତ ବୋଲି ମନେହୁଏ । ଏହି ଦଳ ଆମେରିକାର ପାରମ୍ପାରିକ ଦ୍ୱିଦଳୀୟ ପ୍ରଣାଳୀକୁ ବଦଳାଇବା ପାଇଁ ଚେଷ୍ଟା କରିବ ବୋଲି ଅନୁମାନ କରାଯାଉଛି ।
