କ୍ରିକେଟରେ ରାଜନୀତି : ରୋହିତଙ୍କୁ ହଟାଇ ଶୁଭମନଙ୍କୁ କରାଗଲା ଦିନିକିଆ ଟିମର ଅଧିନାୟକ

ଅହମଦାବାଦ (ସଂକେତ ଟିଭି): ଅହମଦାବାଦରେ ଅନୁଷ୍ଠିତ ବିସିସିଆଇ ଚୟନ ସମିତିର ବୈଠକରେ ଅକ୍ଟୋବର-ନଭେମ୍ବର ମାସରେ ହେବାର ଥିବା ଅଷ୍ଟ୍ରେଲିଆ ଟୁର ପାଇଁ ଭାରତର ଏକଦିବସୀୟ ଏବଂ ଟି-୨୦ ଦଳ ଚୂଡାନ୍ତ ହୋଇଛି। ଏକଦିବସୀୟ ଦଳକୁ ନେଇ ଶୁଭମନ୍ ଗିଲ୍ ଅଧିନାୟକତ୍ୱ କରିବାବେଳେ ଶ୍ରେୟସ୍ ଆୟାର୍ଙ୍କୁ ଉପ-ଅଧିନାୟକ ଭାବେ ନିଯୁକ୍ତି ଦିଆଯାଇଛି।

ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (BCCI) ଅଷ୍ଟ୍ରେଲିଆ ଗସ୍ତ ପାଇଁ ଏକଦିବସୀୟ ଦଳର ଅଧିନାୟକ ଭାବେ ଶୁଭମନ ଗିଲ୍ଙ୍କୁ ନିଯୁକ୍ତି ଦେବା ସହ ରୋହିତ ଶର୍ମାଙ୍କୁ ଏହି ଦାୟିତ୍ୱରୁ ମୁକ୍ତ କରିବା ନିଷ୍ପତ୍ତି କ୍ରିକେଟ ପ୍ରେମୀଙ୍କ ମଧ୍ୟରେ ତୀବ୍ର ଆଲୋଚନା ଆରମ୍ଭ କରାଇଛି, ଅନେକେ ଏହାକୁ ଏକ ରାଜନୈତିକ ଚାଲ ବୋଲି କହୁଛନ୍ତି।

ରୋହିତ ଶର୍ମା ଭାରତୀୟ ଦଳକୁ ଗତ ବିଶ୍ୱକପ୍ ଫାଇନାଲରେ ନେଇଯିବା ସହ ଅନେକ ସଫଳତା ଅର୍ଜନ କରିଥିଲେ। ତା’ସ୍ଥାନେ ଶୁଭମନ ଗିଲ୍ଙ୍କୁ ଅଧିନାୟକ ଭାବେ ନିଯୁକ୍ତି ଦିଆଯିବା ପ୍ରସଙ୍ଗରେ କ୍ରିକେଟ ବିଶ୍ଳେଷକ ଓ ପୂର୍ବତନ ଖେଳାଳିମାନେ ପ୍ରଶ୍ନ ଉଠାଇଛନ୍ତି। ପୂର୍ବତନ ଭାରତୀୟ ସ୍ପିନର ହରଭଜନ ସିଂହ ଏହି ନିଷ୍ପତ୍ତିକୁ ‘ଆଶ୍ଚର୍ଯ୍ୟଜନକ’ ବୋଲି କହିଛନ୍ତି।

ଜିଓହଟଷ୍ଟାରକୁ ଦିଆଯାଇଥିବା ସାକ୍ଷାତକାରରେ ହରଭଜନ କହିଛନ୍ତି, “ରୋହିତ ଧଳା ବଲ୍ କ୍ରିକେଟରେ ବହୁତ ଭଲ ରେକର୍ଡ୍ ରଖୁଛନ୍ତି। ସତକଥା କହିବାକୁ ଗଲେ, ତାଙ୍କୁ ଅଧିନାୟକ ନକରି ମାତ୍ର ଦଳରେ ରଖାଯିବା ଆଶ୍ଚର୍ଯ୍ୟଜନକ। ମୁଁ ଭାବିଥିଲି ଯଦି ସେ ଅଷ୍ଟ୍ରେଲିଆ ଯାଉଥାନ୍ତେ, ତେବେ ପୁଣି ଥରେ ଅଧିନାୟକ ହୋଇଥାନ୍ତେ।”

କ୍ରିକେଟ ବିଶ୍ଲେଷକମାନେ ମତ ଦେଇଛନ୍ତି ଯେ ରୋହିତଙ୍କ ଅଧିନାୟକତ୍ୱରେ ଭାରତର ପ୍ରଦର୍ଶନ ଉତ୍କୃଷ୍ଟ ଥିଲା। ତାଙ୍କ ନେତୃତ୍ୱରେ ଟିମ୍ ବିଶ୍ୱକପ୍ ଫାଇନାଲରେ ପହଞ୍ଚିଥିଲା ଏବଂ ଅନେକ ଜୟଜୟକାର ଅର୍ଜନ କରିଥିଲା। ଏଭଳି ସ୍ଥିତିରେ ତାଙ୍କୁ ଅଧିନାୟକତ୍ୱରୁ ହଟାଇବା ନିଷ୍ପତ୍ତି ତର୍କସଙ୍ଗତ ନୁହେଁ ବୋଲି ଅନେକେ ମତ ଦେଉଛନ୍ତି।

ଏହି ପରିବର୍ତ୍ତନ ଭାରତୀୟ କ୍ରିକେଟରେ ଏକ ନୂଆ ବିବାଦ ସୃଷ୍ଟି କରିଛି। ରୋହିତ ଶର୍ମାଙ୍କ ଭଳି ଏକ ଅନୁଭବୀ ଖେଳାଳିଙ୍କୁ ଅଧିନାୟକତ୍ୱରୁ ବଞ୍ଚିତ କରିବା ଦଳର ମନୋବଳ ଉପରେ ପ୍ରଭାବ ପକାଇପାରେ ବୋଲି ଆଶଙ୍କା ପ୍ରକାଶ କରାଯାଉଛି। ଅନ୍ୟ ପକ୍ଷରେ, ଶୁଭମନ ଗିଲ୍ ନୂତନ ନେତୃତ୍ୱରେ କିଭଳି ପ୍ରଦର୍ଶନ କରନ୍ତି, ତାହା ଦେଖିବାକୁ ସମସ୍ତେ ଉତ୍ସୁକ।

ଏହି ନିଷ୍ପତ୍ତି କ୍ରିକେଟ୍ କ୍ଷେତ୍ରରେ ରାଜନୀତିର ପ୍ରଭାବକୁ ନେଇ ଆଉ ଥରେ ପ୍ରଶ୍ନ ଉଠାଇଛି। ବିସିସିଆଇ ଏହି ନିଷ୍ପତ୍ତି ପଛରେ କି କାରଣ ରହିଛି, ତାହା ସ୍ପଷ୍ଟ କରିନାହିଁ, ଯାହା ଆହୁରି ବିବାଦ ସୃଷ୍ଟି କରିଛି।

ତେବେ ଏକଦିବସୀୟ ଦଳରେ ଅନୁଭବୀ ଖେଳାଳି ରୋହିତ ଶର୍ମା ଏବଂ ବିରାଟ୍ କୋହଲି ଫେରିଛନ୍ତି। କେଏଲ୍ ରାହୁଲଙ୍କୁ ଏକଦିବସୀୟ ଦଳ ପାଇଁ ମୁଖ୍ୟ ୱିକେଟ୍-କିପର୍ ଭାବେ ରଖାଯାଇଥିବା ବେଳେ ଧ୍ରୁବ ଜୁରେଲ ଅନ୍ୟ ଏକ ୱିକେଟ୍-କିପିଂ ବିକଳ୍ପ ଅଟନ୍ତି। ଦଳରେ ଯଶସ୍ବୀ ଜୟସ୍ୱାଲ, ଅକ୍ଷର ପଟେଲ, ୱାଶିଂଟନ୍ ସୁନ୍ଦର ଓ ମହମ୍ମଦ ସିରାଜ ଆଦି ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଖେଳାଳି ଅଛନ୍ତି।

ଟି-୨୦ ଦଳକୁ ନେଇ ସୂର୍ଯ୍ୟକୁମାର ଯାଦବ ଅଧିନାୟକତ୍ୱ କରିବେ ଏବଂ ଶୁଭମନ୍ ଗିଲ୍ ଏହି ଦଳରେ ଉପ-ଅଧିନାୟକ ଭାବେ ରହିଛନ୍ତି। ଏହି ଦଳରେ ଜିତେଶ୍ ଶର୍ମା ଏବଂ କେଏଲ୍ ରାହୁଲ ଦୁଇଜଣ ୱିକେଟ୍-କିପର୍ ଭାବେ ରହିଛନ୍ତି। ଅଭିଷେକ ଶର୍ମା, ତିଲକ ବର୍ମା ଏବଂ ବରୁଣ ଚକ୍ରବର୍ତ୍ତୀ ଆଦି ଯୁବା ଖେଳାଳିମାନେ ଏହି ଦଳରେ ସ୍ଥାନ ପାଇଛନ୍ତି।

ମ୍ୟାଚ୍ ସୂଚୀ:

ଏକଦିବସୀୟ ସିରିଜ୍:

ପ୍ରଥମ ଏକଦିବସୀୟ: ୧୯ ଅକ୍ଟୋବର (ପର୍ଥ)

ଦ୍ୱିତୀୟ ଏକଦିବସୀୟ: ୨୩ ଅକ୍ଟୋବର (ଏଡିଲେଡ୍)

ତୃତୀୟ ଏକଦିବସୀୟ: ୨୪ ଅକ୍ଟୋବର (ସିଡନୀ)

ଟି-୨୦ ସିରିଜ୍:

ପ୍ରଥମ ଟି-୨୦: ୨୯ ଅକ୍ଟୋବର (କାନବେରା)

ଦ୍ୱିତୀୟ ଟି-୨୦: ୩୧ ଅକ୍ଟୋବର (ମେଲବର୍ଣ୍ଣ)

ତୃତୀୟ ଟି-୨୦: ୨ ନଭେମ୍ବର (ହୋବାର୍ଟ)

ଚତୁର୍ଥ ଟି-୨୦: ୬ ନଭେମ୍ବର (ଗୋଲ୍ଡ କୋଷ୍ଟ)

ପଞ୍ଚମ ଟି-୨୦: ୮ ନଭେମ୍ବର (ବ୍ରିସବେନ)