ବିଜେପି ବିଧାୟକ ପ୍ରେମ କୁମାର ବିହାର ବିଧାନସଭାର ନୂତନ ବାଚସ୍ପତି ନିର୍ବାଚିତ
ପାଟନା (ସଂକେତ ଟିଭି): ବିଜେପି ବିଧାୟକ ପ୍ରେମ କୁମାର ବୁଧବାର ବିହାର ବିଧାନସଭାର ନୂତନ ବାଚସ୍ପତି ଭାବରେ ନିର୍ବାଚିତ ହୋଇଛନ୍ତି। ଶପଥ ଗ୍ରହଣ ବେଳେ ମୁଖ୍ୟମନ୍ତ୍ରୀ ନୀତିଶ କୁମାର ଏବଂ ବିରୋଧୀ ଦଳ ନେତା ତେଜସ୍ୱୀ ଯାଦବ ତାଙ୍କୁ ଆସନ ପର୍ଯ୍ୟନ୍ତ ସାଥ୍ ଦେଇଥିଲେ। ପ୍ରେମ କୁମାର ସୋମବାର (ଡିସେମ୍ବର ୧) ରାଜ୍ୟ ସଭାକକ୍ଷରେ ନାମାଙ୍କନ ଦାଖଲ କରିଥିଲେ ଏବଂ କୌଣସି ବିରୋଧୀ ପ୍ରାର୍ଥୀ ନ ଥିବାରୁ ସେ ନିର୍ବିରୋଧେ ଏହି ପଦବୀ ପାଇଛନ୍ତି।
ବିହାରର ନୂତନ ରାଜନୈତିକ ପରିବେଶରେ ବିଜେପି ପାଇଁ ଏହି ବିଜୟ ଗୁରୁତ୍ୱପୂର୍ଣ୍ଣ। ବିଧାନସଭା ନିର୍ବାଚନରେ ୮୯ ଆସନ ଜିତି ବିଜେପି ସର୍ବବୃହତ ଦଳ ହେବା ପରେ ମହାଗଠବନ୍ଧନ ସରକାରରେ ତା’ର ଭୂମିକା ପ୍ରଭାବଶାଳୀ ହୋଇଛି। ଏପର୍ଯ୍ୟନ୍ତ ଜେଡିୟୁ ‘ବଡ଼ ଭାଇ’ ଭୂମିକାରେ ଥିବାବେଳେ ବର୍ତ୍ତମାନ ବିଜେପି ଅଧିକ କ୍ଷମତାଶାଳୀ ହୋଇଛି।
ମୁଖ୍ୟମନ୍ତ୍ରୀ ପଦ ନୀତିଶ କୁମାରଙ୍କ ପାଖରେ ଥିଲେ ମଧ୍ୟ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଦାୟିତ୍ୱ ବିଜେପି ହାତରେ ରହିଛି। ଦୁଇ ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଓ ବିଜୟ କୁମାର ସିହ୍ନା ବିଜେପିରୁ ଆସିଛନ୍ତି। ଗୃହବିଭାଗ ସହ ବାଚସ୍ପତି ପଦବୀ ମଧ୍ୟ ବିଜେପି ପାଖରେ ରହିବା ସରକାରରେ ଦଳର ନିର୍ଣ୍ଣାୟକ ସ୍ଥିତି ସ୍ପଷ୍ଟ କରୁଛି।
ବିରୋଧୀ ଦଳ ପ୍ରାର୍ଥୀ ଦାଖଲ ନକରି ପ୍ରେମ କୁମାରଙ୍କ ନିର୍ବାଚନକୁ ସହମତି ଦେଇଥିଲେ। ୯ମ ଥର ପାଇଁ ବିଧାୟକ ଭାବେ ନିର୍ବାଚିତ ପ୍ରେମ କୁମାର ଏକ ଦୀର୍ଘ ରାଜନୈତିକ ଅଭିଜ୍ଞତା ସହିତ ଏହି ଦାୟିତ୍ୱ ଗ୍ରହଣ କରିଛନ୍ତି।
