ସଂଚାର ସାଥୀ ଆପ୍ ବିବାଦ: ପଛକୁ ହଟିଲେ ସରକାର, ଆପ୍ ଅପ୍ସନାଲ ହେବା ସୂଚନା
ନୂଆଦିଲ୍ଲୀ (ସଂକେତ ଟିଭି): କେନ୍ଦ୍ର ସରକାର ପୂର୍ବେ ସମସ୍ତ ମୋବାଇଲ୍ରେ ବାଧ୍ୟତାମୂଳକ ଭାବେ ‘ସଂଚାର ସାଥୀ’ ଆପ୍ ଇନଷ୍ଟଲ୍ କରିବାକୁ ନିର୍ଦ୍ଦେଶ ଦେଇଥିଲେ। ଏହି ଆପ୍କୁ ଡିଲିଟ୍ କିମ୍ବା ନିଷ୍କ୍ରିୟ କରିବାର ଅଧିକାର ଉପଭୋକ୍ତାଙ୍କୁ ନଥିବା ବୋଲି ମଧ୍ୟ ଜଣାଯାଇଥିଲା। ସାଇବର୍ ଫ୍ରଡ୍ ରୋକିବା ଏହାର ମୂଳ ଉଦ୍ଦେଶ୍ୟ ବୋଲି ସରକାର ଦାବି କରିଥିଲେ। ନୂଆ ମୋବାଇଲ୍ରେ ଏହା ପ୍ରି-ଇନଷ୍ଟଲ୍ ହୋଇ ଆସିବ ଏବଂ ପୁରାଣା ଫୋନ୍ରେ ସଫ୍ଟୱେର୍ ଅପଡେଟ୍ ମାଧ୍ୟମରେ ଇନଷ୍ଟଲ୍ ହେବ ବୋଲି ନିର୍ଦ୍ଦେଶ ଥିଲା। ଏହାକୁ ୯୦ ଦିନ ମଧ୍ୟରେ କାର୍ଯ୍ୟକାରୀ କରିବାକୁ ଏବଂ ୧୨୦ ଦିନ ମଧ୍ୟରେ କମ୍ପ୍ଲାଏନ୍ସ ରିପୋର୍ଟ ଦାଖଲ କରିବାକୁ କୁହାଯାଇଥିଲା।
ଏହି ନିଷ୍ପତ୍ତି ଉପରେ ବିରୋଧୀ ଦଳଙ୍କ ତୀବ୍ର ପ୍ରତିକ୍ରିୟା ମିଳିଥିଲା। ତାଙ୍କ ଅଭିଯୋଗ ଥିଲା ଯେ ଏହା ଏକ ପ୍ରକାରର ‘ଗୁଇନ୍ଦାଗିରି’ ଏବଂ ଲୋକଙ୍କ ଗୋପନୀୟତାର ଅଧିକାର ଉଲ୍ଲଂଘନ। କଂଗ୍ରେସ୍ ସାଂସଦ ପ୍ରିୟଙ୍କା ଗାନ୍ଧି ଏହାକୁ ‘ଗୁଇନ୍ଦାଗିରିର ଆପ୍’ ଆଖ୍ୟା ଦେଇଥିଲେ। ରାଜ୍ୟସଭା ସାଂସଦ କେ.ସି. ବେଣୁଗୋପାଲ ଏହାକୁ ‘ବିଗ୍ ବ୍ରଦର୍’ ନିଗରାଣୀ ପଦ୍ଧତି ସହ ତୁଳନା କରି ଏହାକୁ ଅସାମ୍ବିଧାନିକ ବୋଲି କହିଥିଲେ।
ବିରୋଧୀଙ୍କ ଚାପ ଏବଂ ସାର୍ବଜନୀନ ଆଲୋଚନା ପରେ ସରକାର ନିଜର ସ୍ଥିତିରେ ପରିବର୍ତ୍ତନ ଆଣିଛନ୍ତି। କେନ୍ଦ୍ର ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ସୂଚନା ଦେଇଛନ୍ତି ଯେ ଫୋନ୍ରେ ଏହି ଆପ୍ ବର୍ତ୍ତମାନ ‘ଅପ୍ସନାଲ୍’ ରହିବ। ଅର୍ଥାତ୍ ଉପଭୋକ୍ତାଙ୍କ ଇଚ୍ଛା ଅନୁଯାୟୀ ସେମାନେ ଏହାକୁ ଇନଷ୍ଟଲ୍ କରିବେ କି ନାହିଁ କିମ୍ବା ଡିଲିଟ୍ କରିବେ ତାହା ସ୍ଥିର କରିପାରିବେ।
ସଂଚାର ସାଥୀ ଆପ୍ ଏବଂ ପୋର୍ଟାଲ୍ ମୂଳତଃ ଚୋରି ହୋଇଥିବା ମୋବାଇଲ୍ ଟ୍ର୍ୟାକ୍ କରିବା, ଜାଲିଆ ସିମ୍ କାର୍ଡ୍ ରିପୋର୍ଟ୍ କରିବା ଏବଂ ଫୋନ୍ର ସତ୍ୟତା ଯାଞ୍ଚ କରିବା ପାଇଁ ବ୍ୟବହାର ହୁଏ। ସଂଚାର ମନ୍ତ୍ରଣାଳୟ ଦାବି କରେ ଯେ ଏହି ସେବା ସାହାଯ୍ୟରେ ବର୍ତ୍ତମାନ ପ୍ରତି ମିନିଟରେ ଗୋଟିଏ ଚୋରି ହୋଇଥିବା ଫୋନ୍ ଉଦ୍ଧାର ହେଉଛି ଏବଂ ୪୨ ଲକ୍ଷରୁ ଅଧିକ ମୋବାଇଲ୍ ଅବରୋଧ କରାଯାଇସାରିଛି।
ସରକାରଙ୍କ ମତାନୁଯାୟୀ, ଏହି ଆପ୍ ସାଇବର୍ ସୁରକ୍ଷା ଦୃଢ଼ କରିବା ଏବଂ ମୋବାଇଲ୍ ଫ୍ରଡ୍ ବିରୋଧରେ ଲଢ଼ିବାରେ ଏକ ଗୁରୁତ୍ୱପୂର୍ଣ୍ଣ ଉପକରଣ। ତଥାପି, ଗୋପନୀୟତା ଚିନ୍ତା ଏବଂ ବାଧ୍ୟତାମୂଳକ ଭାବେ ଇନଷ୍ଟଲ୍ କରାଇବାର ପ୍ରସ୍ତାବ ନେଇ ଉଠିଥିବା ବିବାଦକୁ ଦେଖି ସରକାର ଏହାକୁ ଉପଭୋକ୍ତା ଇଚ୍ଛା ଉପରେ ଛାଡିବାକୁ ନିଷ୍ପତ୍ତି ନେଇଛନ୍ତି।
