ଫେବୃଆରୀରୁ ଗାଡ଼ିରେ ଲାଗିବ ଗ୍ରୀନ୍ ଷ୍ଟିକର, PUCC ନଥିଲେ ଜରିମାନା

ଭୁବନେଶ୍ୱର (ସଂକେତ ଟିଭି): ଆସନ୍ତା ଫେବୃଆରୀ ମାସରୁ ରାଜ୍ୟର ପ୍ରଦୂଷଣ ପ୍ରମାଣପତ୍ର (PUCC) ବିହୀନ ସମସ୍ତ ମୋଟର ଯାନ ପାଇଁ ଗ୍ରୀନ୍ ଷ୍ଟିକର ଆବଶ୍ୟକ ହେବ। ପରିବହନ ବିଭାଗ ଏହି ଷ୍ଟିକର ଯୋଗାଇଦେବ। ପ୍ରଦୂଷଣ ପ୍ରମାଣପତ୍ର ନଥିବା ଯାନ ଚାଳନା ଏକ ଅପରାଧ ହିସାବରେ ବିବେଚିତ ହେବ ଏବଂ ତା’ପାଇଁ ଜରିମାନା ଆଦାୟ କରାଯିବ।

ପରିବହନ ମନ୍ତ୍ରୀ ଶ୍ରୀମାନ୍ ବିଭୂତି ଭୁଷଣ ଜେନା ସୂଚନା ଦେଇଛନ୍ତି ଯେ, PUCC ପାଇବାରେ ଲୋକେ ସମ୍ମୁଖୀନ ହେଉଥିବା ଅସୁବିଧା ଉପରେ ସରକାର ବିଚାର କରୁଛନ୍ତି। ସଡ଼କ ସୁରକ୍ଷା ମାସ ଆସୁଥିବାରୁ ପ୍ରଦୂଷଣ ପ୍ରମାଣପତ୍ର ନେବା ପାଇଁ ବିଭାଗ ଏବେ କୋହଳ କରିଛି।

ମନ୍ତ୍ରୀ ଆହୁରି କହିଛନ୍ତି ଯେ, ୨୦୧୯ ରେ ଯେଉଁ ଜରିମାନା ରାଶି ବୃଦ୍ଧି କରାଯାଇଥିଲା, ସେଥିରେ କୋହଳ କରାଯିବା ଉଚିତ କି ନୁହେଁ ତାହା ବିବେଚନା କରାଯାଉଛି। ଅନ୍ୟ ରାଜ୍ୟରେ ଏହି ଜରିମାନା କମ୍ ରହିଥିବାରୁ ଏକ ପର୍ଯ୍ୟାଲୋଚନା ଚାଲିଛି। ନୂତନ ଏବଂ ପୁରାତନ ସମସ୍ତ ପ୍ରକାରର ଯାନକୁ ପ୍ରମାଣପତ୍ର ମିଳୁଥିବାରୁ ଜରିମାନା ବାବଦରେ କୋହଳ କରାଯାଇପାରେ। ଯେଉଁ ଗାଡ଼ିର ମାଲିକଙ୍କଠାରୁ ପୂର୍ବରୁ ଜରିମାନା ଆଦାୟ କରାଯାଇସାରିଛି, ସେହି ବିଷୟଟି ମଧ୍ୟ ବିଚାରାର୍ଥ ରହିଛି।

ଗତ ସପ୍ତାହରେ, ପ୍ରଦୂଷଣ ସାର୍ଟିଫିକେଟ ଯାଞ୍ଚ ବେଳେ ଜନସାଧାରଣ ସମ୍ମୁଖୀନ ହେଉଥିବା ସମସ୍ୟା ଉପରେ ବିଭାଗ ଅନୁଧ୍ୟାନ କରିଥିଲା। ତା’ପରେ ବାଣିଜ୍ୟ ଓ ପରିବହନ ବିଭାଗର ମନ୍ତ୍ରୀଙ୍କ ନିର୍ଦ୍ଦେଶରେ ଗାଡ଼ିର ବୈଧ କାଗଜପତ୍ର କରାଇବା ପାଇଁ ଦିଆଯାଇଥିବା ଅବଧିକୁ ଆଉ ଏକ ମାସ ବୃଦ୍ଧି କରାଯାଇଥିଲା। ଏହି ଅବଧି ମଧ୍ୟରେ ସମସ୍ତ ମାଲିକଙ୍କୁ ଆଇନ ଅନୁଯାୟୀ ବାଧ୍ୟତାମୂଳକ ଭାବେ ପ୍ରଦୂଷଣ ପ୍ରମାଣପତ୍ର ତଆରି କରାଇନେବାକୁ ଅନୁରୋଧ କରାଯାଇଥିଲା।

ବିଭାଗ ସ୍ପଷ୍ଟ କରିଛି ଯେ, ଫେବୃଆରୀ ୧ ତାରିଖ ଆଗରୁ କୌଣସି ପେଟ୍ରୋଲ ପମ୍ପ କୌଣସି ଗାଡ଼ିକୁ ପ୍ରଦୂଷଣ ସାର୍ଟିଫିକେଟ ନଥିବା କାରଣରେ ଇନ୍ଧନ ବିକ୍ରି କରିବାକୁ ମନା କରିପାରିବ ନାହିଁ।