କୁକୁ଼ଡା ଚାଷ ସବସିଡି ପାଇଁ ଲାଞ୍ଚ ନେଲା ବେଳେ ଧରିପଡିଲେ ପ୍ରାଣୀଧନ ବିଭାଗର କର୍ମଚାରୀ

ଭୁବନେଶ୍ବର (ସଂକେତ ଟିଭି): ଯାଜପୁର ଜିଲ୍ଲାର ବଡଚଣା ବ୍ଲକ ପ୍ରାଣୀ ଚିକିତ୍ସା କାର୍ଯ୍ୟାଳୟର ପ୍ରୋଗ୍ରାମ ଆସିଷ୍ଟାଣ୍ଟ ସୁଭାଶିଷ ସାମଲ କୁକୁ଼ଡା ଫାର୍ମ ସବସିଡି ପାଇଁ ୩୦,୦୦୦ ଟଙ୍କା ଲାଞ୍ଚ ନେଲା ବେଳେ ଭିଜିଲାନ୍ସ ହାତେ ଧରାପଡ଼ିଛନ୍ତି।

ଭିଜିଲାନ୍ସ ବିଭାଗ ଅନୁସାରେ, ଜଣେ ହିତାଧିକାରୀ ୨୦୨୪ ଡିସେମ୍ବର ୧୨ ତାରିଖରେ ରାଜ୍ୟ ସରକାରଙ୍କ ଯୋଜନାରେ କୁକୁ଼ଡା ଫାର୍ମ ପାଇଁ ଆବେଦନ କରିଥିଲେ। ଏହି ପ୍ରକଳ୍ପ ପାଇଁ ୭,୨୦,୦୦୦ ଟଙ୍କା ଧାର୍ଯ୍ୟ କରାଯାଇଥିଲା ଓ ଏଥିରେ ୬୦% ଅର୍ଥାତ୍ ୪,୩୨,୨୦୦ ଟଙ୍କା ସବସିଡି ଭାବରେ ମିଳିବାର ଥିଲା। ପ୍ରଥମ କିସ୍ତିର ସବସିଡି ଟଙ୍କା ଆବେଦନକାରୀ ପାଇସାରିଥିଲେ।

ଦ୍ୱିତୀୟ କିସ୍ତିର ୨,୧୬,୦୦୦ ଟଙ୍କା ପାଇଁ ଆବେଦନକାରୀ ପ୍ରାଣୀଧନ କାର୍ଯ୍ୟାଳୟକୁ ଯାଇଥିଲେ ଏବଂ ସୁଭାଶିଷ ସାମଲଙ୍କ ସଂସ୍ପର୍ଶରେ ଆସିଥିଲେ। ସାମଲ ଦ୍ୱିତୀୟ କିସ୍ତିର ଟଙ୍କା ମୁକ୍ତି ପାଇଁ ପ୍ରଥମେ ୪୦,୦୦୦ ଟଙ୍କା ଲାଞ୍ଚ ମାଗିଥିଲେ। ଆବେଦନକାରୀ ୩୦,୦୦୦ ଟଙ୍କା ଦେବାକୁ ରାଜି ହୋଇ ପରେ ଏହି ଘଟଣାର ଖବର ଭିଜିଲାନ୍ସ ଅଧିକାରୀଙ୍କୁ ଦେଇଥିଲେ।

ଆଜି ଯୋଜନାବଦ୍ଧ ଭାବରେ ସାମଲ ଟଙ୍କା ନେବା ସମୟରେ ଭିଜିଲାନ୍ସ କର୍ମଚାରୀଙ୍କ ଦ୍ୱାରା ଅତର୍କିତ ଚଢ଼ଉ କରାଯାଇଥିଲା। ଯାଜପୁର ଜିଲ୍ଲା ବଡଚଣା ଦେଇ ଯାଇଥିବା ୧୬ ନମ୍ବର ଜାତୀୟ ରାଜପଥ ନିକଟ କାଞ୍ଜିଆ ଛକରୁ ଭିଜିଲାନ୍ସ ଟଙ୍କା ଜବତ କରିଥିଲେ। ଭିଜିଲାନ୍ସ ବିଭାଗ ଏହି ଘଟଣା ସଂପର୍କରେ ମାମଲା ରଜିସ୍ଟର କରି ତଦନ୍ତ ଆରମ୍ଭ କରିଛି।