ଶୀର୍ଷ ସିଭିଲ ସେବାରେ ଥିବା ବ୍ୟକ୍ତିଙ୍କୁ ସିଭିଲ ସର୍ଭିସ ପରୀକ୍ଷା ମନା

ନୂଆଦିଲ୍ଲୀ (ସଂକେତ ଟିଭି): ଭାରତୀୟ ଲୋକ ସେବା ଆୟୋଗ (UPSC) ସିଭିଲ ସର୍ଭିସ ପରୀକ୍ଷାର (CSE) ନିୟମାବଳୀରେ ଗୁରୁତ୍ଵପୂର୍ଣ୍ଣ ପରିବର୍ତ୍ତନ ଆଣିଛି। ନୂଆ ନିୟମ ଅନୁଯାୟୀ, ଆଇଏଏସ ଓ ଆଇଏଫଏସ ଭଳି ଶୀର୍ଷ ସିଭିଲ ସେବାଗୁଡ଼ିକରେ ପୂର୍ବରୁ ନିଯୁକ୍ତି ପ୍ରାପ୍ତ ବ୍ୟକ୍ତିମାନେ ଆଉ ସିଭିଲ ସର୍ଭିସ ପରୀକ୍ଷା ଦେଇପାରିବେ ନାହିଁ।

ଗୁରୁବାର ଜାରି କରାଯାଇଥିବା ବିଜ୍ଞପ୍ତିରେ ଆୟୋଗ ସ୍ପଷ୍ଟ କରିଛନ୍ତି ଯେ ଯେଉଁ ପ୍ରାର୍ଥୀ ପୂର୍ବ ପରୀକ୍ଷାର ଫଳାଫଳ ଆଧାରରେ ଭାରତୀୟ ପ୍ରଶାସନିକ ସେବା (IAS) ବା ଭାରତୀୟ ବୈଦେଶିକ ସେବା (IFS)ରେ ନିଯୁକ୍ତି ପାଇଛନ୍ତି ଏବଂ ସେହି ସେବାର ସଦସ୍ୟ ରୂପେ କାର୍ଯ୍ୟରତ ଅଛନ୍ତି, ସେମାନେ ସିଭିଲ ସର୍ଭିସ ପରୀକ୍ଷା ୨୦୨୬ ଦେବା ପାଇଁ ଅଯୋଗ୍ୟ ବିବେଚିତ ହେବେ।

ଏଥି ସହିତ ଆୟୋଗ ଆହୁରି ସ୍ପଷ୍ଟ କରିଛନ୍ତି ଯେ “ସିଭିଲ ସର୍ଭିସ (ପ୍ରିଲିମ୍ସ) ପରୀକ୍ଷା ୨୦୨୬ ଶେଷ ହେବା ପରେ ଯଦି କେହି ପ୍ରାର୍ଥୀ ଆଇଏଏସ ବା ଆଇଏଫଏସରେ ନିଯୁକ୍ତି ପାଆନ୍ତି ଏବଂ ସେହି ସେବାର ସଦସ୍ୟ ରହନ୍ତି, ତେବେ ପ୍ରିଲିମ୍ସରେ ଉତ୍ତୀର୍ଣ୍ଣ ହୋଇଥିଲେ ମଧ୍ୟ ସେମାନେ ମେନ୍ ପରୀକ୍ଷାରେ ବସିପାରିବେ ନାହିଁ।”

ଏହି ନିୟମ ପରବର୍ତ୍ତୀ ସ୍ଥିତି ପାଇଁ ମଧ୍ୟ ପ୍ରଯୁଜ୍ୟ। ଯଦି କୌଣସି ପ୍ରାର୍ଥୀ CSE ୨୦୨୬ ର ମେନ୍ ପରୀକ୍ଷା ଆରମ୍ଭ ହେବା ପରେ, କିନ୍ତୁ ଫଳାଫଳ ଘୋଷଣା ହେବା ପୂର୍ବରୁ ଆଇଏଏସ ବା ଆଇଏଫଏସରେ ନିଯୁକ୍ତ ହୋଇଯାନ୍ତି ଏବଂ ସେହି ସେବାରେ ରହନ୍ତି, ତେବେ ତାଙ୍କୁ CSE-୨୦୨୬ ଫଳାଫଳ ଆଧାରରେ କୌଣସି ପଦବୀ ପାଇଁ ବିଚାର କରାଯିବ ନାହିଁ।

ଅନ୍ୟ ଏକ ପ୍ରମୁଖ ନିୟମ ଭାରତୀୟ ପୋଲିସ ସେବା (IPS) ସହିତ ଜଡ଼ିତ। ଯେଉଁ ପ୍ରାର୍ଥୀ ପୂର୍ବରୁ ପରୀକ୍ଷା ମାଧ୍ୟମରେ IPSରେ ମନୋନୀତ ବା ନିଯୁକ୍ତ ହୋଇସାରିଛନ୍ତି, ସେମାନେ CSE ୨୦୨୬ ଫଳାଫଳ ଆଧାରରେ ପୁନର୍ବାର IPS ବାଛିପାରିବେ ନାହିଁ କିମ୍ବା ତାହା ପାଇଁ ଅଭ୍ୟର୍ଥୀ ହୋଇପାରିବେ ନାହିଁ।

ତଥାପି, UPSC ଆଇପିଏସ ଏବଂ ଅନ୍ୟ ସେଣ୍ଟ୍ରାଲ ସର୍ଭିସ ଗ୍ରୁପ୍-ଏ ପଦବୀପାଇଁ ଚୟନିତ ପ୍ରାର୍ଥୀଙ୍କୁ କିଛି ଛାଡ ଦେଇଛି। ଏଭଳି ପ୍ରାର୍ଥୀମାନେ ଯଦି ଯୋଗ୍ୟତାର ସର୍ତ୍ତାବଳୀ ପୂରଣ କରନ୍ତି ଏବଂ ସମ୍ବନ୍ଧିତ କର୍ତ୍ତୃପକ୍ଷଙ୍କ ତରଫରୁ ତାଲିମରେ ଯୋଗଦାନରୁ ଛୁଟି ପ୍ରାପ୍ତ ହୁଅନ୍ତି, ତେବେ ସେମାନଙ୍କୁ CSE ୨୦୨୭ ପରୀକ୍ଷା ଦେବା ପାଇଁ ଅନୁମତି ଦିଆଯାଇପାରିବ।