ପଳାଶୁଣୀରୁ ହଂସପାଳ ମଧ୍ୟରେ ହେବ ୬ ଲେନ୍ ରାସ୍ତା, ଖର୍ଚ୍ଚ ହେବ ୨୫ କୋଟି

ଭୁବନେଶ୍ବର (ସଂକେତ ଟିଭି): ରାଜଧାନୀ ଭୁବନେଶ୍ବରର ପଳାଶୁଣୀ ଅଞ୍ଚଳରେ ଦୀର୍ଘଦିନର ଟ୍ରାଫିକ୍ ସମସ୍ୟାର ସମାଧାନ ପାଇଁ କେନ୍ଦ୍ର ସଡକ ପରିବହନ ପ୍ରାଧିକରଣ (NHAI) ଏକ ବଡ଼ ପଦକ୍ଷେପ ନେଇଛି। ପଳାଶୁଣୀରୁ ହଂସପାଳ ମଧ୍ୟରେ ବୃଦ୍ଧି ପାଉଥିବା ଯାନବାହନ ଚାପକୁ ହ୍ରାସ କରିବା ପାଇଁ ଏଠାରେ ୪ ଲେନ୍ ରାସ୍ତାକୁ ୬ ଲେନ୍ ରେ ପରିଣତ କରାଯିବ।

ଦୀର୍ଘ ବର୍ଷ ଧରି ଏହି ରାସ୍ତାରେ, ବିଶେଷକରି ସକାଳ ଓ ସନ୍ଧ୍ୟା ସମୟରେ ଭୟଙ୍କର ଟ୍ରାଫିକ୍ ଜାମ୍ ହେଉଛି। ଫଳରେ ଭୁବନେଶ୍ବର ଓ କଟକ ମଧ୍ୟରେ ଯାତାୟାତ କରୁଥିବା ହଜାର ହଜାର ଲୋକଙ୍କୁ ପ୍ରତିଦିନ ଅସହ୍ୟ ଯନ୍ତ୍ରଣା ଭୋଗିବାକୁ ପଡୁଥିଲା। ଏହି ସମସ୍ୟାର ସ୍ଥାୟୀ ସମାଧାନ ପାଇଁ NHAI ପକ୍ଷରୁ ରାସ୍ତା ପ୍ରସ୍ତୀକରଣ ଯୋଜନା ହାତକୁ ନିଆଯାଇଛି।

NHAI ଆଞ୍ଚଳିକ ଅଧିକାରୀ ବିରେନ୍ଦ୍ର ସିଂଙ୍କ ଅନୁଯାୟୀ, ଏହି ୬ ଲେନ୍ ରାସ୍ତା ନିର୍ମାଣ ପାଇଁ ପ୍ରାୟ ୨୫ କୋଟି ଟଙ୍କା ବ୍ୟୟ ଅଟକଳ କରାଯାଇଛି। ଏହା ଦ୍ଵାରା କେବଳ ଟ୍ରାଫିକ୍ ଜାମ୍ କମିବ ନାହିଁ, ବରଂ ଯାନବାହନ ଚଳାଚଳ ଅଧିକ ସହଜ ଓ ସୁରୁଖୁରୁରେ ହୋଇପାରିବ। ପ୍ରକଳ୍ପର କାର୍ଯ୍ୟ ଆରମ୍ଭ ହେଲେ ଦେଢ଼ ବର୍ଷ (୧.୫ ବର୍ଷ) ମଧ୍ୟରେ ଶେଷ କରିବାକୁ ଲକ୍ଷ୍ୟ ରଖାଯାଇଛି।

ଏହି ପ୍ରକଳ୍ପ ଅଧୀନରେ ପଳାଶୁଣୀରେ ଏକ ନୂତନ ବ୍ରିଜ୍ ନିର୍ମାଣ କରିବାକୁ ମଧ୍ୟ NHAI ପ୍ରସ୍ତାବ ଦେଇଛି। ଯାହା ଭିଡ଼ ନିୟନ୍ତ୍ରଣରେ ସହାୟକ ହେବ। ରାସ୍ତା ପ୍ରସ୍ତୀକରଣ ପରେ ଭୁବନେଶ୍ବର-କଟକ କରିଡରରେ ଯାତାୟାତ ଅଭିଜ୍ଞତାରେ ବ୍ୟାପକ ପରିବର୍ତ୍ତନ ଆସିବ ବୋଲି ଆଶା କରାଯାଉଛି।