ଦିଲ୍ଲୀ ମଦ ଦୁର୍ନୀତି ମାମଲା: କେଜ୍ରିୱାଲ ଓ ସିସୋଦିଆଙ୍କୁ କୋର୍ଟରୁ ମିଳିଲା କ୍ଲିନଚିଟ୍

ନୂଆଦିଲ୍ଲୀ(ସଂକେତ ଟିଭି): ଦିଲ୍ଲୀର ବହୁଚର୍ଚ୍ଚିତ ଅବକାରୀ ନୀତି ଦୁର୍ନୀତି ମାମଲାରେ ଆମ ଆଦମୀ ପାର୍ଟି (ଆପ)ର ଦୁଇ ବରିଷ୍ଠ ନେତାଙ୍କୁ ଏକ ଐତିହାସିକ ଆଶ୍ୱସ୍ତି ମିଳିଛି। ଶୁକ୍ରବାର ଦିନ ଦିଲ୍ଲୀର ରାଉଜ ଆଭେନ୍ୟୁ କୋର୍ଟ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ସମେତ ଏହି ମାମଲାର ସମସ୍ତ ୨୩ ଜଣ ଅଭିଯୁକ୍ତଙ୍କୁ ଦୋଷମୁକ୍ତ (Discharge) କରିଛନ୍ତି। କୋର୍ଟଙ୍କ ଏହି ରାୟ ଶୁଣିବା ପରେ କେଜ୍ରିୱାଲ କୋର୍ଟ ରୁମରେ ଭାବବିହ୍ୱଳ ହୋଇପଡ଼ିଥିଲେ।

ବିଚାରପତି ତାଙ୍କ ରାୟରେ ସ୍ପଷ୍ଟ କରିଛନ୍ତି ଯେ ସିବିଆଇ ଦ୍ୱାରା ଅଣାଯାଇଥିବା ଷଡଯନ୍ତ୍ରର ଅଭିଯୋଗଗୁଡ଼ିକ ନ୍ୟାୟିକ ଯାଞ୍ଚରେ ପ୍ରମାଣିତ ହୋଇପାରିନାହିଁ। କୋର୍ଟ କହିଛନ୍ତି ଯେ ମନୀଷ ସିସୋଦିଆଙ୍କ ପକ୍ଷରୁ କୌଣସି “ଅପରାଧିକ ଉଦ୍ଦେଶ୍ୟ” ଥିବାର ପ୍ରମାଣ ମିଳିନାହିଁ। ଏହା ସହିତ କୋର୍ଟ ଉଲ୍ଲେଖ କରିଛନ୍ତି ଯେ କୌଣସି ସାମ୍ବିଧାନିକ କର୍ତ୍ତୃପକ୍ଷଙ୍କ ବିରୋଧରେ କେବଳ ଷଡଯନ୍ତ୍ରର ତତ୍ତ୍ୱ ଉପରେ ଆଧାର କରି ମାମଲା ଚାଲିପାରିବ ନାହିଁ।

ଏହି ରାୟ ପରେ କେଜ୍ରିୱାଲଙ୍କ ପତ୍ନୀ ସୁନିତା କେଜ୍ରିୱାଲ ସୋସିଆଲ ମିଡିଆ ‘ଏକ୍ସ’ରେ ପ୍ରତିକ୍ରିୟା ରଖିଛନ୍ତି। ସେ ଲେଖିଛନ୍ତି, “ଏହି ଦୁନିଆରେ କେହି ଯେତେ ଶକ୍ତିଶାଳୀ ହେଲେ ମଧ୍ୟ ଶିବ ଶକ୍ତିଙ୍କ ଠାରୁ ଉର୍ଦ୍ଧ୍ୱରେ ନୁହନ୍ତି। ସତ୍ୟର ସର୍ବଦା ଜୟ ହୁଏ।” କୋର୍ଟଙ୍କ ରାୟକୁ ସ୍ୱାଗତ କରି ସେ ଆହୁରି ମଧ୍ୟ କହିଛନ୍ତି, “ମୁଁ ବିଚାରପତିମାନଙ୍କୁ ଧନ୍ୟବାଦ ଦେବାକୁ ଚାହୁଁଛି। ଅରବିନ୍ଦ କେଜ୍ରିୱାଲ ତାଙ୍କ ସମଗ୍ର ଜୀବନ ସଚ୍ଚୋଟତାର ସହିତ ବଞ୍ଚିଛନ୍ତି।” ସେ ଏହାକୁ କେବଳ ଏକ ଆଇନଗତ ଲଢ଼େଇ ନୁହେଁ ବରଂ ସତ୍ୟ ଓ ନ୍ୟାୟ ପାଇଁ ଏକ ସଂଗ୍ରାମ ବୋଲି ଅଭିହିତ କରିଥିଲେ।

କୋର୍ଟରୁ ବାହାରି ଅରବିନ୍ଦ କେଜ୍ରିୱାଲ ଗଣମାଧ୍ୟମକୁ କହିଛନ୍ତି ଯେ ଆପ୍ ବିରୋଧରେ ଏକ ବଡ଼ ଷଡ଼ଯନ୍ତ୍ର କରାଯାଇଥିଲା। ସେ ଅଭିଯୋଗ କରିଛନ୍ତି, “ଆମ୍ ଆଦମୀ ପାର୍ଟିକୁ ଧ୍ୱଂସ କରିବା ପାଇଁ ସମସ୍ତ ଶୀର୍ଷ ନେତାଙ୍କୁ ଜେଲ ପଠାଯାଇଥିଲା। ଦଳର ପାଞ୍ଚ ପ୍ରମୁଖ ନେତାଙ୍କୁ ଗିରଫ କରାଯାଇଥିଲା।” ସେ କୋର୍ଟଙ୍କ ରାୟକୁ ଗଣତନ୍ତ୍ରର ବିଜୟ ଭାବରେ ବର୍ଣ୍ଣନା କରିଥିଲେ।

ସ୍ମରଣଯୋଗ୍ୟ, ସିବିଆଇ ଅଭିଯୋଗ କରିଥିଲା ଯେ ୨୦୨୧-୨୨ ଦିଲ୍ଲୀ ଅବକାରୀ ନୀତି ପ୍ରଣୟନ ଓ କାର୍ଯ୍ୟକାରୀ ସମୟରେ ଅନିୟମିତତା ଘଟିଛି। ଏଜେନ୍ସି ଦାବି କରିଥିଲା ଯେ ନୀତିକୁ ନିଜ ସ୍ୱାର୍ଥରେ ପ୍ରଭାବିତ କରିବା ପାଇଁ ‘ସାଉଥ୍ ଗ୍ରୁପ୍’ ନାମକ ଏକ ଲବି ପକ୍ଷରୁ ପ୍ରାୟ ୧୦୦ କୋଟି ଟଙ୍କା ଘୁଷ ଦିଆଯାଇଥିଲା। ଏହି ମାମଲାରେ ସମୁଦାୟ ୨୩ ଜଣଙ୍କ ବିରୋଧରେ ଚାର୍ଜସିଟ୍ ଦାଖଲ କରାଯାଇଥିଲା।

କେଜ୍ରିୱାଲଙ୍କ ଓକିଲ ଏନ୍ ହରିହରନ୍ ଯୁକ୍ତି ଦର୍ଶାଇଥିଲେ ଯେ ତାଙ୍କ ମହକିଲଙ୍କ ବିରୋଧରେ କୌଣସି ପ୍ରତ୍ୟକ୍ଷ ପ୍ରମାଣ ନାହିଁ। ଉଭୟ ପକ୍ଷର ଯୁକ୍ତି ଶୁଣିବା ପରେ କୋର୍ଟ କେବଳ କେଜ୍ରିୱାଲ ଓ ସିସୋଦିଆଙ୍କୁ ଦୋଷମୁକ୍ତ କରିନାହାନ୍ତି, ବରଂ ସିବିଆଇର ତଦନ୍ତ ପ୍ରକ୍ରିୟାକୁ କଡ଼ା ସମାଲୋଚନାର ଶିକାର କରିଛନ୍ତି।

କୋର୍ଟ କହିଛନ୍ତି ଯେ ସରକାରୀ ଓକିଲଙ୍କ କାହାଣୀ କେବଳ ଅନୁମାନ ଉପରେ ଆଧାରିତ, ଯାହା ଆଇନଗତ ଭାବରେ ସଠିକ୍ ନୁହେଁ। ସେ କହିଛନ୍ତି, “ସିବିଆଇର ୧୨% ହୋଲସେଲ ମାର୍ଜିନ ଥ୍ୟୋରି ସ୍ପଷ୍ଟ ଭାବେ ଭୁଲ୍ ଓ ଆର୍ଥିକ ରୂପରେ ଅଶିକ୍ଷିତ।” କୋର୍ଟ ଆହୁରି ମଧ୍ୟ କହିଛନ୍ତି ଯେ ସିବିଆଇର କାର୍ଯ୍ୟପ୍ରଣାଳୀ ଅପରାଧିକ ତଦନ୍ତକୁ ଅଧିକାର ଛଡ଼ାଇ ନେବାର ଏକ ଅସ୍ତ୍ର ରୂପେ ପରିଣତ କରିବାର ବିପଦ ସୃଷ୍ଟି କରୁଛି। ବିନା ପ୍ରମାଣରେ ଜଣେ ସରକାରୀ କର୍ମଚାରୀଙ୍କୁ ଫସାଇବା ପାଇଁ କୋର୍ଟ ତଦନ୍ତକାରୀ ଅଧିକାରୀଙ୍କ ବିରୁଦ୍ଧରେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମଧ୍ୟ ସୁପାରିଶ କରିଛନ୍ତି।

ଶେଷରେ କୋର୍ଟ ତାଙ୍କ ରାୟରେ କହିଥିଲେ ଯେ ଅଭିଯୋଗ କର୍ତ୍ତାଙ୍କ ଅଭିଯୋଗ କୌଣସି ତଥ୍ୟଭିତ୍ତିକ ନୁହେଁ, ଏକ କାହାଣୀ ଉପରେ ଆଧାରିତ ଥିଲା। “ଆଉ ଆଇନ୍ରେ କାହାଣୀ ଉପରେ ଆଧାରିତ ମାମଲାର କୌଣସି ସ୍ଥାନ ନାହିଁ,” ବୋଲି କୋର୍ଟ ପ୍ରସ୍ତୁତ କରିଥିଲେ।