ଦୋଷ ସ୍ୱୀକାର କଲା ୬/୧୧ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ତହୱୁର ରାଣା

ନୂଆଦିଲ୍ଲୀ (ସଂକେତ୍ ଟିଭି) ମୁମ୍ବାଇ ଆତଙ୍କବାଦୀ ଆକ୍ରମଣର ମୁଖ୍ୟ ଷଡଯନ୍ତ୍ରକାରୀ ତହୱୁର ରାଣା ନିଜ ଦୋଷ ସ୍ୱୀକାର କରିଛି। ମୁମ୍ବାଇ କ୍ରାଇମ ବ୍ରାଞ୍ଚ ଆଗରେ ପଚରାଉଚରା ସମୟରେ ସେ ଏହି ଆକ୍ରମଣରେ ନିଜର ଭୂମିକା ସହ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଖୁଲାସା କରିଛି। ରାଣା ସ୍ୱୀକାର କରିଛି ଯେ ସେ ପାକିସ୍ତାନ ସେନାର ଏକ ବିଶ୍ୱସ୍ତ ଏଜେଣ୍ଟ ଥିଲେ ଏବଂ ୨୦୦୮ ମସିହାରେ ଆକ୍ରମଣ ସମୟରେ ମୁମ୍ବାଇରେ ଉପସ୍ଥିତ ଥିଲେ।

ଏପ୍ରିଲ ୪ ତାରିଖରେ ଆମେରିକାର ସୁପ୍ରିମ କୋର୍ଟ ତାଙ୍କ ପ୍ରତ୍ୟର୍ପଣ ବିରୋଧୀ ଆବେଦନ ଖାରଜ କରିବା ପରେ ଏପ୍ରିଲ ୧୦ରେ ତାଙ୍କୁ ଭାରତକୁ ପ୍ରତ୍ୟର୍ପଣ କରାଯାଇଥିଲା। ବର୍ତ୍ତମାନ ମୁମ୍ବାଇ ପୋଲିସ ତାଙ୍କୁ ଜେରା କରି ଆକ୍ରମଣ ସମ୍ପର୍କରେ ଗଭୀର ତଦନ୍ତ ଚଳାଉଛି। ଏହି ଆକ୍ରମଣରେ ମୁମ୍ବାଇର ଛତ୍ରପତି ଶିବାଜୀ ଟର୍ମିନାଲ, ତାଜ ହୋଟେଲ ଏବଂ ଅନ୍ୟାନ୍ୟ ସ୍ଥାନରେ ୧୬୬ ଜଣଙ୍କର ମୃତ୍ୟୁ ହୋଇଥିଲା।

ରାଣା ପଚରାଉଚରା ସମୟରେ କବୁଲ କରିଛି ଯେ ଲସ୍କର-ଏ-ତୈବା କେବଳ ଏକ ଆତଙ୍କବାଦୀ ସଂଗଠନ ନୁହେଁ, ବରଂ ଏକ ଗୁପ୍ତଚର ନେଟୱାର୍କ ଭାବରେ କାର୍ଯ୍ୟ କରେ। ସେ ଏହା ମଧ୍ୟ ସ୍ୱୀକାର କରିଛନ୍ତି ଯେ ତାଙ୍କ ସହଯୋଗୀ ଡେଭିଡ୍ ହେଡଲି ଲସ୍କର ପାଇଁ ତାଲିମ ନେଇଥିଲେ। ରାଣା ମୁମ୍ବାଇରେ ଏକ ଇମିଗ୍ରେସନ୍ କେନ୍ଦ୍ର ଖୋଲିବାର ଯୋଜନା କରିଥିଲେ, ଯାହା ଆତଙ୍କବାଦୀ କାର୍ଯ୍ୟକଳାପକୁ ଘୋଡାଇବାର ଏକ ଉପାୟ ଥିଲା।

ତଦନ୍ତରୁ ଜଣାପଡିଛି ଯେ ରାଣା ଆକ୍ରମଣ ପୂର୍ବରୁ ଟାର୍ଗେଟ ସ୍ଥଳଗୁଡିକର ରେକି କରିଥିଲେ ଏବଂ ଏହି ଯୋଜନା ପାକିସ୍ତାନର ISI ସହିତ ମିଳିତ ଭାବରେ କାର୍ଯ୍ୟକାରୀ କରାଯାଇଥିଲା। ବର୍ତ୍ତମାନ ମୁମ୍ବାଇ ପୋଲିସ ତାଙ୍କୁ ଗିରଫ କରି ଅଦାଲତକୁ ଉପସ୍ଥାପନ କରିବାକୁ ପ୍ରସ୍ତୁତ ହେଉଛି, ଯାହା ଦ୍ୱାରା ଏହି ମାମଲାର ତଦନ୍ତ ଆହୁରି ଆଗକୁ ବଢିବ।

ଉଲ୍ଲେଖ୍ୟ ଯେ ତହୱୁର ରାଣା ୨୬/୧୧ ଆକ୍ରମଣରେ ଜଡିତ ଡେଭିଡ୍ ହେଡଲିଙ୍କ ଘନିଷ୍ଠ ସହଯୋଗୀ ଥିଲେ। ଏହି ଆକ୍ରମଣରେ ୧୦ ଜଣ ପାକିସ୍ତାନୀ ଆତଙ୍କବାଦୀ ମୁମ୍ବାଇର ବିଭିନ୍ନ ସ୍ଥାନରେ ହତ୍ୟାକାଣ୍ଡ ଚଳାଇଥିଲେ, ଯାହା ୬୦ ଘଣ୍ଟା ଧରି ଚାଲିଥିଲା ।