ଟ୍ରମ୍ପଙ୍କ ସ୍ୱପ୍ନ ଭାଙ୍ଗିଲା, ମାରିଆ ମାଚାଡୋ ପାଇଲେ ନୋବେଲ ଶାନ୍ତି ପୁରସ୍କାର

ନୂଆଦିଲ୍ଲୀ (ସଂକେତ ଟିଭି): ଅନେକ ପ୍ରଚାର କରିବା ସତ୍ତ୍ବେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ନୋବେଲ ଶାନ୍ତି ପୁରସ୍କାର ମିଳିପାରିନାହିଁ। ଗତ କିଛି ମାସ ହେବ ଅନେକ ଦେଶ ମଧ୍ୟରେ ଯୁଦ୍ଧର ସମାପ୍ତି କରି ଶାନ୍ତି ଆଣିଥିବା ଦାବି କରିଆସୁଥିବା ଟ୍ରମ୍ପ କହୁଥିଲେ ଯେ ସେ ହିଁ ନୋବେଲ ଶାନ୍ତି ପୁରସ୍କାର ପାଇବାକୁ ଯୋଗ୍ୟ। ହେଲେ ଆଜି ତାଙ୍କର ସେ ସ୍ୱପ୍ନ ଭାଙ୍ଗିଯାଇଛି। ତାଙ୍କ ପରିବର୍ତ୍ତେ ନୋବେଲ କମିଟି ଭେନେଜୁଏଲାର ବିରୋଧୀ ନେତ୍ରୀ ମାରିଆ କୋରିନା ମାଚାଡୋଙ୍କୁ ନୋବେଲ ଶାନ୍ତି ପୁରସ୍କାର ପ୍ରଦାନ କରିଛି।

ଭେନେଜୁଏଲାରେ ଗଣତନ୍ତ୍ର ଏବଂ ମାନବାଧିକାରକୁ ପ୍ରୋତ୍ସାହିତ କରିବା ଏବଂ ଦେଶରେ ଏକଛତ୍ରବାଦୀ ଶାସନର ଅନ୍ତ ଘଟାଇବା ପାଇଁ ଏକ ଶାନ୍ତିପୂର୍ଣ୍ଣ ସଂଘର୍ଷର ନେତୃତ୍ୱ ନେଇଥିବାରୁ ମାରିଆ କୋରିନା ମାଚାଡୋଙ୍କୁ ୨୦୨୫ ନୋବେଲ ଶାନ୍ତି ପୁରସ୍କାର ପ୍ରଦାନ କରାଯାଇଛି। ମାରିଆଙ୍କୁ ଭେନେଜୁଏଲାର ‘ଆଇରନ୍ ଲେଡି’ ବୋଲି କୁହାଯାଏ। ଘୋଷଣା କରିବା ସମୟରେ ନୋବେଲ କମିଟି କହିଛି ଯେ, “ଭେନେଜୁଏଲାର ଲୋକଙ୍କ ପାଇଁ ଗଣତାନ୍ତ୍ରିକ ଅଧିକାରକୁ ପ୍ରୋତ୍ସାହିତ କରିବାରେ ମାଚାଡୋଙ୍କ ଅକ୍ଳାନ୍ତ ପରିଶ୍ରମ ପାଇଁ ତାଙ୍କୁ ଏହି ସ୍ୱୀକୃତି ଦେଉଛି।”

ଏହି ବର୍ଷ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ନୋବେଲ ଶାନ୍ତି ପୁରସ୍କାର ପାଇଁ ଦୌଡ଼ରେ ଥିଲେ। ସେ ବାରମ୍ବାର ଦାବି କରିଥିଲେ ଯେ ଆଠ ମାସରେ “ଆଠଟି ଯୁଦ୍ଧ” ବନ୍ଦ କରିଥିବାରୁ ସେ ଏହି ପୁରସ୍କାର ପାଇବାକୁ ଯୋଗ୍ୟ। ଏହି ଘୋଷଣା ପରେ ଜଣେ ସାମ୍ବାଦିକ ନୋବେଲ କମିଟିର ଅଧ୍ୟକ୍ଷଙ୍କୁ ପ୍ରଶ୍ନ କରିଥିଲେ ଯେ ଟ୍ରମ୍ପଙ୍କୁ ପୁରସ୍କାର ନମିଳିଲେ ତାହା ଆମେରିକାର ଅପମାନ ହେବ କି ନାହିଁ। ଏହି ପ୍ରଶ୍ନର ଉତ୍ତରରେ, ନୋବେଲ କମିଟିର ଅଧ୍ୟକ୍ଷ ଜର୍ଗେନ ୱାଟନେ ଫ୍ରାଇଡନେସ କହିଥିଲେ, “ନୋବେଲ ଶାନ୍ତି ପୁରସ୍କାରର ଦୀର୍ଘ ଇତିହାସରେ, ଏହି କମିଟି ଅନେକ ପ୍ରକାରର ଅଭିଯାନ ଏବଂ ମିଡିଆ ଟେନସନ୍ ଦେଖିଛି… ଆମେ କେବଳ ଆଲଫ୍ରେଡ୍ ନୋବେଲଙ୍କ କାର୍ଯ୍ୟ ଏବଂ ଇଚ୍ଛାଶକ୍ତି ଉପରେ ଆମର ନିଷ୍ପତ୍ତି ନେଇଥାଉ।”
ମାଚାଡୋଙ୍କୁ ବାଛିବା ସମୟରେ, ନୋବେଲ କମିଟି କହିଛି, “ଗତ ବର୍ଷ ଧରି, ମାଚାଡୋଙ୍କୁ ଲୁଚିବାକୁ ବାଧ୍ୟ କରାଯାଇଥିଲା। ତାଙ୍କ ଜୀବନ ପ୍ରତି ଗମ୍ଭୀର ବିପଦ ସତ୍ତ୍ୱେ, ସେ ଦେଶରେ ରହିଥିଲେ। ଏହା ଏପରି ଏକ ନିଷ୍ପତ୍ତି ଯାହା ଲକ୍ଷ ଲକ୍ଷ ଲୋକଙ୍କୁ ପ୍ରେରଣା ଦେଇଛି। ଯେତେବେଳେ ସ୍ୱେଚ୍ଛାଚାରୀମାନେ କ୍ଷମତା ଦଖଲ କରନ୍ତି, ସେତେବେଳେ ସ୍ୱାଧୀନତାର ସେହି ସାହସୀ ରକ୍ଷାକର୍ତ୍ତାମାନଙ୍କୁ ଚିହ୍ନିତ କରିବା ଅତ୍ୟନ୍ତ ଜରୁରୀ।”

ଏହି ଘୋଷଣା ପୂର୍ବରୁ ଟ୍ରମ୍ପ କହିଥିଲେ ଯେ, “ମୁଁ ୮ଟି ଯୁଦ୍ଧ ବନ୍ଦ କରିଛି, ଯାହା ଏହା ପୂର୍ବରୁ କେବେ ହୋଇନାହିଁ। କିନ୍ତୁ ନୋବେଲ କମିଟିକୁ ଯାହା କରିବାର ଥିବ ସେ କରିବେ। ସେମାନେ ଯାହା କରନ୍ତି ତାହା ଠିକ୍। ମୁଁ କୌଣସି ପୁରସ୍କାର ପାଇଁ ଯୁଦ୍ଧ ବନ୍ଦ କରିନାହିଁ। ମୁଁ ଅନେକ ଜୀବନ ବଞ୍ଚାଇବାକୁ ଏଭଳି କରିଛି।” ଏହା ସହ ସେ ପୂର୍ବତନ ରାଷ୍ଟ୍ରପତି ବରାକ୍ ଓବାମାଙ୍କୁ ଦିଆଯାଇଥିବା ନୋବେଲ୍ ପୁରସ୍କାର ଉପରେ ମଧ୍ୟ ପ୍ରତିକ୍ରିୟା ଦେଇଥିଲେ।

ଚଳିତ ବର୍ଷର ବିଜେତା ଘୋଷଣା ପୂର୍ବରୁ କମିଟି ମୋଟ ୩୩୮ଟି ନାମାଙ୍କନର ସମୀକ୍ଷା କରିଥିଲା। ଗତବର୍ଷର ନୋବେଲ ଶାନ୍ତି ପୁରସ୍କାର ଜାପାନୀ ପରମାଣୁ ବୋମା ସର୍ଭାଇଭର ଆନ୍ଦୋଳନର ନିହୋନ ହିଡାଙ୍କୟୋଙ୍କୁ ପ୍ରଦାନ କରାଯାଇଥିଲା।