ସୋର ଜେଲରୁ କଏଦୀ ଫେରାର: ଦୁଇ ୱାର୍ଡର ନିଲମ୍ବିତ

ବାଲେଶ୍ୱର (ସଂକେତ ଟିଭି): ବାଲେଶ୍ୱର ଜିଲ୍ଲାର ସୋର ସବ୍-ଜେଲରୁ ଜଣେ ବିଚାରଧୀନ କଏଦୀ ଚମ୍ପଟ ମାରିବାର ଘଟଣା ଘଟିଛି । ଫେରାର ହୋଇଥିବା ଅଭିଯୁକ୍ତ ଦୀପକ କୁମାର ରାଏଙ୍କୁ ଗତ ୧୯ ତାରିଖରେ ସିମୁଳିଆ ପୋଲିସ ଗିରଫ୍ କରି ଜେଲକୁ ପଠାଇଥିଲା । ଚୋରି, ହତ୍ୟା ଧମକ ଭଳି ଗୁରୁତର ଅଭିଯୋଗରେ ଝାଡଖଣ୍ଡ ବୋକାରୋରୁ ତାଙ୍କୁ ଗିରଫ୍ କରାଯାଇଥିଲା । ଘଟଣାର ୧୨ ଘଣ୍ଟା ପରେ ମଧ୍ୟ ତାଙ୍କୁ ଧରାଯାଇ ନାହିଁ ।

ଏହି ଘଟଣାରେ ଜେଲ ପ୍ରଶାସନର ଗୁରୁତର ବ୍ୟର୍ଥତା ପ୍ରତିଫଳିତ ହେବାରୁ ଜେଲ ଡିଜି ସୁଶାନ୍ତ ନାଥ ଦୁଇ ଜେଲ ୱାର୍ଡର୍ଙ୍କୁ ସସପେନ୍ଡ୍ କରିଛନ୍ତି । ଜେଲ ଡିଜି ଜଣାଇଛନ୍ତି ଯେ ଘଟଣାର ଏକ ଉଚ୍ଚସ୍ତରୀୟ ତଦନ୍ତ ଚାଲିଛି । ପ୍ରିଜନ୍ ଏଡିଜି ଅମିତାଭ ଠାକୁର୍ ଘଟଣାସ୍ଥଳରେ ପହଞ୍ଚିଛନ୍ତି ଏବଂ ଜେଲ ସୁପରିଟେଣ୍ଡେଣ୍ଟଙ୍କ ଉପସ୍ଥିତିରେ ତଦନ୍ତ କାର୍ଯ୍ୟ ଚାଲିଛି । ସିସିଟିଭି ଫୁଟେଜ୍ କିପରି ଭାଇରାଲ୍ ହେଲା, ସେ ବିଷୟରେ ମଧ୍ୟ ଗଭୀର ତଦନ୍ତ ହେବ ବୋଲି ଜଣାଯାଇଛି ।

ଫେରାର କଏଦୀକୁ ଶୀଘ୍ର ଗିରଫ୍ କରିବା ପାଇଁ ପୋଲିସ୍ କାର୍ଯ୍ୟକ୍ରମ ଆରମ୍ଭ କରିଛି । ବାଲେଶ୍ୱର ଏସପି ପ୍ରତ୍ୟୁଷ ଦିବାକର ଜଣାଇଛନ୍ତି ଯେ ଏଥିପାଇଁ ଏକ ସ୍ପେସିଆଲ୍ ଟିମ୍ ଗଠନ କରାଯାଇଛି ଏବଂ ବିଭିନ୍ନ ସ୍ଥାନରେ ନଜର ରଖାଯାଇଛି । ସେ ଆହୁରି ମଧ୍ୟ କହିଛନ୍ତି ଯେ ଜେଲ ଓ ଷ୍ଟାମ୍ପରେ ଥିବା ସମସ୍ୟା ଏବଂ କିପରି ପରିସ୍ଥିତିରେ କଏଦୀ ଫେରାର ହେଲା, ତଦନ୍ତ ପରେ ତାହାର ପ୍ରକୃତ କାରଣ ବାହାରକୁ ଆସିବ ଏବଂ ଦାୟୀମାନଙ୍କ ବିରୁଦ୍ଧରେ କଡ଼ା ପଦକ୍ଷେପ ନିଆଯିବ । ଗତ କିଛି ଦିନରେ ଜେଲ ବିଭାଗରେ ଏଭଳି ଅନେକ ବ୍ୟତିକ୍ରମ ଦେଖାଦେଇଥିବାରୁ ପ୍ରଶାସନ ସଚେତନ ହୋଇଛି ।