ଆଣ୍ଡାମାନରେ ୫.୪ ତୀବ୍ରତାର ଭୂକମ୍ପ, ଜାପାନରେ ସୁନାମି ଚେତାବନୀ

ପୋର୍ଟ ବ୍ଲେୟାର (ସଂକେତ ଟିଭି): ଆଣ୍ଡାମାନ ସାଗରରେ ଏକ ଶକ୍ତିଶାଳୀ ଭୂକମ୍ପ ଅନୁଭୂତ ହୋଇଛି। ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ଅନୁଯାୟୀ, ରବିବାର, ନଭେମ୍ବର ୯ ତାରିଖରେ ମଧ୍ୟାହ୍ନ ୧୨ଟା ୦୬ ମିନିଟରେ ଘଟିଥିବା ଏହି ଭୂକମ୍ପର ତୀବ୍ରତା ରିକ୍ଟର ସ୍କେଲରେ ୫.୪ ମାପ କରାଯାଇଛି। ଭୂକମ୍ପର କେନ୍ଦ୍ରସ୍ଥଳ ଆଣ୍ଡାମାନ ସାଗରରେ ଥିଲା ଏବଂ ଏହା ଭୂପୃଷ୍ଠରୁ ୯୦ କିଲୋମିଟର ଗଭୀରତାରେ ଅନୁଭୂତ ହୋଇଥିଲା। ଜର୍ମାନ ରିସର୍ଚ୍ଚ ସେଣ୍ଟର ଫର୍ ଜିଓସାଇନ୍ସ (GFZ) ଏହାର ତୀବ୍ରତା ୬.୦୭ ବୋଲି ମାପ କରିଛି। ଏଯାବତ୍ କ୍ଷୟକ୍ଷତିର କୌଣସି ରିପୋର୍ଟ ମିଳିନାହିଁ।

ଅନ୍ୟ ଏକ ଘଟଣାରେ, ରବିବାର ଦିନ ଜାପାନର ଇୱାଟେ ପ୍ରଦେଶ ଉପକୂଳରେ ୬.୮ ତୀବ୍ରତାର ଭୂକମ୍ପ ଘଟିଛି। ଏହି ଭୂକମ୍ପ ପରେ ଜାପାନ ପାଣିପାଗ ସଂସ୍ଥା ସୁନାମି ଚେତାବନୀ ଜାରି କରିଛି। ସଂସ୍ଥାଟି ରିପୋର୍ଟ କରିଛି ଯେ ସ୍ଥାନୀୟ ସମୟ ସନ୍ଧ୍ୟା ୫ଟା ୦୩ ମିନିଟ୍ରେ ଏହି ଭୂକମ୍ପ ଅନୁଭୂତ ହୋଇଥିଲା। ତିନି ଫୁଟ ଉଚ୍ଚତା ପର୍ଯ୍ୟନ୍ତ ସୁନାମି ଆସିବାର ଆଶଙ୍କା ରହିଛି। ଉପକୂଳୀୟ ଅଞ୍ଚଳର ଲୋକଙ୍କୁ ସତର୍କ କରାଯାଇ ସୁରକ୍ଷିତ ସ୍ଥାନକୁ ଚାଲିଯିବାକୁ କୁହାଯାଇଛି।

ଉଲ୍ଲେଖଯୋଗ୍ୟ ଯେ, ୨୦୧୧ ମସିହାରେ ଜାପାନର ଏହି ସମାନ ଅଞ୍ଚଳରେ ୯.୦ ତୀବ୍ରତାର ଭୟଙ୍କର ଭୂକମ୍ପ ହୋଇଥିଲା, ଯାହା ଫଳରେ ସୁନାମି ଆସିଥିଲା ଏବଂ ପ୍ରାୟ ୧୮,୫୦୦ ଲୋକଙ୍କ ପ୍ରାଣ ହରାଇଥିଲେ।