ରାଷ୍ଟ୍ରୀୟ ମର୍ଯ୍ୟାଦାର ସହ ବାରାମତିରେ ଅଜିତ ପାୱାରଙ୍କ ଶେଷକୃତ୍ୟ ସମ୍ପନ୍ନ

ମୁମ୍ବାଇ (ସଂକେତ ଟିଭି): ବାରାମତିରେ ଘଟିଥିବା ବିମାନ ଦୁର୍ଘଟଣାରେ ମହାରାଷ୍ଟ୍ରର ଦିବଙ୍ଗତ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ଅନ୍ତ୍ୟେଷ୍ଟି କାର୍ଯ୍ୟକ୍ରମ ଶୁକ୍ରବାର ବାରାମତିରେ ସମ୍ପନ୍ନ ହେଲା । ବିଦ୍ୟା ପ୍ରତିଷ୍ଠାନ ପରିସର ଲୋକାରଣ୍ୟରେ ପରିଣତ ହୋଇଥିଲା, ଯେଉଁଠି ଶହ ଶହ ଲୋକ ତାଙ୍କ ପ୍ରିୟ ନେତାଙ୍କୁ ଶେଷ ବିଦାୟ ଦେବାକୁ ଉପସ୍ଥିତ ଥିଲେ । ତାଙ୍କର ଦୁଇପୁଅ ଜୟ ଓ ପାର୍ଥ ପିତାଙ୍କ ଅନ୍ତିମ ସଂସ୍କାରର ସମସ୍ତ କାର୍ଯ୍ୟ କରିଥିଲେ ଏବଂ ମୁଖାଗ୍ନି ଦେଇଥିଲେ ।

ଅନ୍ତ୍ୟେଷ୍ଟି ସ୍ଥଳୀରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ନିତିନ ଗଡକରୀ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନଭିସ୍ ଏବଂ ଉପମୁଖ୍ୟମନ୍ତ୍ରୀ ଏକନାଥ ଶିନ୍ଦେ ସମେତ ଅନେକ ବରିଷ୍ଠ ନେତା ଉପସ୍ଥିତ ଥିଲେ । ସକାଳ ୯ଟା ପର୍ଯ୍ୟନ୍ତ ବାରାମତିର କାଟେବାଡ଼ି ବାସଭବନରେ ଶେଷ ଦର୍ଶନର ବ୍ୟବସ୍ଥା ଥିଲା । ପରେ ୯.୪୫ ଘଣ୍ଟାରେ ଏକ ଶୋଭାଯାତ୍ରା ସହିତ ତାଙ୍କ ପାର୍ଥିବ ଶରୀର ବିଦ୍ୟା ପ୍ରତିଷ୍ଠାନ ପରିସରକୁ ଅଣାଯାଇ ରାଷ୍ଟ୍ରୀୟ ମର୍ଯ୍ୟାଦା ସହିତ ଅନ୍ତିମ ସଂସ୍କାର ସମ୍ପନ୍ନ କରାଗଲା । ରାସ୍ତାର ଉଭୟ ପାର୍ଶ୍ଵରେ ହଜାର ହଜାର ଲୋକ ଛାଡ଼ିଥିବା ‘ଅଜିତ ଦାଦା ଅମର ରହେ’ ଆଦି ସ୍ଲୋଗାନ ଦେଉଥିଲେ ଏବଂ ଶେଷ ଦର୍ଶନ କରୁଥିଲେ ।

ଉଲ୍ଲେଖ୍ୟ, ବୁଧବାର ସକାଳେ ବାରାମତି ନିକଟରେ ଘଟିଥିବା ବିମାନ ଦୁର୍ଘଟଣାରେ ୬୬ ବର୍ଷୀୟ ଅଜିତ ପାୱାରଙ୍କ ସହ ବିମାନର କ୍ୟାପ୍ଟେନ୍ ସୁମିତ କପୁର, ସହ-ପାଇଲଟ୍ ଶାମ୍ଭବୀ ପାଠକ, ଫ୍ଲାଇଟ୍ ଆଟେଣ୍ଡାଣ୍ଟ ପିଙ୍କି ମାଲି ଏବଂ ପାୱାରଙ୍କ ବ୍ୟକ୍ତିଗତ ସୁରକ୍ଷା ଅଧିକାରୀ ବିଦ୍ୟୁତ୍ ଜାଧବଙ୍କର ମଧ୍ୟ ମୃତ୍ୟୁ ହୋଇଥିଲା । ଏହି ଘଟଣା ପରେ ମହାରାଷ୍ଟ୍ର ସରକାର ତିନିଦିନର ରାଜ୍ୟ ଶୋକ ଘୋଷଣା କରିଛନ୍ତି । ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଅଧୀନରେ ଥିବା ଏଏଆଇବି ଦୁର୍ଘଟଣାର ତଦନ୍ତ କରିଛି ଏବଂ ଉଦ୍ଧାର କରାଯାଇଥିବା ‘ବ୍ଲାକ୍ ବାକ୍ସ’ର ବିଶ୍ଳେଷଣ ଚାଲିଛି । ପୁଲିସ ଏକ ଦୁର୍ଘଟଣାଜନିତ ମୃତ୍ୟୁ ରିପୋର୍ଟ (ଏଡିଆର) ମଧ୍ୟ ଦାଖଲ କରିଛି ।