୧୧୪ଟି ରାଫାଲ କିଣିବା ପାଇଁ ମିଳିଲା କେନ୍ଦ୍ରର ମଞ୍ଜୁରୀ

ନୂଆଦିଲ୍ଲୀ (ସଂକେତ ଟିଭି): ଭାରତୀୟ ବାୟୁସେନାର ଶକ୍ତି ବୃଦ୍ଧି ପାଇବାକୁ ଯାଉଛି। ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କ ଦିଲ୍ଲୀ ଗସ୍ତ ପୂର୍ବରୁ ରାଫାଲ ଲଢ଼ୁଆ ବିମାନ ପାଇଁ ଭାରତ ଏବଂ ଫ୍ରାନ୍ସ ମଧ୍ୟରେ ହୋଇଥିବା ମେଗା ଡିଲ ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ଖବର ସାମ୍ନାକୁ ଆସିଛି।

ଗୁରୁବାର ପ୍ରତିରକ୍ଷା ମନ୍ତ୍ରଣାଳୟ ଅଧୀନ ପ୍ରତିରକ୍ଷା ଅଧିଗ୍ରହଣ ପରିଷଦ (DAC) ଭାରତୀୟ ବାୟୁସେନା ପାଇଁ ୧୧୪ଟି ଭାରତରେ ନିର୍ମିତ ରାଫାଲ ଲଢ଼ୁଆ ବିମାନକୁ ମଞ୍ଜୁରୀ ପ୍ରଦାନ କରିଛି। ସୂଚନାନୁଯାୟୀ, ଏହି ଡିଲର ମୋଟ ମୂଲ୍ୟ ପ୍ରାୟ ୩.୨୫ ଲକ୍ଷ କୋଟି ଟଙ୍କା ହେବ, ଯାହା ଏହାକୁ ବିଶ୍ୱର ସବୁଠାରୁ ବୃହତ ପ୍ରତିରକ୍ଷା ଚୁକ୍ତି ମଧ୍ୟରେ ଅନ୍ୟତମ କରିପାରେ।

ଗତ ମାସରେ ପ୍ରତିରକ୍ଷା କ୍ରୟ ବୋର୍ଡ ଏହି ପ୍ରସ୍ତାବକୁ ପ୍ରାଥମିକ ମଞ୍ଜୁରୀ ଦେଇଥିଲା। DAC ମଞ୍ଜୁରୀ ପରେ, ଏହି ମେଗା ପ୍ରକଳ୍ପ ବର୍ତ୍ତମାନ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଅର୍ଥ ମନ୍ତ୍ରଣାଳୟ ଏବଂ ସୁରକ୍ଷା କ୍ୟାବିନେଟ କମିଟି (CCS) ନିକଟକୁ ଅନୁମୋଦନ ପାଇଁ ପ୍ରେରିତ ହେବ।

ସୂତ୍ରରୁ ମିଳିଥିବା ସୂଚନା ଅନୁସାରେ, ଏହି ୧୧୪ଟି ବିମାନ ମଧ୍ୟରୁ ୧୬ଟିକୁ ସିଧାସଳଖ ଫ୍ରାନ୍ସରୁ ଆମଦାନୀ କରାଯାଇପାରେ। ଅବଶିଷ୍ଟ ବିମାନଗୁଡ଼ିକ ‘ମେକ ଇନ ଇଣ୍ଡିଆ’ ଯୋଜନା ଅଧୀନରେ ଦେଶରେ ନିର୍ମିତ ହେବ। ଏହି ସଂଖ୍ୟକ ବିମାନ ଭାରତୀୟ ବାୟୁସେନାର ୫-୬ଟି ସ୍କ୍ବାଡ୍ରନକୁ ସମର୍ଥନ କରିବାର କ୍ଷମତା ରଖିବ।

ପୂର୍ବ ଦୁଇଟି ରାଫାଲ ଚୁକ୍ତି ପରି, ଏହା ମଧ୍ୟ ଏକ G2G (ସରକାର-ସରକାର) ଚୁକ୍ତି ହେବ। ଏହି ଚୁକ୍ତି ସ୍ବାକ୍ଷରିତ ହେବା ପରେ, ଫରାସୀ କମ୍ପାନୀ ଡାସଲ୍ଟ ଏକ ଭାରତୀୟ କମ୍ପାନୀ ସହ ମିଳିତ ଭାବରେ ଦେଶରେ ଏକ ଉତ୍ପାଦନ କାରଖାନା ସ୍ଥାପନ କରିବ। ଏହି ଉତ୍ପାଦନ ପ୍ଲାଣ୍ଟରେ ପ୍ରସ୍ତୁତ ବିମାନରେ ପ୍ରାୟ ୬୦% ସ୍ବଦେଶୀ ଅସ୍ତ୍ରଶସ୍ତ୍ର ଏବଂ ଉପକରଣ ଲାଗିବ, ଯାହା ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରତାକୁ ବଳ ଦେବ।

ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କ ଆସନ୍ତା ସପ୍ତାହ (ଫେବୃଆରୀ ୧୭-୧୯) ଭାରତ ଗସ୍ତ ପୂର୍ବରୁ ଏହି ନିଷ୍ପତ୍ତି ନିଆଯାଇଥିବାରୁ ଏହାର କୂଟନୈତିକ ମହତ୍ତ୍ୱ ମଧ୍ୟ ରହିଛି।

ଏହି ପଦକ୍ଷେପ ଅପରେଶନ ସିନ୍ଦୂରର ସଫଳତାକୁ ମଧ୍ୟ ଦର୍ଶାଏ। ବାଲାକୋଟ୍ ପ୍ରତିଶୋଧ ପଦକ୍ଷେପ ସମୟରେ ପାକିସ୍ତାନ ବିରୋଧରେ ବିଦ୍ୟମାନ ରାଫାଲ ବିମାନର ଶ୍ରେଷ୍ଠ ପ୍ରଦର୍ଶନକୁ ଆଖି ଆଗରେ ରଖି ଏହି ନିଷ୍ପତ୍ତି ନିଆଯାଇଥିବା ବିଶେଷଜ୍ଞ ମତ ଦେଇଛନ୍ତି। ବାୟୁସେନାର ଉପାଧ୍ୟକ୍ଷ ଏୟାର ମାର୍ଶାଲ ନାଗେଶ କପୁର ପୂର୍ବରୁ ରାଫାଲକୁ ‘ଅପରେଶନ ସିନ୍ଦୂରର ନାୟକ’ ଆଖ୍ୟା ଦେଇ ଏହାର କ୍ଷମତାର ପ୍ରଶଂସା କରିଥିଲେ। ଏହି ବିମାନ ବାଲାକୋଟ୍ ପରେ ଲସ୍କର-ଏ-ତୋଇବା ଏବଂ ଜୈଶ-ଏ-ମହମ୍ମଦର ମୁଖ୍ୟାଳୟକୁ ସଫଳତାର ସହ ଧ୍ୱଂସ କରିଥିଲା।

ସ୍ମରଣଯୋଗ୍ୟ, ୨୦୧୬ରେ ଭାରତ ପ୍ରାୟ ୫୯,୦୦୦ କୋଟି ଟଙ୍କାରେ ୩୬ଟି ରାଫାଲ ବିମାନ କ୍ରୟ କରିଥିଲା। ଗତ ବର୍ଷ ଏପ୍ରିଲରେ ଭାରତୀୟ ନୌସେନା ପାଇଁ ରାଫାଲ (M) ସାମୁଦ୍ରିକ ସଂସ୍କରଣ କ୍ରୟ ଚୁକ୍ତି ମଧ୍ୟ ସ୍ବାକ୍ଷରିତ ହୋଇଥିଲା, ଯାହା ସ୍ବଦେଶୀ ବିମାନ ବାହକ INS ବିକ୍ରାନ୍ତରେ ନିୟୋଜିତ ହେବ।